Read Tobelo O ZEFANYA 3 Bible Online

O ZEFANYA 3 - Tobelo bible

O ZEFANYA 3

¹O Yerusalem yalolai, o kota makalakuanga itotorou yoigo iwilawani ma Jou deʼ yätuku manyawa mahirete!

²Ibodito o kota iö olu-oluku yatarima ma Jou Ai hitiari deʼ yolegaikauaö hagala Ai hidaaere, ihilapahiua manga wowango ma Jouika, deʼ yogahokua o roriwo Unangika!

³O kota manyawa yolago-agomo gënanga hokä o singa ipöa-pöaka. Hagala ai hakimi hokä hagala o kaho o honganika yahahini; önanga duru yohorodo hiädono moi o kobongo makoiwa yamal̄aika mangale iyarehino.

⁴Ai nabi-nabi koiwa toönanga yatagongo mabobaluhu deʼ hakunua hängaku; hagala o imam yapeseke okia ihitö tinga-tingakoka mangale ma Jou deʼ yatakaidulu ma Jou Madutu Ai tita mangale toönanga manga utumu mahirete.

⁵Mä ma Jou kanagahi o kotaka gënanga; Unanga salalu wadiai itotiai deʼ komaiwahi i howono. O ngorumino magetongo maraioka Unanga wohidöaka o adili Ai umatika. Mä, o nyawa yanako-nakoua o adili o kotaka gënanga kahirahi yodiai itotorou yanakoua yämal̄eke.

⁶Ma Jou wotemo, ”Ngohi tahohihangoka o hoana deʼ o berera mangöe; hagala toönanga manga kota Tawedere, deʼ hagala o bebeno o mehele ikali toönanga manga menara-menara Tohidadi kama gogilianga. Hagala toönanga manga kota kai rïdika koiwa o nyawa yogogere deʼ hagala manga ngekomo koirameua.

⁷Tapikiri, ’O öraha nënanga maraioka Ahi umati ihi horomati deʼ yolegaika hagala Ahi dodaaere. Maraioka önanga yohininga o dodotoko Tahi döa-döaka önangika.’ Mä inyata, önanga iholoioli yamagawe yodiai o dorou ngaro deʼ mahira.

⁸Mä nimahidodiai! Niodama dika mawange Ngohi Tomomiki hokä tini kokalaki. Hababu Taputuhoka mangale tatoomu o höana deʼ o berera ma ago-agomo dedehagala o pareta mangale tahita pal̄u Ahi muruka onanguku. O dunia yamode-modekika aha yamata Ahi gangamo mauku yaol̄omo.

⁹Mä ipaha Ngohi aha tangali o hoana deʼ o berera ma ago-agomo gënanga manga hininga, hiädono önanga imä niata Ngohino dika, deʼ hagala o gikiri mahomoaikaua. Hagala o hoana deʼ o berera ma ago-agomo gënanga mata-mata aha ihihingounu Ngohi.

¹⁰I goungu o Sudanino magogurutika, Ahi umati imahi kokabarihika gënanga aha yoböa deʼ ihihuba o huhuba Ngohino.

¹¹O öraha gënanga, hei Ahi umati, ngini iparaluua niamao inïmal̄ekoli karana nima lawanoka Ngohino. Ngohi aha tä duhu moi-moi o nyawa ima ö ede-edenge deʼ manga hininga ikökurutil̄e, deʼ ngini aha nima lawanokauaoli Ngohino Ahi doporono itebi-tebinoka.

¹²Dokengoka aha Tä mal̄aika yogogere moi o hoana de o berera manga hininga itotipokouku, yongano-nganono Ahi roriwo. Onanga yakunu yogogere dokengoka.

¹³ O Israeloka manyawa mahou-houohi, aha yodiaiokauaoli o dorou o nagonaika ö; önanga aha yoelukokauaoli deʼ yotipuokauaoli. Onanga aha mata-mata kadema enanga deʼ idame-dame, deʼ yamaookaua o modongo o nagonaika ö dika.”

¹⁴Hei Israel, nimä ulili deʼ ninyanyi! Hei Yerusalem, nimorene deʼ niahininga magahumu!

¹⁵Hababu ma Jou womatogumu winïhukumu ngini; Unanga wäduhuoka hagala niahaturu. Ngini winï hohongino o Israeloka manga koano nia Jou mahirete. O öraha nënanga ngini iparaluua niamao nihawanoli.

¹⁶Aha iboa maöraha hagala o nyawa damä aha yotemo, ”Hei Yerusalem, uha nohawana deʼ ani hininga i akere.

¹⁷Ngini winihohongino ma Jou nia Jou Madutu wopoputurungu. Ngini niutumu karana Ai kuaha. Ma Jou womorene deʼ womagarago karana ngini, Ai dora magoronaka Winihi döaka ngini o ngango mahungi.

¹⁸Karana ngini, ünanga wonyanyi womorene hokä o nyawa magogiria yorameanga.” Ma Jou wato, ”Obodito initotapalu ngini Tahohihangoka. Okia-kiaua ini daene Taeheoka.

¹⁹Maöraha aha iböa initö tuku-tuku Täwedere, deʼ o nyawa yosega-sega Tahihalamati; mata-mata yototabuanga Tatuda tähigilio. Okia-kiaua yadaene önanga Tangali idadi manga horomati; kiaka dika, ikali o dunia yamode-modekika, önanga aha ihi himulia de ihipuji.

²⁰Maöraha aha iböa, ani nyawa imahi kokabarihika Tätuda tähigilio. Ngini Tinidiai kainihi gogiriri o dunia mal̄okuoka yamode-modekika, de mata-mata nia hasili iwöe aha Tohi gilio hokä ihira-hiraoli.” Ma Jou wo temooka.