Read Tobelo O ZEFANYA 2 Bible Online

O ZEFANYA 2 - Tobelo bible

O ZEFANYA 2

¹Hei höana deʼ o berera nianako-nakoua o mal̄eke, nima todokana

²ngini nimaaiuahi deʼ nitoolenge hokä o bunga! Nima todokana ma Jou Ai dohata mawange iboauahi, deʼ ngini initapal̄u ma Jou Ai muruka itötoka-tokara gënanga.

³Nimaidulu ma Jouika, hei mata-mata o nyawa niahininga ipopoluluku o bereraka nënanga, deʼ mata-mata o nyawa ihingou-ngounu hagala Ai paretaika. Nidiai imamoteke ma Jou Ai mau, deʼ nihitipokouku niadiri Ai himangoka. O nagona ihiöriki ngini aha niotana o hukumangino ma Jou Ai wange ihidumutu Ai gangamo.

⁴ O Gaza makotaoka moiua ö aha yohalamati. O Askelon aha kai rïdika moiua yogogere. O Asdod manyawa aha yäduhu moi o parangi itodokanino magoronaka o wange ikokoronauku deʼ o Ekron manyawa toönanga manga kotaoka aha yähuloko yöiki.

⁵Ngini inilolai, hei o Filistin manyawa, o höana de o berera yogogogere o hohana magurutu. Ma Jou wohitatapuoka o hukumanga nginika. Unanga aha winihibinaha ngini, moiua nginino aha yo otana.

⁶Nia daira o gahi madatekoka idadi o momo matonaka malua-luasi; o gogoana manga tau maiteteke deʼ duba makurunga aha ihi goko genangoka.

⁷O Yehuda manyawa yakunu imahuputu, aha yögogere niadaira gënanga. Onanga aha yogoana manga gigini o tonakoka gënanga deʼ yohutuuku önanga aha imä idu o Askelon manyawa manga tauoka. Hababu ma Jou, toönanga manga Jou Madutu aha wahohonginoli önanga deʼ wahidadi önanga mata-mata kadema enangoli.

⁸ Ma Jou Duru woko Kuaha wätemo, ”Toihenoka o Moab deʼ o Amon manga berera deʼ höana yähikauku deʼ yahohedu Ahi umati. Onanga imahingaroko aha yäora Ahi umati manga tonaka.

⁹ Mangale Ngohi towango, o Israeloka manyawa manga Jou Madutu, Ngohi aha tahehara tatebi-tebini o Moab deʼ o Amon hokä o Sodom deʼ o Gomora. Hagala o berera gënanga aha iomanga deʼ hagala o humu o gahi deʼ hagala magilianga ikokakali yongango o momo irubu-rubu mahohihika. Ahi umati mahou yoö ota-otana aha manyawa yäora yogogere deʼ yäora toönanga manga tonaka.”

¹⁰Hoko gënanga o Moab deʼ o Amon manyawa aha yähukumu karana önanga manga edenge deʼ manga hininga magurutil̄e, karana onangö yähikaukuoka ma Jou Duru woko Kuaha ai umati.

¹¹Ma Jou aha wadiai önanga yohawana. Unanga aha wawedere hagala o gikiri o duniaoka. Daha hagala o hoana deʼ o berera aha yopuji ma Jouika, moi-moi manga bereraoka mahirete.

¹² O Sudan manyawaö aha wagelenga o hukumanga wahohonenge mangale ma Jou.

¹³ Iböto gënanga ma Jou aha wapake Ai kuaha mangale wawedere o Asyur. O Niniwe makota aha wohidadi duru kai rïdika deʼ ikakahaka madoongoro.

¹⁴Genangoka o aiwani matika deʼ hagala irupa o aiwani aha imarubaiha deʼ imahibatongo. Hagala o totaleo o wuku deʼ o ginene aha imä igutu magogiliangoka gënanga deʼ ima pöa-pöaka hagala o jangelaino. O totaleo o wogono ikao-kao hagala o ngorana ma ago-agomoka. O liwewuru magota o kotaoka matau ma ago-agomo gënanga aha imata irahuku.

¹⁵Genanga aha idadi o kotaika imö more-morene deʼ imagogarago gënanga deʼ yapulono madiri duru kohamirïdi. manyawa yato bote toönanga manga kota gënanga o kota duru kohä pako o duniaoka. Hokokia mami rïdi o daira gënanga, koiwa manyawa yogogere sawaliua hagala o aiwani o honganika imäigutu genangoka! O nyawa moi-moi yakaino o kotaka gënanga aha yatodokana deʼ yamao yaporohono.