Read Tobelo O ZAKHARIA 12 Bible Online

O ZAKHARIA 12 - Tobelo bible

O ZAKHARIA 12

¹Nenanga ma Jou Ai behehongo yä korona o Israeloka. Ma Jou wohihohe o dihanga, wohi dadi o dunia ikali wohi döaka o ngango o nyawaika, wato,

²”Ngohi aha tadiai o Yerusalem hokä o galahi madol̄a o angguru; hagala o berera ima kokadateke aha yaokere deʼ yolebo-leboto hokä o nyawa yadaluku. De nako o Yerusalem ihigiloliti, hagala o kota o Yehuda mabereraka kaigogogerohi, aha ihigilolitö.

³Mä nako o wange gënanga iboa, Ngohi aha tadiai o Yerusalem hokä o helewo madodubuho; o hoana deʼ o berera okiaino ö ihi taili yagoraka aha yamake o bodito. Mata-mata o hoana deʼ o berera o duniaoka aha ima kodogo mangale yaparangi o Yerusalem.

⁴O wange gënanga mata-mata o kuda Ta diai imahi orikokaua deʼ yo bare-barene Ta hidadi yatogohanga, o Yehuda manyawa aha Ta goana, mä hagala manga haturu manga kuda Ta diai ipiloko.

⁵Daha o Yehuda manga tau manyawa aha yo temo manga hininga magoronaka, ’Ma Jou Duru woko Kuaha wahi döaka o kuata Ai umatika yogögogere o Yerusalemoka.’

⁶O wange gënanga o Yehuda manga tau manyawa aha tahidadi hokä o uku o gota hohi dofo-dofo ma doomu magoronaka ekola o oboro itoka-tokara o gandum iliko-likoino ma timioka; önanga aha yabinaha o höana deʼ o berera ya kokilolitino. Mä o Yerusalem manyawa aha kahirahi yo gögere o kota deʼ maruäe ko ö iwa-iwa magoronaka.

⁷Ngohi, o Jou, aha madodihiraoka tahi döaka o utumu o Yehuda ma tentaraika, hupaya o horomati ya totarima o Daud aidifauku ikali o Yerusalem manyawa iholoiua yatotarima o Yehuda manyawa mahomoa.

⁸O wange gënanga Ngohi aha tä goana o Yerusalem manyawa; deʼ duru yobö bole-bole ö önanga manga hidogoronaka aha idadi ima tero manga kuata o Daud. Onanga aha yätuda o Daud aidifauku hokä Ahi malaikati, iholoioli hokä Ngohi mahirete.

⁹O wange gënanga Ngohi aha tabinaha o hoana deʼ o berera ma getongo ihi taili yaparangi o Yerusalem.

¹⁰ Ipaha o Daud aidifauku ikali o Yerusalem manyawa aha Tahi döaka o hininga yo igo yä dora deʼ yo igo imä niata. Onanga aha iwi pulono Unanga önanga iwi tö tudu-tudukoka deʼ iwi dodora hokä o nyawa yö dodora manga ngohaka ima tengo-tengoka ihonenge. Onanga aha yododora de yä tora, hokä o nyawa ihihangoka manga ngohaka o riaka.

¹¹O wange gënanga aha naga o dodora kohagiria o Yerusalemoka, hokä o dodora mangale o Hadad-Rimon o Megido ma Waioka.

¹²Daha o tau manyawa yogetongo o bereraka gënanga yododora ima tengo-tengo; o Daud aidifauku manga tau manyawa, o Natan aidifauku manga tau manyawa, o Lewi aidifauku manga tau manyawa, o Simei aidifauku manga tau manyawa, deʼ mata-mata manga tau manyawa mahomoa. Manga tau manyawa yogetongo aha yododora ima tengo-tengo, deʼ hagala o nyawa o nau-nauru o tau manyawaino yogetongo aha yododora ima tingaka deʼ o ngongoheka.”