Read Tobelo O NAHUM 1 Bible Online

O NAHUM 1 - Tobelo bible

O NAHUM 1

¹ Nënanga ma Jou Madutu Ai behehongo yakorona o Niniwe. O behehongo gënanga wohi nyata deʼ o lolega wohidö döa-döaka o Nahumika, woma tengo ma nabi ai ahali o Elkosino.

²Ma Jou o Jou Madutu woluku imaketero de de Unanga, o nyawa iwi lawa-lawani, maraioka yamake o hukumanga. De duru womuruka, Unanga wabalahi o hininga magogono onangika.

³Igoungu ma Jou, itaitua wo ngamo; mä Unangö duru wokuaha hiädono o nagona honanga yodiai o howono, aha yo bebasua o hukumanga. Kiaka ma Jou wotagi, genangoka ipuda o rato; Ai l̄ou wohi doko-doko mangïoka, genangoka o kafo idadi o lobi.

⁴Unanga wodorohu o ngöto deʼ wadudungu, hagala o ngairi idadi imata ma akere. O Karmel mal̄oku deʼ o tonaka ma lua-luasi o Basyanoka idadi ito ongoro deʼ o Libanonoka imaai hagala o bunga-bunga.

⁵Hagala o l̄oku ihahara Ai himangoka; deʼ o doporonö idadi iwaro mata-mata. Nako ma Jou wotagi Ai himangika, o dunia ihahara, o dunia deʼ mata-mata manyawa yohahara.

⁶O nagona yakunu imatumungu nako ma Jou womuruka? Moiua yakunu yootana Ai gangamoino? Unanga wohi aiki Ai gangamo itö toka-tokara o helewo iwedere deʼ idadi o kafo Ai himangoka.

⁷Ma Jou gënanga yaoa, Unanga wä hohongino Ai umati maöraha önanga yohuha, Unanga wä goana o nyawa imahö hohongo Unangika.

⁸Hokä o nguihi ma amo-amoko iolu, yawedere hagala Ai haturu. Onanga yobarani iwi lawani Unanga kawa hohonenge hiädono yobinaha.

⁹O datoro okia ö nadodiai iwilawani ma Jou, maraioka aha nia make okia-kiaua idadi. Unanga aha wabalahua Ai hininga magogono hiädono higali mahinoto hagala Ai haturuika.

¹⁰Ngona aha ini harongo hokä o gandum ma röehe madoolenge hokä o momo irubu-rubu mahohihika ima kokurugihino.

¹¹Ngonaino, hei Niniwe, wo hupuoka woma tengo iwi omanga deʼ o datoro ma dorou. Unanga wodiai o datoro mangale wilawani ma Jou.

¹²Done ma Jou wätemo o Israelika, Ai umati, ”Ngaroko hagala o Asyur manyawa gënanga yokuata ikali manga gegetongo ma ngöe, mä önanga aha yowedere daha yohihanga. Hei Ahi nyawa, Ngohi tini diaioka nia tagongo o hangihara, mä Ngohi aha tadiaiokauaoli.

¹³O öraha nënanga aha To hibobaha o Asyur manga kuaha mangale ngini, deʼ Ta toaka o rante inihilö liko-liko ngini.”

¹⁴Nënanga ma Jou Ai putuhu yakorona o Asyur manyawa, ”Onanga aha koiwa toönanga madifauku mangale manga hoana idogo. O gomanga ma dulada-dulada naga manga gikiri matau magoronaka, aha Tawedere. Mangale o Asyur manyawa ma lungunu magogïria Tahidiai, hababu önanga ipatutua yowango!”

¹⁵ Nio lega, womatengo o huhuloko woboa watilakuru hagala ol̄oku, woao o abari maoa, o utumu ma abari. Hei o Yehuda ma nyawa, nihi amoko nia wange ma ago-agomo deʼ nifangu nia nasar ma Jou Madutuika. Nia berera aha yakuaha okauaoli o nyawa madorou. Onanga ya wederoka kamamoiuku.