Read Tobelo O ZAKHARIA 1 Bible Online

O ZAKHARIA 1 - Tobelo bible

O ZAKHARIA 1

¹ O mede ma tufange o taongo hinoto magoronaka ma Koano Darius aipareta mangale o Persia, ma Jou wohiädono o behehongo nënanga ngohino, ma Nabi Zakharia o Berekhya aingohaka deʼ o Ido ai danongo.

²Ma Jou wohi pareta ngohi mangale totemo hoko nënanga Ai umatika, ”Maöraha ipaha-paha Ngohi, o Jou Duru to ko Kuaha, kohagiria ta ngamo nia ete deʼ nia tohora ika.

³Mä öraha nënanga Ngohi tinï temo nginika: Nima idulu Ngohino, done Ngohi ö aha toma idulu nginika.

⁴Uha hokä nia ete deʼ nia tohora. Kahuruonika o nabi-nabi ihiädono Ahi behehongo onangika hupaya önanga uhaoli yodiai o dorou deʼ yodiai o baradoha. Mä önanga yohaduliua deʼ yoluku ihihi ngounu Ngohino.

⁵Okiaaka nia ete deʼ nia tohora deʼ o nabi-nabi gënanga öraha nënanga? Onanga koyaiwaka.

⁶Itilakuru o nabi-nabi Ahi gogilaongo gënanga, Tohiädono hagala Ahi pareta deʼ hagala Ahi hohininga nia ete deʼ nia tohoraika. Mä önanga yolegaikaua hiädono önanga kiani ya tagongo ma gorehau. Daha önanga imatoduba deʼ ima ngaku Ngohi, o Jou Duru woko Kuaha, ta hukumoka önanga imamoteke deʼ toönanga manga howono, deʼ imamoteke deʼ Tohitantantu.”

⁷Mawange monaoko deʼ iata o Syebat ma mede, enagënanga o mede ma ngimoi deʼ moi, o taongo hinoto magoronaka ma Koano Darius aipareta, ma Jou wo hiädono Ai behehongo ngohino. Ololega moi magoronaka maöraha o hutu-hutu,

⁸ ngohi ta make ma Jou Ai malaikati yo barenuku o kuda ma doka-dokara o dutu moi. Enanga imatogumu moi o waioka o murad ma gota ma utu-ma utu mahi dogoronaka. Ma poretoka ima okoino o kuda ma homoa o dutu muruono naga, naga ma doka-dokara, hatoli ma doka-dokara deʼ ma gare-garehe.

⁹Ngohi toleha unangika, ”Tuanga okia ma mangarati mata-mata o kuda nënanga?” Unanga wohaluhu, ”Aha tonihidumutu ma mangarati ngonaika.

¹⁰Ma Jou wä hi dingotoönanga, mangale yatailako o dunia.”

¹¹Mata-mata o kuda gënanga ihi ngahu o malaikatika, ”Ngomi mio dagioka okiaika hononga o dunia mal̄okuoka mia mode-modekika, inyata o dunia nënanga i rïdi deʼ ma gigoro koiwa.”

¹²Daha malaikat gënanga itemo, ”Ma Jou Duru woko Kuaha, o taongo mori tumidi ma dëkana Ngona nä muruka o Yerusalemika deʼ hagala o kota o Yehudaoka. Hiädono muruonoka Ngona aha kahirahi no ngamo deʼ nahi apongua önanga?”

¹³Ma Jou wo baluhu o malaikat gënanga deʼ o demo-demo ya lö laru-laru,

¹⁴deʼ o malaikat gënanga ihi huloko ngohi to hiädono okia wa heto-hetongo ma Jou Duru woko Kuaha, ”Ngohi duru tö dora deʼ katö hohininga o Yerusalem ma kota, Ahi kota i tö tebi-tebini.

¹⁵Mä Ngohi duru tä ngamo hagala o höana deʼ o bereraika ya mao koiwa ma gigoro deʼ yorirïdi. Karana maöraha Ngohi Ta tumungu Ahi gangamo Ahi umatika, o höana deʼ o berera gënanga yö dogo manga hangihara Ahi umati.

¹⁶O öraha nënanga Ngohi tomaidulu o Yerusalemika mangale tohi döaka o apongo o kotaika gënanga. Ahi Tau aha ihi goko okali deʼ o Yerusalem ma kota aha ihigilio hö ihira-hiraoli.”

¹⁷O Malaikat gënanga ihi huloko ngohi tohiädono o behehongo nenangoli, ”Ma Jou Duru woko Kuaha wo jaji hagala Ai kota aha idadi mata-mata ma hasili i wöe deʼ mamoioli Unanga aha woriwo o Yerusalem deʼ wo hi goungu hokä to Unanga ma dutu mahirete.”

¹⁸O lolega ma homoa magoronaka, ngohi ta make o hapi ma tataduku iata.

¹⁹Ngohi ta leha o malaikatika ihitö temo-temooka ngohino, ”Okia mamangarati o tataduku-tataduku gënanga?” Unanga wo haluhu, ”O tataduku-tataduku gënanga ganga ma nonako hagala o pareta ikua-kuata yahi kokabarihi o Yehuda manyawa, o Israel deʼ o Yerusalem.”

²⁰Daha ma Jou wohihi matoko ngohino yaruata o behi yo tü tutuku ima gaoino o tataka.

²¹Ngohi toleha, ”Okia ma dungutu toönanga manga böa?” Unanga wohaluhu, ”Mangale yatodokana deʼ yalulu o hoana deʼ o berera yawö wede-wederoka o Yehuda ikali yahi kokabari manyawa.”