Read Tobelo O MIKHA 7 Bible Online

O MIKHA 7 - Tobelo bible

O MIKHA 7

¹To bodito ngohi! Ngohi hokä o nyawa yahahahini yöiki ima pagele o hohoko maöraha ihohoko ipahaka. Koiwaka hagala o hohoko ma utu-utuoka. O angguru ma hohoko deʼ o ara ma hohoko maoa-oa mata-mata imataoka yapagele.

²O nyawa manga hininga iriko-rikoto yohihangoka o bereraka, o nyawa yo sosetia ma Jou Madutuika hä makeokauaoli. Moi-moi o nyawa yodamä o öraha mangale yo toma. Moi-moi ihiakana o modoi imahikoka nyawaika.

³Mata-mata yo sawaro yodiai o dorou magoronaka yo pangka-pangkati de o hakimi yogahoko o tiwi o urubokumu, deʼ o kawaha manga balu-baluhu ya pakisa manga mau, hoko gënanga önanga ima kinïki ima teke fakati.

⁴Duru yaö oa-oa deʼ duru manga hininga irö riko-rikoto onanginoö hokä o momo i rubu-rubu ma hohihika ibö baragunaua. Maöraha yadonoka ma Jou Madutu wä hukumu Ai umati hokä wahi döakoka o hohininga onangika itilakuru Ai nabi-nabi. O öraha nënanga ipudaka o ruaë toönanga manga hidogoronaka.

⁵Uha niä ngaku nimakokadatekika, uha nimahi tangono nia dodiawoika. Nimahi dodiai deʼ nia demo-demo ngaroka ihi gihe-gihene ganga nia hekata mahirete.

⁶ Hababu, maöraha hokä hoko nënanga o tau manyawa imä teke haturu: o ngohaka o nauru yahikauku manga ama, o ngohaka o ngo heka yalawani manga ayo, deʼ ngomi hunungu o ngohëka imalawani deʼ ngomi hunungu o ayo.

⁷Mä ngone hïnganono ma Jouika; deʼ nanga ngongaku itö totomo ngone hidamä tongone nanga Jou Madutu. Unanga aha woihene tongone nanga niata deʼ wonahihalamati ngone.

⁸Koiwa mahohol̄e mangale tongone nanga haturu-haturu yo morene mangale ngone hobinaha. Hababu ngaroka ngoneino ina otaka, ngone aha homomikoli. O öraha nënanga ngone naga o huhutu ma goronaka, mä ma Jou aha wona tararono ngone.

⁹Ngone hobaradohaoka ma Jouika, karana gënanga o öraha nënanga ngone kiani hamao Ai gangamo. Mä itedekanokaua oli Unanga aha wonä demo ngone deʼ wonahidöaka o adili ngoneino. Unanga aha wonä ao wona hihupu o dararonika; ngone aha hamao mahirete Unanga wona hihalamatoka ngone.

¹⁰Mahira o haturu inä hikauku ngone deʼ yotemo, ”Kiaka ma Jou, o Jou Madutu gënanga?” Mä o öraha nënanga önanga aha yamake okia wadodiai ma Jou mangale ngone, deʼ önanga aha idadi yamal̄eke, Ngohe aha hahakihi tongone nanga haturu-haturu gënanga wa hohihanga deʼ wa pito-pitoko hokä o pëseke o ngekomoka.

¹¹Hei Yerusalem! Maöraha iboaoka ngini nihi gokookali nia kota ma bebeno-bebeno o mehele. O wange gënanga nia daira aha i amokika.

¹²Hagala nia nyawa aha yolio nginika kiaino honanga — o Asyur o wange ma hiwaroko deʼ yaiha, o Mesir o koreharail̄e idaduoka deʼ yauku, o Efrat ma Ngairi ma dairaoka deʼ yaino, o ngöto ma honongaka deʼ yaino deʼ hagala o l̄oku ma gogurutoka deʼ yaino.

¹³Mä dunia aha idadi itoongoro karana manyawa manga dorou.

¹⁴Ya Jou, nä goana Ani umati, Ani ngongikiri ma umati. Onanga yo gogere yo kurutika deʼ mahomoa o hongana mahai-haitoka, o tonaka iboburere mahidogoronaka. Mal̄aika önanga ima make o inomo o Basyan deʼ o Gilgaloka mamomo matonaka malua-luasoka hokä maöraha mahira.

¹⁵Nadiai ihö hera-heranga mangale ngomi, ya Jou, hokä nadodiai mahira maöraha Ngona nomi ao ngomi o Mesiroka de mi hupu.

¹⁶Hagala o hoana deʼ o berera ma ago-agomo aha yamake o hali gënanga deʼ idadi yä mal̄eke karana yamao hagala toönanga manga kuata okia-okiaua ma mangarati. Onanga aha ihihanga manga akali hiädono yakunua yo temo ekola yoihene.

¹⁷Onanga aha ima tahe-tahe o tonakoka hokä o dodiha. De manga hawana deʼ yohahara önanga aha yohupu toönanga manga bebeno imahi tatatokino, daha yoböa Ngonaika, ya Jou tongomi mia Jou Madutu.

¹⁸Koiwa o Jou Madutu hokä Ngona, ya Jou, na ä apo-apongo Ani umati na iri-iriki mahou-houohi manga baradoha. Mangale kahi ado-adonikaua Ngona nongamo; idulu yaino, Ngona nosanangi nohi dumutu Ani hayanga koiwa-iwa ma batingi gënanga.

¹⁹Ngona aha ani hayanga deʼ Ani doraoli ngomino deʼ nomihi apongo ngomi. Hagala tongomi mia baradoha aha Na pito-pitoko deʼ No hikaweli o ngöto ma bukuuku!

²⁰Ani umatika, o Abraham deʼ o Yakub manga difauku, Ngona aha nohidumutu Ani setia deʼ Ani hayanga ko ö iwa-iwa mabatingi gënanga hokä nohi jä jaji tongomi mia ete deʼ mia tohoraika mahira.