Read Tobelo O BILANGAN 29 Bible Online

O BILANGAN 29 - Tobelo bible

O BILANGAN 29

¹O wange moioka o mede matumidoka ngini kokiani nia diai o doomu mangale nipuji, deʼ yakunua nia diai o karajanga mado dubuho. O wange gënanga o trompet-trompet kokiani nia wuwu.

²Nihihuba ma Jouika o huhuba itö tuhu-tuhuku marupa o hapi manauru magö o dutu moi, o duba manauru o dutu moi, deʼ o duba mangohaka manauru o dutu tumidi maumuru o taongo moi, moi-moi koiwa manabo. O huhuba gënanga mabounu ya sanangi ma Jou Ai hininga.

³Nihihubaö o huhuba ihi dodiaiuku inihi patu-patutua, ma rupa o gopuno ihi ganuino de o zaitun maminya: o kilo hange mangale o hapi manauru o dutu moi, o kilo hinoto mangale o duba manauru,

⁴deʼ o kilo hinoto mangale o duba mangohaka o dutu moi.

⁵Nihihubaö o kabingi manauru o dutu moi mangale o baradoha ma apongo mahuhuba. Deʼ madodagi gënanga ngini nia diaioka o kawaha manga baradoha magegehe ma upacara.

⁶O huhuba-huhuba gënanga marupa madogo o huhuba itö tuhu-tuhuku ihihö huba-huba ihiko moteke de o huhuba ihi dodiaiuku, o wange moioka o mede ma moioka. Inoli marupa madogo o huhuba itö tuhu-tuhuku o wange ihi getongo ihihö huba-huba ihiko moteke de o huhuba ihi dodiaiuku deʼ o huhuba o angguru mateongo. O huhuba itö tuhu-tuhuku gënanga mabounu yasanangi ma Jou Ai hininga.

⁷ O wange ngimoioka o mede matumidoka kokiani ngini ni diai o doomu mangale ni puji. O wange gënanga kokiani ngini ni puaha deʼ yakunua ni karajanga.

⁸Nihihuba ma Jouika o huhuba itö tuhu-tuhuku marupa o hapi manauru magö o dutu moi, o duba manauru o dutu moi de o duba ma ngohaka manauru o dutu tumidi maumuru o taongo moi, moi-moi koiwa manabo. O huhuba gënanga mabounu ma Jou Ai hininga yasanangi.

⁹Nihihubaö o huhuba ihidodiaiuku inihi patu-patutu, marupa o gopuno ihi ganuino de o zaitun maminya: o kilo hange mangale o hapi manauru, o kilo hinoto mangale o duba manauru,

¹⁰deʼ o kilo moi mangale o duba mangohaka o dutu moi.

¹¹Nihihuba o kabingi manauru o dutu moi mangale o kawaha manga baradoha ma apongo maupacara, mahomoa de o baradoha ma apongo mahuhuba deʼ o huhuba itö tuhu-tuhuku o wange ihi getongo de ikali o huhuba ihi dodiaiuku de o huhuba o angguru mateongo ihihö huba-huba o wange gënanga.

¹² O wange ngimoi de motoaka o mede matumidoka kokiani ngini nidiai o doomu mangale nipuji, deʼ yakunua nia diai o karajanga itotubuho. O wange tumidino kokiani ngini nia diai o rameanga ma ngale niwi horomati ma Jou.

¹³O wange madodihiraka nihihuba ma Jouika o huhuba itö tuhu-tuhuku marupa o hapi manauru magö o dutu ngimoi de hange, o duba manauru magö o dutu hinoto, deʼ o duba mangohaka manauru maumuru o taongo moi o dutu ngimoi de iata, moi-moi koiwa manabo. O huhuba gënanga mabounu yasanangi ma Jou Ai hininga.

¹⁴Nihihubaö o huhuba ihidodiaiuku inihi patu-patutu marupa o gopuno ihi ganuino o zaitun maminya: o kilo hange o hapi manauru o dutu moi, o kilo hinoto mangale o duba manauru o dutu moi,

¹⁵deʼ o kilo moi mangale o duba mangohaka o dutu moi. Ihiko moteke de o huhuba ihidodiaiuku gënanga kokiani ihihubaö o huhuba o angguru mateongo ipoparalu.

¹⁶Mahomoa de gënanga nihihubali o kabingi manauru o dutu moi mangale o baradoha ma apongo mahuhuba. O huhuba gënanga marupa madogo o huhuba itö tuhu-tuhuku o wange ihi getongo deʼ ikali o huhuba ihidodiaiuku deʼ o huhuba o angguru mateongo.

¹⁷O wange mahinotoka nihihuba o hapi manauru magö o dutu ngimoi de hinoto, o duba manauru o dutu hinoto, deʼ o duba mangohaka manauru o dutu ngimoi de iata maumuru o taongo moi, moi-moi ko iwa manabo.

¹⁸Nihihuba nihiko moteke de gënanga mata-mata o huhuba mahomoa hokä ipoparalu o wange madodihiraka.

²⁰O wange mahangeoka nihihuba o hapi manauru magö o dutu ngimoi de moi, o duba manauru o dutu hinoto, deʼ o duba ma ngohaka manauru maumuru o taongo moi o dutu ngimoi de iata, moi-moi manabo koiwa.

²¹Nihihuba nihiko moteke de gënanga mata-mata o huhuba-o huhuba mahomoa hokä ipoparalu mangale o wange madodihiraka.

²³O wange maiatoka nihihuba o hapi manauru magö o dutu ngimoi, o duba manauru o dutu hinoto, deʼ o duba mangohaka ma nauru o dutu ngimoi de iata ma umuru o taongo moi, moi-moi ma nabo koiwa.

²⁴Nihiko moteke de gënanga nihihubaö mata-mata o huhuba o huhuba mahomoa hokä ipoparalu o wange madodihiraka.

²⁶O wange mamotoaka nihihuba o hapi manauru magö o dutu hiwo, o duba manauru o dutu hinoto, deʼ o duba mangohaka manauru o dutu ngimoi de iata maumuru o taongo moi, moi-moi koiwa manabo.

²⁷Nihiko moteke de gënanga nihihuba o mata-mata o huhuba mahomoa hokä ipoparalu o wange madodihiraka.

²⁹O wange mabutangaka nihihuba o hapi manauru magö o dutu tufange, o duba manauru o dutu hinoto, o duba mangohaka manauru o dutu ngimoi de iata maumuru o taongo moi, moi-moi koiwa manabo.

³⁰Nihiko moteke de gënanga nihihubaö mata-mata o huhuba mahomoa hokä ipoparalu o wange madodihiraka.

³²O wange matumidoka nihihuba o hapi manauru magö o dutu tumidi, o duba manauru o dutu hinoto, o duba mangohaka manauru o dutu ngimoi de iata maumuru o taongo moi, moi-moi manabo koiwa.

³³Nihiko moteke de gënanga nihihubaö mata-mata o huhuba mahomoa hokä ipoparalu o wange madodihiraka.

³⁵O wange matufangeoka kokiani ngini nia diai o doomu mangale nipuji deʼ yakunua nia diai o karajanga itotubuho.

³⁶Nihihuba ma Jouika o huhuba itö tuhu-tuhuku marupa o hapi manauru magö o dutu moi, o duba manauru o dutu moi, deʼ o duba mangohaka manauru o dutu tumidi maumuru o taongo moi, moi-moi koiwa manabo. O huhuba gënanga mabounu yasanangi ma Jou Ai hininga.

³⁷Nihiko moteke de gënanga nihihubaö mata-mata o huhuba mahomoa hokä ipoparalu o wange madodihiraka.

³⁹Genanga doka o datoro-o datoro mangale o huhuba itö tuhu-tuhuku, o huhuba ihidodiaiuku, o huhuba o angguru mateongo, ikali o dame mahuhuba kokiani ngini nihihuba ma Jouika nia rameanga-rameangoka ihitö tantantuoka. O huhuba-o huhuba gënanga marupa ma dogo o huhuba-o huhuba ngini nihi huba-huba mangale nia fangu nia jaji ekola o huhuba de o hininga mahuka.

⁴⁰O Musa wohiädono o Israel manyawaika hagala moi-moi ma Jou wohipopareta unangika.