Read Tobelo O MIKHA 3 Bible Online

O MIKHA 3 - Tobelo bible

O MIKHA 3

¹Ni ihene, hei ngini nia kokuaha o Israel! Kokiani ngini nihi öriki okia i adi-adili,

²mä ngini koaholi nio dohata o oa-oa, deʼ ni sanangi i totorou, Ahi höana de ahi berera ngini nia helenga manga kai nia hingangoika, deʼ ngini nia kakihi manga akeme hagala manga kobongoka.

³Ngini niä ol̄omo ahi höana de Ahi berera. Manga kai ngini nia ka kakihi deʼ manga kobo-kobongo ngini nia wedere. Ngini niä lui-luiti önanga hokä nia luiti o hiode ma akeme mangale nio noa o bohoko ma goronauku.

⁴Aha iboa maöraha ngini ni pöaka nigahoko o roriwo ma Jouika, ma Unanga woluku winï baluhu. Unanga aha woihenua hagala nia niata, karana ngini ni diaioka i totorou.

⁵Ahi höana de ahi berera ya tipu, mangale o nabi-nabi ihi dodemo ma oa-oa o nyawa yahi doa-doakika o tiwi, mayä haturu deʼ yahaduliikaua o nyawa ihi döa-döaka. Hagala o nabiika hoko gënanga, ma Jou wotemo,

⁶”Hei nabi, nia öraha yadonoka imata; nia wange magogiria itumunu. Ngini aha nia makeokauaoli o lolega ihi nyö nyata-nyata hagala Ahi datoro. Ngini aha niakunokauaoli nihi dodemo okianaga.”

⁷Hagala o nyawa ihi dö dododemo o wange mahimangika aha yamake o mal̄eke karana manga hidodemo ihowono. Onanga mata-mata yamal̄eke karana ma Jou Madutu wa baluhua önanga.

⁸Mä ya korona ahi diri nënanga, ma Jou wohi dol̄aka ngohi de Ai womaha deʼ Ai kuaha. Ngohi wo hi hidöaka o mangarati mangale o adili, deʼ o barani ö mangale tohi nyata o Israel manyawaika hagala o baradoha önanga yadodiai.

⁹Ni ihene hagala ahi demo-demo nënanga, hei ngini niä kokuaha o Israel nio doha-dohata o adili deʼ nia totakaiduli o diai.

¹⁰Ngini nihi goko o Yerusalem, ma Jou Madutu Ai kota, nihi hol̄e deʼ o doma deʼ koi adilua.

¹¹O kota yokokuaha yo pareta mangale yamake o uru bokumu matiwi, o imam-imam yodotoko ma Jou Ai tita mangale o gaji, deʼ o nabi-nabi yogahoko o hidumutu ma Jou Madutuino, mangale yamake o tiwi — daha önanga mata-mata yatobote ma Jou onangino wahiboa. Onanga yo temo, ”Ma Jou naga tongone nanga hi dö dogoronaka; ngone aha ina tapaluua o bodito.”

¹² Karana nia dorou gënanga o Sion aha yapajeko hokä o dumule, o Yerusalem aha idadi magogilianga madoporono, deʼ ma Jou ai Tau ma doporono aha idadi o hongana i rubu-rubu.