Read Tobelo O BILANGAN 28 Bible Online

O BILANGAN 28 - Tobelo bible

O BILANGAN 28

¹Ma Jou wïhuloko o Musa, wohiädono o Israel; manyawaika önanga kokiani yohohininga ihidodiai hupaya o öraha-öraha ihitö tantuoka, ihihuba o huhuba-huhuba marupa o inomo yasosanangi ma Jou Ai hininga.

³Nenanga o huhuba kokiani ihihuba ma Jouika: Mangale o huhuba huhuba o wange ihi getongo, o duba manauru o dutu hinoto ma umuru o taongo moi manabo koiwa,

⁴o dutu moi mangale o ngorumino mahuhuba, deʼ o dutu moioli mangale o bimaoaka mahuhuba.

⁵Kamamoi de o duba mangohaka gënanga kokiani nihi huba o kilo moi o gopuno ihi ganu de o zaitun maminya duru ma oa-oa o litere moi.

⁶Genanga doka o huhuba itö tuhu-tuhuku itotatapu mangale madodihiraka ihihuba o Sinai mal̄okuoka. Mabounu yasa nangi ma Jou Ai hininga.

⁷Kamamoi de o duba mangohaka gënanga kokiani ihi hubaö o litere moi o angguru mateongo ihitotuagi o huhuba mangï mal̄okuku.

⁸O duba mangale o bimaoaka mahuhuba kokiani ihihuba de madodagi imatero hokä o ngorumino mahuhuba, ihikutuono de o angguru mateongo. O huhuba itö tuhu-tuhuku gënanga mabounu yasanangi ma Jou Ai hininga.

⁹ O Sabat mawangeoka kokiani ihihuba o duba mangohaka ma nauru o dutu hinoto maumuru o taongo moi de koiwa naga manabo, o gopuno o kilo hinoto ihi ganu de o zaitun maminya mangale o huhuba ihi dodiaiuku deʼ o huhuba o angguru mateongo.

¹⁰O huhuba itö tuhu-tuhuku gënanga kokiani ihihuba o Sabat mawange ihi getongo hokä madogo o huhuba o wange ihi getongo ihikutuono de o huhuba o angguru mateongo.

¹¹O mede ihi getongo mamulaenge kokiani ihihuba ma Jouika o huhuba itö tuhu-tuhuku marupa o hapi manauru magö o dutu hinoto, o duba manauru o dutu moi, o duba mangohaka manauru o taongo moi, manabo koiwa moi-moi.

¹²Hokä o huhuba ihi dodiaiuku kokiani ihi huba o gopunu ihi ganuino o zaitun maminya; o kilo hange mangale o hapi manauru o dutu moi, o kilo hinoto o gopuno mangale o duba manauru o dutu moi,

¹³deʼ o kilo moi o gopuno mangale o duba manauru mangohaka o dutu moi. O huhuba itö tuhu-tuhuku gënanga marupa o huhuba o inomo, deʼ mabounu yasanangi ma Jou Ai hininga.

¹⁴Ihi kutuono de o huhuba itö tuhu-tuhuku gënanga kokiani ihihubaö o huhuba o angguru mateongo, ma amoko o litere hinoto mangale o hapi manauru yogetongo, o litere moi dema dobiki mangale o duba manauru, deʼ o litere moi mangale o duba mangohaka manauru o dutu yogetongo. Genanga doka madatoro mangale o huhuba itö tuhu-tuhuku kokiani ihihuba o wange moioka o mede ihi getongo o taongo magurutu.

¹⁵Hokä madogo o huhuba itö tuhu-tuhuku o wange ihi getongo de o huhuba ma angguru mateongo, kokiani ngini nihi hubaö o kabingi manauru o dutu moi mangale o baradoha ma apongo mahuhuba.

¹⁶ O wange ngimoi de iatoka o mede moioka, ganga o Paska mawange mangale ma Jou.

¹⁷ Itebinino, o wange ngimoi de motoaka, imulaenge o Roti i Ragi-ragi Ua ma Rameanga, deʼ o wange tumidino ngini yakunua nia ol̄omo o roti dema ragi-ragioka.

¹⁸Mawange madodihiraka marameanga gënanga ngini kokiani nidiai o doomu mangale nipuji, de yakunua nia diai o manarama ma dodubuho.

¹⁹Nihihuba ma Jouika o huhuba itö tuhu-tuhuku marupa o hapi manauru magö o dutu hinoto, o duba manauru o dutu moi, deʼ o duba manauru o dutu tumidi maumuru o taongo moi, moi-moi koiwa manabo.

²⁰Nihihuba o huhuba ihi dodiaiuku ihipö patu-patutu, marupa o gopuno ihi ganuino de o zaitun maminya: o kilo hange o gopuno mangale o hapi manauru o dutu moi, o kilo hinoto mangale o duba manauru,

²¹deʼ o kilo moi mangale o duba mangohaka manauru.

²²Nihihubaö o kabingi manauru o dutu moi mangale o baradoha ma apongo mahuhuba. Demadodagi gënanga ngini nia diai o kawaha manga baradoha magegehe maupacara.

²³Mata-mata o huhuba gënanga marupa madogo o huhuba itö tuhu-tuhuku biaha o ngorumino.

²⁴De madodagi genangö kokiani ngini nihihuba ma Jouika o o wange tumidino. O huhuba gënanga marupa madogo o huhuba itö tuhu-tuhuku o wange ihi getongo de o huhuba o angguru mateongo. O huhuba gënanga mabounu yasanangi ma Jou Ai hininga.

²⁵Mawange tumidoka ngini kokiani nia diai o doomu mangale nipuji deʼ yakunua nia diai o karajanga itotubuho.

²⁶ O Gugutuku ma Rameanga mawange madodihiraka, o wange ma amoko ipahaika o minggu tumidi, maöraha ngini nihihuba o gandum mahungi ma Jouika, ngini kokiani nia diai o doomu mangale nipuji, deʼ yakunua nia diai o karajanga itotubuho.

²⁷Nihihuba ma Jouika o huhuba itö tuhu-tuhuku marupa o hapi manauru o dutu hinoto, o duba manauru magö o dutu moi de o duba mangohaka manauru o dutu tumidi maumuru o taongo moi, moi-moi koiwa manabo. O huhuba itö tuhu-tuhuku gënanga mabounu yasanangi ma Jou Ai hininga.

²⁸Nihihuba o huhuba ihi dodiaiuku inihi patu-patutu, marupa o gopuno ihi ganuino o zaitun maminya: o kilo hange mangale o hapi manauru o dutu moi, o kilo hinoto mangale o duba manauru o dutu moi,

²⁹deʼ o kilo moi mangale o duba mangohaka o dutu moi.

³⁰Nihihubaö o kabingi manauru o dutu moi, mangale o baradoha ma apongo mahuhuba. De madodagi gënanga ngini nia diai o kawaha manga baradoha magegehe ma upacara.

³¹O huhuba-o huhuba gënanga ikali o angguru mahuhuba ma rupa madogo o huhuba itö tuhu-tuhuku o wange ihi getongo deʼ o huhuba ihi dodiaiuku.