Read Tobelo O HABAKUK 2 Bible Online

O HABAKUK 2 - Tobelo bible

O HABAKUK 2

¹Ngohi tomau todoa o menara to goa-oanil̄e, deʼ to damä okia ma Jou womau wotemo ngohino, deʼ sarakia Ai bobaluhu mangale ahi hininga ma böaka.

²”Na garade deʼ madiai o tonaka ma tau-taulu o beleka moika, okia Tohinyö nyata-nyata ngonaika, hupaya yakunu yabaca deʼ mä dodiai.

³ Natulihi gënanga, hababu öraha nënanga maörahauawahi. Mä öraha gënanga deʼ ma japati iboa, deʼ okia Tohi nyata-nyata ngonaika maraioka aha idadi. Ngaroka nolega-lega ma dekanohi, mä nodamä dika! O öraha gënanga maraioka aha iboa deʼ aha itudaokaua.

⁴ De nohininga: o nyawa madorou aha yohalamatua, mä o nyawa yä dodiai ma Jou Madutu Ai mau aha yowango karana manga setia ma Jou Madutuika.”

⁵O kaya gënanga salalu yä tipu o nyawa. O nyawa yokokal̄il̄u gënanga manga hininga ikurutil̄e deʼ manga hininga kai huhuhaika. Hokä o honenge, unangö komaiwa la wo gihounu; o hoana de o berera tagali o hoana de o berera ihidö tel̄e.

⁶Mä mata-mata yaö utu-utumu gënanga aha yä tetemo deʼ ya hohedu. Onanga aha yo temo, ”Ngona ini lolai hababu nomä doporono o baranga kotongonaua madutu! Muruonoka madekanoli ngona nohi kaya ani diri deʼ nä pakisa hagala o nyawa yonagi-nagimi ngonaika mangale yofangu toönanga manga nagimi?”

⁷Mä ngona namaoua, ngona nä utumoka o nyawa mahomoa, aha yo nagimö deʼ na pakisa yofangu mabunga. Hagala ani haturu aha yoboa deʼ ini diai ngona nohawana. Onanga aha yaora ani arata!

⁸Ngona nä oraka o höana deʼ o berera ma ngöe, mä hagala o hoana de o berera ma ago-agomo yohasili yootana aha ini ora ngona, karana o doma nadodiaioka, deʼ karana ani hayanga koiwa hagala o bereraika, hagala o kota deʼ manyawa.

⁹Ngona i ni lolai! Ngona nahi kaya ani tauma nyawa deʼ o utumu namö make-make deʼ ma dodagi ma hayanga koiwa, hupaya ani tau mahirete idame deʼ ima tïtoko deʼ o huha deʼ o bodito.

¹⁰Mä ani datoro gënanga duga-duga yägao o mal̄eke ani tau manyawaika. Denä ora o höana deʼ o berera manga ngöe, ngona nohi rugi ani diri mahirete.

¹¹Koaholi hagala o helewo o bebeno o meheloka ipöa-pöaka ini hilolai ngona deʼ o tau ma loliate igiloanga o böaka gënanga.

¹²Ngona ini lolai! Ngona nohi goko o kota mahohol̄e o dorou mal̄okuoka deʼ nohi goko deʼ o doma.

¹³Hagala o höana deʼ o berera ma ago-agomo nä utu-utumoka imahuha deʼ ima hikangela koiwa maguna, deʼ hagala moi-moi önanga ihi gö goko-goko imamata yälahiri o uku. Mata-mata gënanga ganga ma Jou Duru wo Ko Kuaha ai mau.

¹⁴ Mä hokä o ngöto yaomanga deʼ o akere, hoko gënanga o dunia ö aha ya omanga deʼ o ganako mangale o Jou deʼ Ai kuaha.

¹⁵Ngona ini lolai! Ngona nä hikauku deʼ nahi mal̄eke nima kokadateke; na diai önanga kayo lebo-leboto hokä o nyawa yä daluku.

¹⁶O öraha nënanga iboa ani hidoku mangale inihimal̄eke, deʼ koigongua mangale ini horomati. Ani horomati aha ingali idadi okia-kiaua ini daene. Ma Jou aha woni pakisa ngona naokere o galahi madol̄a o hukumanga ngonaika. Ngona aha naokere deʼ kano lebo-leboto.

¹⁷Ngona natol̄anga hagala o gota ma utu o Libanon ma honganoka, deʼ öraha nënanga ngona mahirete aha ini tol̄anga. Ngona natoma hagala ma aiwani, deʼ o öraha nënanga hagala o aiwani ini hawana ngona. Mata-mata gënanga idadi karana o doma deʼ o hayanga koiwa-iwa nadodiaioka hagala o bereraika, hagala o kota deʼ manyawaika.

¹⁸Ngona inilolai! Ngona natemo o gota madobikika, ”Nomomiki!” ekola moi o helewo ma pako-pakoika, ”Nomaoko!” yakunu moi o dulada ihi demo okianaga moi ngonaika? Mudukua o dulada gënanga ihi lape o gurasi deʼ o haaka, mä ma jiwa koiwa enangoka. Okia ma guna o gomanga madulada? Genanga duga-duga o nyawa mamanarama dika. Ngona namake ena ngino duga-duga o tengeluku mata-mata. Parahaja manga ngongaku o gomanga yododiai manga giama mamanaramika, yakunua itemo-temo gënanga.

²⁰Ma Jou naga ai Tau itebi-tebini magoronaka; kokiani mata-mata o nyawa o duniaka yarïdi manga diri Ai himangoka.