Read Tobelo O BILANGAN 3 Bible Online

O BILANGAN 3 - Tobelo bible

O BILANGAN 3

¹Nenanga o Harun deʼ o Musa manga tau madol̄a maöraha ma Jou wï temo-temo o Musaika o Sinai mal̄okuoka.

² O Harun aingohaka o nauru yaruata: woria-riaka o Nadab, de ipaha o Abihu, o Eleazar deʼ o Itamar.

³O nanga yatabis yodadi o imam de ma upacara o minya yahituagi manga häekuku.

⁴ Mä o Nadab deʼ o Abihu yohonenge o Sinai matonaka ikoka-kahaoka, maöraha önanga iwï himanga ma Jou de o uku ihohala-liua. Onanga yahinoto manga ngohaka koiwa. Hoʼ o Harun kawoma ngango ikahi, o Eleazar deʼ o Itamar yomanarama hokä o imam.

⁵Ma Jou witemo o Musaika,

⁶”Nä huloko o Lewi aihoana yoboa ini himanga, deʼ nätumutu önanga yodadi iwï loleleani o Harun.

⁷Onanga yomanarama ahi Tauoka deʼ kokiani yaleleani o imam-imam inoli yongodumu o kawaha de toönanga manga manarama Ahi Tauoka gënanga.

⁸Toönanga manga manarama enagënanga ihi dailako yatatoro o pakakaha Ahi Tauoka gënanga hokä o Israel manyawa manga-dagali.

⁹O Israel manyawaika, duga-duga o Lewi ai hoana Tahi manarama yodadi yololeleani yototagaliua mangale o Harun deʼ aidifauku.

¹⁰Mä o Harun deʼ aingoha-ngohaka kokiani nä goraka mangale ihi dagi o manarama hokä o imam mahomoa de önanga, onagona dika ihitaili yadiai o manarama gënanga kokiani yä hukumu yahohonenge.”

¹¹Ma Jou witemo o Musaika,

¹² ”O öraha nënanga o Lewi manyawa Ta iriki yodadi Tongohi madutu. Maöraha Ngohi tatoma mata-mata o Mesir ma nyawa manga ngohaka o riaka, Tomä dingakoka mangale Ngohi o Israel manyawa manga ngohaka o nauru mariaka deʼ mata-mata manga aiwani o gigini mangohaka madodi hiraka ma ayo ihi ngohaka. Mata-mata gënanga Tongohi madutu. Hokä o Israeloka manga ngohaka o nauru mariaka madagali, Ngohi tal̄e o Lewi manyawa mangale Ngohi; önanga aha yodadi ka Tongohi. Ngohi ma Jou.”

¹³

¹⁴O Sinai matonaka ikokakahaoka ma Jou wihuloko o Musa

¹⁵wodiai o Lewi manyawa wahi tulihi imoteke manga hoana deʼ manga tau madol̄a moi-moi; o ngohaka o nauru manga umuru o mede moi deʼ ihi kail̄e kokiani ihi tulihi manga romanga.

¹⁶De o Musa wadiai ma Jou Ai pareta gënanga.

¹⁷O Lewi aingohaka yaruange: Gerson, o Kehat deʼ o Merari. Onanga ganga manga hoana manga ete deʼ manga tohora yä hetongo imoteke toönanga manga romanga. O Gerson aingohaka o nauru yahinoto: o Libni deʼ o Simei. O Kehat aingohaka o nauru yaruata: o Amram, o Yishar, o Hebron deʼ o Uziel. O Merari ai ngohaka o nauru yahinoto: o Mahli deʼ o Musi. Onanga gënanga manga tau madol̄a manga ete deʼ manga tohora yä hetongo imamo teke toönanga manga romanga.

¹⁸

¹⁹

²⁰

²¹O Gerson aihoana idadi deʼ o Libni ai tau madol̄a deʼ o Simei ai tau madol̄a.

²²O Gerson aihoana o nau-nauru manga umuru o mede moi deʼ ihikail̄e ihi tulihi manga ngöe yä 7.500.

²³O Elyasaf o Lael aingohaka wahi haëke o hoana gënanga. O Israel manga tau madoomu magoronaka, o hoana gënanga imal̄e manga ngï o wange madumuniha idaduoka ma Jou Ai Tau maporetoko.

²⁴

²⁵Ihi dailako yatatoro ma Jou Ai Tau, önanga imahi tagongo yogoana o Tau deʼ mangorana madadamunu yongoha-ngohama mangöere madadatoko,

²⁶malöa mahidete yakilolitino o Tau deʼ mahuhuba mangï, deʼ malöa gënanga mangöere madadatoko. Onanga imahi tagongo ihi dailako hagala o manarama ima dohanga gënanga.

²⁷O Kehat ai hoana deʼ manga tau madol̄a o Amram, o Yiskar, o Hebron deʼ o Uziel.

²⁸O nau-nauru manga umuru o mede moi deʼ ihi kail̄e o hoanino gënanga manga ngöe o nyawa ya 8.600. Onanga manga manarama ihi dailako yatatoro o bara-baranga ma Jou Ai Tauoka.

²⁹O Elisafan o Uziel aingohaka wahi haëke o hoana gënanga. Manga tau madoomu magoronaka, o hoana gënanga imal̄e manga ngï ma Jou Ai Tau o koreharail̄e idaduoka.

³⁰

³¹Onanga imahi tagongo yögoana o Jaji ma Peti, o meja, o hilo mal̄ou, o huhuba mangï, hagala o pakakaha yapö pake-pake o imam-imam manga Ngï i Tebi-tebinoka, deʼ o guba ihi tinga-tingaka o Ngï i Tebi-tebini. Onanga imahi tagongo yö goana hagala o manarama ima dohanga deʼ o bara-baranga gënanga.

³²O Lewi aihoana manga häeke ganga o Eleazar, o Harun aingohaka. Unanga wagoana hagala o nyawa yomomanarama o Kamari iTebi-tebini.

³³O Merari aihoana deʼ manga tau madol̄a o Mahli deʼ o Musi.

³⁴O nau-nauru manga umuru o mede moi deʼ ihikail̄e o hoanino gënanga mata-mata manga ngöe o nyawa yä 6.200.

³⁵O Zuriel o Abihail aingohaka wahi haëke o hoana gënanga. Manga tau madoomu magoronaka, o hoana gënanga imal̄e manga ngï ma Jou Ai Tau o koremieuku idaduoka.

³⁶Onanga imahi tagongo yögoana o Tau gënanga malitoraka, mabala-balaki, maliate, mahohol̄e, deʼ mata-mata mapakakaha inoli hagala o manarama ima dohanga deʼ o bara-baranga gënanga.

³⁷Ikali malöa maporetino maliate, mahohol̄e deʼ ma gumi-gumini.

³⁸O tau madoomu magoronaka, o Musa deʼ o Harun manga ngoha-ngohaka kokiani imal̄e manga ngï ma Jou Ai Tau mahimangoka, o wange mahiwaroko idaduoka. Onanga imahi tagongo o puji ma upacara mangale o Israel manyawa o Ngï i Tebi-tebinoka. Mahomoa deʼ önanga, onagona dika yataili yadiai o manarama gënanga kokiani yähukumu yahohonenge.

³⁹Mata-mata nau-nauru o Lewi ai hoanino manga umuru o mede moi de ihikail̄e o Musa wahitö tuli-tulihi imoteke manga hoana moi-moi deʼ ma Jou Ai pareta, yongodumu manga ngöe onyawa yä 22.000.

⁴⁰Ma Jou witemo o Musaika, ”Mata-mata o Israeloka manga ngohaka o nauru mariaka ganga Tongohi. Nohitulihi toönanga manga roma-romanga manga umuru o mede moi deʼ ihikail̄e. Mä hokä toönanga manga dagali, Ngohi tohi nyata o Lewi manyawa mata-mata yodadi Tongohi madutu. Ngohi ma Jou! Deʼ o Lewi manyawa manga giginimahi dogoronaka madodihiraka ma ayo ingohaka.”

⁴¹

⁴²O Musa wadiai okia wihi popareta ma Jou: ünanga wahi tulihi mata-mata o ngohaka o nauru o riaka

⁴³manga umuru o mede moi deʼ ihikail̄e. Mata-mata önanga manga ngöe o nyawa yä 22.273.

⁴⁴Daha ma Jou witemo o Musaika,

⁴⁵”Nä tingaka o Lewi manyawa mangale Ngohi hokä manga dagali mata-mata o Israeloka manga ngohaka o nauru o riaka; o Lewi manyawa manga gigini hokä o Israeloka manga gigini ma dagali.

⁴⁶Karana o Israeloka manga ngoha-ngohaka o nauru o riaka yä 273 iholoi yowöe deʼ o Lewi manyawa, ho, maboloi gënanga kokiani ngini nia tuhuhu.

⁴⁷Mangale o ngohaka ima tengo, ngini kokiani nifangu o tiwi haaka motoa imoteke maija yapake-pake Ahi Tauoka;

⁴⁸o tiwi gënanga ihi döaka o Harunika deʼ ai ngoha-ngohakika.”

⁴⁹O Musa wadiai ma Jou Ai pareta gënanga.

⁵⁰Unanga wa l̄e o tiwi o haaka o 1.365,

⁵¹deʼ wohi döaka o Harunika deʼ ai ngoha-ngohakika.