Read Tobelo O BILANGAN 33 Bible Online

O BILANGAN 33 - Tobelo bible

O BILANGAN 33

¹O Israel manyawa yamal̄a o Mesir de ipahaika, o duduono magoronaka imoteke moi-moi manga hoana o Musa deʼ o Harun manga tutuda matimiuku, önanga yodulu o ngï muruono naga.

²Ma Jou wihipareta o Musa mangale wohitulihi moi-moi o ngï maromanga kiaka naga önanga yodulu.

³O Israel manyawa yamal̄a o Mesir mawange ngimoi de motoaka mamede moioka, o wange moi ipahaika o Paskah madodihiraka. Ma Jou Ai gogoana matimiuku önanga yamal̄a o Ramses ma kota, o Mesir manyawa yahakihi,

⁴manga gogiria yälungunu toönanga manga ngoha-ngohaka o riaka ma Jou wätoma-tomaka. De o manarama gënanga, ma Jou wohi nyata igoungu Unanga iholoi wokuata de o Mesir manga giki-gikiri.

⁵O Israel manyawa yamal̄a o Ramses ma kota de ipaha önanga imä tau o Sukotoka.

⁶Daha önanga imajoboli deʼ imä tau o Etamoka, o tonaka ikokakaha madatekoka.

⁷Genangokadau de önanga imakilioro o Pi-Hahirotika, o Baal-Zefon o wange mahiwaroko, daha imä tau imahi tigi-tigika o Migdolika.

⁸De ipaha önanga yamal̄a o Pi-Hahirot, yatobongo o ngöto deʼ yowohama o Etam matonaka ikokakahaika. Ipahaika o wange hange manga dodagi, önanga imä tau o Mara madaeraka.

⁹Genangokadau de önanga yogila-gila deʼ imä tau o Elim madaeraoka, genangokadau naga o akere malako o gahumu ngimoi de hinoto, deʼ o korma magota mautu moritumidi.

¹⁰De ipaha önanga yamal̄a o Elim deʼ imä tau imahi tigi-tigi ka o Suez ma Jikoika.

¹¹De ikali önanga imä tau o Sin matonaka ikokakahaka, daha imahi tigi-tigika o Doftaika, deʼ ipaha gënanga o Alus madaeraka, deʼ ipaha o Rafidim madaeraka, mä genangokadau koiwa o akere yaoke-okere.

¹⁵O Rafidim madaeraka önanga yogila-gila o Hor mal̄okuika deʼ imä tau o ngï-o ngï nënanga: o Sinai matonaka ikokakahaka o Kibrot-Taawa, ”O Kal̄il̄u maJere”, o Hazerot, o Risma, o Rimon-Peres, o Libna, o Risa, o Kehelata, o Syafer mal̄oku, o Harada, o Makhelot, o Tahat, o Tarah, o Mitka, o Haamona, o Moserot, o Bene-Yaakan, o Hor-Gidgad, o Yotbata, o Abrona, o Ezion-Geber, o Zin matonaka ikokakaha, deʼ o Hor mal̄oku, o Edom matonaka mabatingoka.

³⁸ De ma Jou Ai pareta, ma Imam Harun wodöa o Hor mal̄okuil̄e. Genangokadau ünanga wohonenge mawange moioka ma mede motoaka o taongo mamoruatoka o Israel manyawa yamal̄a o Mesir ipahaika. Maöraha o Harun wohonenge ai umuru o taongo o ratuhu moi de monaoko de hange.

⁴⁰ Itai-taitino gënanga o Arad maberera makoano, o Kanaan o Koreharail̄e idaduoka, yoihene o abari o Israel manyawa manga gogiria yodumutu manga berera.

⁴¹O Hor mal̄okuoka de o Moab matonaka irata-rataika o dodagi magoronaka, o Israel manyawa imä tau o ngï-o ngï nënanga: o Zalmona, o Funon, o Bot, o Abarim magiliangoka o Moab madaeraka, o Dibon-Gad, o Almon-Diblataim, o Abarim mal̄oku imahi tigi-tigika o Nebo mal̄okuika, deʼ o Moab matonaka irata-rataika o Yordan ma Ngairi madatekoka, imahi tigi-tigika de o Yerikho makota, o Bet-Yesimot deʼ o Sisim ma Wai mahidogorona.

⁵⁰O Moab matonaka irata-rataka gënanga, o Yordan ma Ngairi madatekoka, imahi tigi-tigika o Yerikho makotaika, ma Jou wohi döaka o Musaika

⁵¹o pareta-o pareta nënanga mangale o Israel manyawa, ”Nako ngini nia tobongo o Yordan ma Ngairi mangale niwohama o Kanaan matonaka,

⁵²kokiani ngini niä duhu yongodumu o berera madutu gënanga. Nia binaha mata-mata toönanga manga gomanga o helewo deʼ o gurasi ikali toönanga manga pupuji mangï.

⁵³O tonaka gënanga kokiani ngini nia ora deʼ ngini niö gogere, karana Ngohi tinihi döaka nginika.

⁵⁴ De ipaha kokiani ngini nima hikodoku idadi nia aha-ahaluku manga puhaka de mangekomo niundi. Manga ahali iago-agomika kokiani ngini nia hidöaka manga hidoku ilamoko, deʼ manga ahali mahohumujuru manga hidoku mahuhutulu.

⁵⁵Mä nako o berera madutu gënanga ngini niä duhuua, o nyawa kahirahi yogogere genangokadau aha o huha inï diai hokä o dowongi nia lakoka ekola o hihika nia l̄ouoka. Dahaö önanga inï parangi ngini.

⁵⁶Nako ngini nia duhuua önanga, aha Ngohi tinibinaha ngini hokä Tatä tatoroka onangika.”