Read Tobelo O BILANGAN 8 Bible Online

O BILANGAN 8 - Tobelo bible

O BILANGAN 8

¹ Ma Jou witemo o Musaika, ”Nahetongo o Harunika maöraha ünanga wohidiai mahilo tumidi mahilo gënanga mal̄okuoka, ünanga kokiani wohidiai hoko gënanga marupa hiädono yatararono mahilo gënanga mal̄ou mahimangoka.”

³O Harun wadiai okia ma Jou wohi popareta. Unanga wohidiai o hilo-o hilo gënanga yohimangika o hilo mal̄ou mahimangoka.

⁴O hilo mangï gënanga, hiädono mal̄okuino deʼ mabunga-bunga maporomu ihidiai de o gurasi yatutukoka, imoteke ma conto ma Jou wohi mato-matoko o Musaika.

⁵Ma Jou wïtemo o Musaika,

⁶”Nahitingaka o Lewi manyawa de o Israel manyawa mahomoa deʼ nadiai o debini ma upacara ma-ngale önanga de madodagi nënanga

⁷nadohurero önanga de o akere mangale o debini ma upacara deʼ nähuloko yakori manga röehe mata-mataika deʼ yafoka toönanga manga pakeanga. De hoko gënanga önanga yotebini.

⁸Daha nä huloko önanga yal̄e o hapi manauru magö o dutu moi de o huhuba ihi dodiaiuku de o gopuno ihi ganu o minya. Daha ngona kokiani nal̄e o hapi manauru mahomoa o dutu moi mangale o baradoha ma apongo mahuhuba.

⁹De ipaha nätoomu yongodumu o Israel manyawa deʼ nä huloko o Lewi manyawa ima okoino Ahi Tau mahimangoka.

¹⁰O kawaha kokiani yogelenga toönanga manga giama o Lewi manyawa manga mumukuku,

¹¹deʼ o Harun kokiani wahi huba o Lewi manyawa gënanga hokä o huhuba yatinga-tingakoka Ngohino, o Israel manyawaika, hupaya önanga yakunu yadiai Ahi pupuji.

¹²Daha o Lewi manyawa kokiani yogelenga toönanga manga giama o hapi manauru o dutu hinotö gënanga mahäekuku; o dutu moi kokiani ihihuba mangale o baradoha ma apongo mahuhuba, deʼ o dutu moioli mangale o huhuba yatö tuhu-tuhuku de o upacara gënanga o Lewi manyawa yahitebini.

¹³Nä tingaka o Lewi manyawa mangale Ngohi deʼ nähuloko önanga yä leleani o Harun deʼ aingoha-ngohaka.

¹⁴De o upacara gënanga ngini nia hitingaka o Lewi manyawa de o Israel manyawa mahomoa hupaya yodadi Tongohi.

¹⁵Ngona nadiai o upacara o Lewi manyawa gënanga imahi döaka de ibötoönanga manga haku mangale yomanarama ahi Tau magoronaka.

¹⁶Ngohi tahidadioka önanga mata-mata o Israeloka manga ngohaka o Nauru mariaka manga dagali; hoʼ önanga ganga itingakika mangale Ngohi.

¹⁷ Maöraha Ngohi tä toma mata-mata o ngohaka o nauru o riaka o Mesir maberera, o ngohaka o nauru o riaka o Israeloka manga tau madol̄a yogetongo deʼ moi-moi o aiwani ma ayo madodi hiraka ingohaka idadioka Tongohi tomä dinga-dingakoka.

¹⁸O öraha nënanga hokä mata-mata o Israeloka manga ngohaka o riaka manga dagali, Täl̄ë o Lewi manyawa,

¹⁹deʼ o Lewi manyawa gënanga Tahi döakoka o Harun de aingoha-ngohakika, hupaya yakunu yomanarama mangale o Israel ma nyawa Ahi Tau magoronaka. Inoli hupaya önanga yogahoko Ahi apongo mangale o Israel manyawa hupaya o Israel manyawa gënanga ya tapal̄ua o bodito nako önanga yoboa itigika holi o ngï itebi-tebinika gënanga.”

²⁰Mangale karana gënanga o Musa, o Harun deʼ o Israel manyawa yongodumu yahihuba o Lewi manyawa ma Jouika, hokä ma Jou wohipareta o Musaika.

²¹O Lewi manyawa gënanga yadiai manga diri madebini ma upacara deʼ yafoka toönanga manga pakeanga, de o Harun wahi huba önanga hokä o ngongike itinga-tingakoka ma Jouika. Unanga wadiaiö o debini ma upacara mangale önanga.

²²O Israel manyawa yadiai hagala wohi popareta ma Jou o Musaika yakorona o Lewi manyawa. De hoko gënanga o Lewi manyawa yamake o haku mangale yomanarama ma Jou Ai Tau magoronaka o Harun de aingoha-ngohaka manga tutuda matimiuku.

²³Ma Jou wïtemo o Musaika,

²⁴”Moi-moi o Lewi manyawa manga umuru o taongo monaoko de motoa de ihika il̄e, kokiani yadiai o manarama Ahi Tau ma goronaka,

²⁵deʼ manga umuru o taongo moritoa önanga yahibebasi manga manaramoka.

²⁶Genanga de ibötoönanga yakunu yäriwo o Lewi manyawa mahomoa yomomanarama Ahi Tau magoronaka, mä önanga yakunokaua de manga manarama itatapu. Hoko gënanga madodagi itatoro o Lewi manyawa manga manarama.”