Read Tobelo O BILANGAN 4 Bible Online

O BILANGAN 4 - Tobelo bible

O BILANGAN 4

¹Ma Jou wähuloko o Musa deʼ o Harun

²yä sensus o Lewi manyawa o Kehat ai hoanino imoteke moi-moi manga tau madol̄a.

³Deʼ yahitulihi mata-mata o nau-nauru manga umuru o taongo moruange hiädono o taongo moritoa, yaku-akunu yadiai o manarama yahi patu-patutoka ma Jou Ai Tauoka.

⁴Toönanga manga manarama ganga ihi dailako yatatoro o bara-baranga duru itö tebi-tebini.

⁵Ma Jou wohi döaka o Musaika o datoro nënanga: Nako ma orahoka o tau madoomu yakilianga o Harun deʼ aingoha-ngohaka kokiani yowohama ma Jou Ai Tauika, ihi guti o guba mangöere o Jaji ma Peti mahimangoka, deʼ ihi tamunu o Peti de o ngöere gënanga.

⁶De iböto, önanga kokiani ihi tamunoli de o aiwani makai ma aluhu, deʼ ihi hoheika o ngöere mabihi-bihi o dobiki moi mal̄okuino, deʼ ihi noa o Peti gënanga ma dodowiti magota.

⁷Onanga kokiani ihi hoheika o ngöere mabihi-bihi o dobiki moi o meja o roti ihi dodiaiuku mangale ma Jou mangï mal̄okuoka deʼ o meja gënanga mal̄okuoka kokiani önanga yakelengauku o dodai ma amo-amoko, o baki o dupa mangï, o baki ihihö huba-huba mangï, deʼ o kendi mangale o angguru ma akere ihihö huba-huba. O roti ihi dodiaiuku kokiani salalu naga o mejaka gënanga.

⁸Onanga kokiani yatamunu mata-mata gënanga deʼ o ngöere ma doka-dokara o dobiki moi, daha ihi hoheika mal̄okuino o aiwani makai ma aluhu, deʼ ihi noaika madodowiti magota.

⁹Onanga kokiani yal̄e o ngöere mabihi-bihi o dobiki moi deʼ ihitamunu o hilo mal̄ou inoli mata-mata mahilo, mapakakaha mangale yatebini mahilo mahubu deʼ madudumungu, deʼ mata-mata o zaitun maminya mangï.

¹⁰O hilo mal̄ou deʼ ingodumu mapakakaha kokiani önanga yahawo deʼ o aiwani makai ma aluhu o dobiki moi deʼ yakelengauku madodowiti mal̄okuoka.

¹¹Genanga deʼ ibötoönanga kokiani ihi hohe o ngöere ma bihi-bihi o dobiki moi o huhuba mangï o gurasi gënanga mal̄okuoka, deʼ ihi tamunuku deʼ o aiwani makai ma aluhu o dobiki moi, deʼ ihi noaoko o huhuba mangï gënanga madodowiti magota.

¹²Hagala o pakakaha yapö pake-pake o Ngï i Tebi-tebini magoronaka kokiani önanga yal̄e deʼ yahawo deʼ o ngöere ma bihi-bihi o dobiki moi. Daha önanga kokiani ihi tamunu deʼ o aiwani makai ma aluhu o dobiki moi, deʼ yakelengauku o dodowiti mal̄okuoka.

¹³Onanga kokiani yatebini makafo o huhuba mangï gënanga, daha ihi hoheika mal̄okuoka o ngöere ma ungu-ungu o dobiki moi.

¹⁴Deʼ mal̄ouoka gënanga kokiani önanga yakelengauku mata-mata o pakakaha yapö pake-pake o pupuji magoronaka o huhuba mangïoka gënanga: o uku mangï, o garupu, o huhugara, deʼ o mangko. Daha önanga kokiani ihi tamunuku mata-mata gënanga o aiwani makai ma aluhu deʼ ihi noaoko madodowiti magota.

¹⁵Ma Jou wätemo o Musa deʼ o Harunika, ”Maöraha ngini nia kilianga o tau madoomu, o Harun deʼ aingoha-ngohaka ko kiani yowohama Ahi Tau magoronaika deʼ yatamunu mata-mata o baranga deʼ o pakakaha naga genangokadau. Genanga deʼ iböto, o Kehat manyawa yakunu yoboa la yamoku. Mä önanga yakunua, imahi tigika yolega ekola yapake o bara-baranga gënanga, ka-rana yatingakoka mangale Ngohi. Nako önanga kayadiai, önanga aha yohonenge. Hoʼ hupaya o Kehat manyawa uha yaehe o Lewi ai hoanoka, o Harun deʼ aingoha-ngohaka kokiani moi-moi nia himana rama toönanga manga hidogoronaka okia kokiani önanga yao. Genanga doka o Kehat manyawa manga manarama maöraha Ahi Tau nia tagali mangï. O Eleazar o Harun aingohaka womahi tagongo ingodumu Ahi Tau, o hilo maminya, o dupa, o huhuba o gandum mangale okianaga ihi dodiai ukuoka, o upacara maminya, deʼ mata-mata naga Ahi Tau magoronaka gënanga.”

²¹Ma Jou wihuloko o Musa wä sensus o Lewi manyawa o Gerson ai ahalino imoteke moi-moi manga tau madol̄a.

²³O Musa kokiani wohi tulihi manga romanga mata-mata o nau-nauru manga umuru o taongo moruange hiädono o taongo moritoa yaku-akunu yadiai o manarama yahi patu-patutoka ma Jou ai Tauoka.

²⁴Onanga yahimanarama yagoraka o bara-baranga gënanga:

²⁵O tau gënanga matenda mangöere de madadamunu madol̄aino de maporetino deʼ o aiwani makai ma aluhu, o Tau mangorana ma-dadatoko mangöere,

²⁶mahidete deʼ magumi-gumini mangale malöa o Tau deʼ o huhuba mangï magilolitino, malöa mangorana ma amoko ma dadatoko mangöere, mata-mata mapakakaha yapö pake-pake mangale ihi pake mata-mata o baranga gënanga. Onanga imahi tagongo mata-mata o manarama ima dohanga de o bara-baranga gënanga.

²⁷O Musa deʼ o Harun kokiani yogoana hupaya o manarama o Harun deʼ aingoha-ngohaka ihi döa-döaka o Gerson manyawaika genanga yadiai, deʼ mata-mata o baranga kokiani itoraka hupaya yatoraka.

²⁸Genanga doka o Gerson manyawa manga manarama o Tau magoronaka; o manarama-manarama gënanga kokiani idiai o Itamar ma Imam o Harun aingohaka, ai tutuda matimioka.

²⁹Ma Jou wihuloko o Musa wä sensus o Lewi manyawa o Merari ai ahalino imoteke moi-moi manga tau madol̄a.

³⁰O Musa kokiani wohi tulihi manga romanga mata-mata o nau-nauru manga umuru o taongo moruange hiädono o taongo moritoa yaku-yakunu yadiai o manarama yahi patu-patutoka ma Jou ai Tau oka.

³¹Onanga yahi manarama mangale yagoraka o Tau gënanga ma litoraka, mabala-balaki, maliate deʼ mahohol̄e.

³²O Tau gënanga magilolitino malöa maliate de inoli ma hohol̄e, mabebeloho deʼ magumi-gumini deʼ hagala mapakakaha ipö paralu mangale ihi goko. O nyawa moi-o nyawa moi yahi manarama yao o bara-baranga ihitö tantantu.

³³Genanga doka o Merari ai ahaluku manga manarama; mata-mata toönanga manga manarama ma Jou Ai Tauoka kokiani yadiai o Itamar ma Imam Harun aingohaka, ai tutuda matimiuku.

³⁴Ima moteke de ma Jou Ai pareta, o Musa, deʼ o kawaha manga tutuda yodiai o sensus o ahali hangeino o Lewi ai hoana magoronaka, enagënanga o Kehat, o Gerson deʼ o Merari. Onanga yodiai o sensus gënanga manga tau madol̄a yatengo-tengo. Onanga yahi tulihi manga romanga mata-mata o nau-nauru manga umuru o taongo moruange hiädono o taongo moritoa yaku-akunu ya diai o manarama yahi patu-patutoka ma Jou Ai Tauoka. Nenanga doka mahasili: [Ai ahali] — [Manga ngöe] O Kehat — 2.750 O Gerson — 2.630 o Merari — 3.200 Mata-mata manga ngöe: — 8.580

⁴⁹De ma Jou Ai pareta o Musaika, o nyawa moi-nyawa moi yahi tulihi deʼ yahi tagongo moi-moi okia kokiani yaleleani ekola okia kokiani yamoku.