Read Tobelo O HABAKUK 3 Bible Online

O HABAKUK 3 - Tobelo bible

O HABAKUK 3

¹Nenanga ma Nabi Habakuk ai niata:

²Ya Jou, toihene mangale Ani manarama, done tamao o horomati yaomanga ahi hiningaoka. Tanu o manarama i lamo-amoko gënanga Nö giliooli deʼ nohi nyata tongomi mia orahoka nënanga. Kokiani ngomi Ngona nomihininga ngaroka Ngona ani hininga mahauku.

³Ngona o Jou Madutu Duru no Tebi-tebini noboa o Teman mabereraino, Ngona noboa o Paran mal̄oku ma buturungino. O dihanga yakilolitino Ani mulia; o dunia iomanga deʼ o higiriri Ngonaika.

⁴Ngona noboa deʼ o cahaya duru kaharahai, Ani giamino ihupu o dararono kaima hidoleletonguku, genangoka Ngona nagogono Ani kuaha.

⁵Nahuloko o panyake itagi Ani himangoka deʼ o honenge ininïki Ani poretino.

⁶Nako Ngona nomatogumu, o dunia ihahara nako Ngona nomä bulo-bulono, o höana deʼ o berera ma ago-agomo yoruaeuku. Hagala o l̄oku ikokakali ibela-belaka; hagala o doporono ikokakali ö ima tipoko, hagala o doporonoka gënanga lä Ngona no tagi maöraha kahuruoninohi.

⁷Ta make o Kusyan makawaha yata pal̄u o hawana, deʼ o Midian manyawa yohaharoka.

⁸Ya Jou, bote karana o ngöto Ngona ani awunu idoa? Bote karana hagala o ngairi yadiai Ngona no ngamo? Ngona nö barene o lobi hokä o kuda deʼ o kereta ihipoparangi, maöraha Ani umati Nahi döaka o utumu.

⁹Ani toimi mal̄eha Ngona nohidiaioka, Ani toimi ma doto i tiaioka mangale nodipidili. Daha o dunia Nabelaka idadi hagala o ngairi.

¹⁰I ni make Ngona, hagala ol̄oku igiwi o dihanguku iuti o awana hokä hakopoa. O akere o tonaka matimioka iruruhu mailingi, ma moku-moku malulu deʼ irato.

¹¹Hagala Ani toimi ma cahaya itagi majapati, Ani kuama maletongo iloleletongo done ima togomu o wange deʼ o mede mangïoka.

¹²De ani dohata Ngona nongika ngino o dunia; o hoana deʼ o berera ma ago-agomo Ngona napito-pitoko deʼ Ani hininga mahauku.

¹³Ngona noaguru notagi ani himangiha mangale nahi bebasi Ani umati deʼ mangale nihihalamati o koano Ni iri-iriki. Nigohara woruba o nyawa madorou manga tutuda, Nahehara nä mata-mataka iwinö ninïki.

¹⁴Hagala ani toimi madoto iwi totara o lawani manga duduono matutuda maöraha aitentara yoboa kaimatero makuata o rato, hupaya ngomi imihi kokabarihi. Onanga yoiete deʼ ma sanangi hokä o nyawa deʼ koyoilingua yätuku o nyawa yokö kura-kuranga.

¹⁵De Ani kuda napito-pitoko o ngöto ma ago-agomo de o ngöto iabo iarehoka.

¹⁶To ihene gënanga, ahi hininga yagiwi deʼ ahi uru makai ihahara. Ngohi idadi tobole koiwa ahi kuata, ahi l̄ou imahidodepeleke, okiaika ö ngohi totagi. Ngohi aha todamä deʼ torïridi ma Jou Madutu ai hukumanga yopoparangiuku.

¹⁷Ngaroka o ara mautu koiwa mahohoko deʼ angguru ma utu koiwa ma angguru, ngaroka o zaitun koidadiua yo pagele deʼ o gandum mahasili o dumuleoka ahi hininga yahuha, ngaroka hagala o duba ihonenge mata-mata deʼ o gigini ma kurunga koiwa madol̄a,

¹⁸ngohi aha tomorene salalu, hababu Ngona Jou o Jou Madutu no hï hihohalamati.

¹⁹ Ngona nohihi döaka ngohi o kuata hokä o maijanga mal̄ou, ahi l̄ou Ngona nakuata. Ngona nohi tuda ngohi hupaya tosanangi maöraha totagi ol̄oku mabuturungoka.