Read Tobelo O NAHUM 2 Bible Online

O NAHUM 2 - Tobelo bible

O NAHUM 2

¹Hei Niniwe no ihene! Yo mau ini kokilianga ngona yoboaka! Nogoana hagala o bebeno o mehele nomahi tatatoko! Nogoana o ngekomo! Nomahidiai mangale noparangi. (

²Igoungu, ma Jou aha wohigilio hoi hira-hiraoli o Israeloka manga mulia, hupaya yodadi hokä mahira, yaorauahi hagala manga haturu.)

³O haturu manga dadatoko ma doka-dokara, deʼ manga pakeanga o rupa moi ima tero o awunu. O haturu imahidiaioka mangale yoparangi. Hokä o uku, o kereta ma behi mameletongo. Mata-mata ai kuda ima tahe-tahe.

⁴O ngekomoka, hagala o kereta itagi deʼ majapati. O lapangoka, önanga genanga imateke goginïki. Hapulo-pulono hokä o oboro ihiru-hiru, imateke rorebe deʼ ma japati hokä o leletongo.

⁵O tentara manga balu-baluhu yaahoko yotagi manga himangiha; onanga imahi dodepeleke maöraha yoparangi. Ima tai-taiti önanga yodumutu o kota ma bebeno o mehele, o pakakaha ihi kokilianga ihi gokoil̄e deʼ majapati.

⁶O akere ma ngorana o ngairi mata-mataika i helengaka, de iruaëuku o kadato yamode-modekika!

⁷O koano o ngoheka yo hasili imi tagoko, imi lö leleani yokururihi deʼ yododora, önanga yotaiyana hokä namodara, deʼ ya poha-poha manga aluoko karana yoduka.

⁸O Niniwe ma kawaha yoara ima hikabarihi, hokä o akere ihupu o lupangoka deʼ ipuraraha. Naga yopöaka, ”Nimatogumu, nimatogumu!” Mä koiwa naga yomau ima idulu.

⁹Niaora hagala ma gurasi deʼ mahaaka! O arata o kotaka nënanga igoungu deʼ maboboloi!

¹⁰O Niniwe i wederoka, kai rïdika deʼ itoongoro. Manga hininga idadi iakere karana yohawana. Manga buku idadi yabole deʼ ihahara. Manga biono mata-mata o nyawa idadi duru kama mule-mule.

¹¹O kiaka o kota gënanga o öraha nënanga? O kota hokä o aruku o singa ma igutu mangï? O singa ma ngohaka ihi ol̄o-ol̄omo mangï, ma dumutu mangï o singa ma nauru deʼ ma beka, o ngï irö rirïdi mangale ma ngoha-ngohaka?

¹²Mahira dokengoka o singa yagoli mainomo, deʼ yökakihi mangale mabeka deʼ mangohaka. Enanga yaomanga maigutu deʼ yakä kakihi ma akeme yagoli-golino.

¹³”Ngohi nënanga nia haturu,” wato ma Jou Duru woko Kuaha. ”Nia kereta-kereta aha Ta tuhuku tamata. Nia tentara aha yohonenge o parangi magoronaka, deʼ Ngohi aha ta l̄ë hagala moi-moi ngona na l̄ë-l̄ëoka o nyawa ma homoaino. Hagala ani huhuloko yodö dotagahoko aha hoihenokauaoli.”