Read Tobelo O MIKHA 4 Bible Online

O MIKHA 4 - Tobelo bible

O MIKHA 4

¹Hagala o wange ibö boa-boa o doporono, ma Jou Ai Tau mangï aha ioko itiaiil̄e deʼ ituboil̄e ikurutil̄e yatilakuru hagala ol̄oku deʼ hagala o doporono. Hagala o höana deʼ o berera yotuo-tuono dokengika

²önanga mata-mata aha yotemo, ”Niaino ngone hodoa ma Jou Ai doporonil̄e o Israel manga Jou Madutu Ai Tauil̄e! Unanga aha wo na dotoko ngoneino okia kokiani ngone hadiai. Ngone aha haniki Ai ngekomo hababu ma Jou Ai dodotoko iboa o Yerusalemino; o Sion ino Unanga wätemo Ai umatika.”

³ Ma Jou aha waputuhu manga parkara o hoana deʼ o berera ma ago-agomo manga hidogoronaka hagala o negara ma kua-kuata mahidogoronaka, magogurutika yaoa ma digi-digino. Onanga aha ima dutuku hagala toönanga manga dia idadi o pajeko deʼ hagala toönanga manga kuama idadi o gakana ihipopoporo. Hagala o höana deʼ o berera ma ago-agomo ima teke parangiokauaoli, ima hidiaiokauaoli yomau yoparangi.

⁴ Moi-moi o nyawa aha yowango iridï deʼ idame ai angguru deʼ ai ara madumule mahidogoronaka; koiwa aha iwihikokokamodongo unanga, gënanga la ma Jou Duru wo ko Ko kuaha Ai jaji.

⁵O höana deʼ o berera yogetongo o dunia mal̄okuoka yahuba deʼ ihi ngounu manga gikirika mahirete. Mä ngone aha hihi ngounu to ngone nanga Jou Madutuika deʼ hihuba Unanga mangale kahiado-adonika.

⁶Ma Jou wotemo, ”Aha iboa maöraha Ngohi tatoomu hagala o nyawa Ta huku-hukumu, enagënanga önanga ya tö tago-tagongo o hangihara o tabuangoka.

⁷Onanga yä luguoka deʼ yokurutika deʼ manga kapongo malooa. Mä hagala o nyawa mahou-houino gënanga Ngohi aha tamulaenge moi o difauku mahungi. Onanga aha yodadi o höana deʼ o berera ma ago-agomo deʼ i kuata. Ngohi aha tä pareta önanga o Sion ma Doporonoka kahiado-adonika.”

⁸De ngona Yerusalem, ma Jou Madutu wagoana Ai umati mangï hokä o gogoana wogoana ai duba matika, ngona aha nolio nodadi ani pareta ma kota matiti hokä mahira.

⁹Yadodoa ngona noari nakua-kuatil̄e? Yadodoa ngona natagongo o hangihara hokä o ngoheka momau momagilianga? Boteka karana ngona koiwa tongona ani koano, de inï nonasihati yokokihonengoka?

¹⁰Hei Yerusalem manyawa, nimahirikiti deʼ ni tidono hokä o ngoheka magogiria momagilianga! Hababu, öraha nënanga ngini kiani nia mal̄a o kota deʼ ni gögere o tonaka ilua-luasoka. Ngini kiani ni öiki o Babelika, mä dokengoka ma Jou aha wihipidili hagala nia haturuino.

¹¹O hoana deʼ o berera manga ngöe ima toomuoka mangale ini parangi ngona, hei Yerusalem! Onanga yo temo, ”O Yerusalem kiani yawedere! Ngomi aha mia make o kota gënanga idadi magilianga!”

¹²Mä o hoana deʼ o berera ma ago-agomo gënanga ihiorikua okia magogiria ma Jou wohi datoro. Onanga yamaoua önanga wa toomuoka mangale wahukumu, hokä ima tero o gandum yatoomu mangale yahidoro.

¹³Ma Jou wotemo, ”Hei o Yerusalem manyawa, ni oiki deʼ niä pito-pitoko hagala nia haturu! Ngohi aha tinï hidadi ngini ni kuata hokä o hapi matataduku o behi deʼ ma kuliti o tabaga. Ngini aha nia wedere o hoana deʼ o berera manga ngöe, deʼ o kaya önanga yamake yoora mahasilino aha ngini nihihuba Ngohino, o Jou o dunia ma gilolitino.”

¹⁴Hei Yerusalem manyawa, nigahoko deʼ magiria hupaya ma Jou winï riwo! Ngone magogiria inahigiloliti! O haturu magogiria yä parangi o Israeloka manga tutuda!