Read Tobelo O ZAKHARIA 14 Bible Online

O ZAKHARIA 14 - Tobelo bible

O ZAKHARIA 14

¹Ma Jou Ai Juru hakimi mawange itigioka. Done o Yerusalem aha yaora, deʼ mahasili aha imahikodoku nia lako mahimangoka.

²Ma Jou aha wä toomu mata-mata o höana deʼ o berera mangale yaparangi o Yerusalem. O kota gënanga aha yaora, hagala ma tau yaora deʼ ma ngongoheka yä pakisa. Ma hononga manyawa aha ya toraka o tabuangika, mä maboloi aha yogogere o kotaka gënanga.

³Daha ma Jou aha wotagi ma himangiha deʼ waparangi walawani o höana deʼ o berera gënanga, hokä Wadodiai o öraha ma hira.

⁴O wange gënanga Unanga aha woma okoino o zaitun ma Doporonoka, o Yerusalem o wange ma hiwaroko idadioka. Done o Zaitun ma Doporono aha ibelaka o wai malua-luasika, mulaenge o wange mahiwara hiädono o wange madumuniha. Mahononga o doporonino gënanga aha ikelu o koremieuku, deʼ ma honongaoli o koreharail̄e.

⁵Ngini aha nioara nia nonu o wai ya rö regu-regu o doporono gënanga idadi hinoto. Ngini aha nioara hokä nia ete deʼ nia tohora maöraha idadi o ohu maöraha aipareta o Uzia, o Yehuda manga koano. Daha woboa o Jou ahi Jou Madutu, iwi nïkino mata-mata o malaikati.

⁶Nako o wange gënanga iboa, aha koiwaoli naga o alo mamamata ekola o es.

⁷O wange gënanga koiwali naga o huhutu. O wange aha kahirahi itararono, maöraha ö o hutu-hutu. Mä duga-duga ma Jou wohi öriki muruonoka o wange gënanga iboa.

⁸ O wange gënanga, o akere mangango aha ihahuru o Yerusalemino; mahononga o akereino gënanga aha madumutu o Honenge ma Ngötika deʼ mahonongali o Ngöto i Kokoronaika. O akere gënanga aha ihahuru o taongo magurutu, yaoa maöraha o awa-awana yaoa maöraha o hiwara.

⁹Done ma Jou aha wopareta hokä o koano o dunia mal̄okuoka yamode-modekika; o nyawa ma getongo aha iwi huba Unanga hokä o Jou Madutu deʼ iwi nako Unanga deʼ ai romanga kaima tero.

¹⁰O berera yamode-modekika o Geba o koremieuku deʼ yail̄e hiädono o Rimon o koreharail̄e aha idadi o tonaka irata-rata. Ma o Yerusalem aha itol̄omo ikurutil̄e, iholoi ikurutil̄e ngaro deʼ o tonaka magilolitino; o kota gënanga aha ima hoheika o Ngorana ma Amo-amoko o Benyamin deʼ yaino hiädono o Libuku ma Ngorana ma Amo-amokika, enagënanga mangï o ngorana ma amo-amoko madodihiraka deʼ o Menara Hananel hiädono o koano manga angguru madutu yo deo-deo mangï ika.

¹¹ Hagala o nyawa aha yogögere deʼ ma sanangi o kotaka gënanga, koiwa o binaha mahi kokamodongo.

¹²Ma Jou aha wodotagao o panyake hoboborohono o hoana deʼ o bererauku mata-mata yaparangioka yalawani o Yerusalem. Toönanga manga lako deʼ manga akiri, ikali toönanga manga röehe ingodumu aha yö mela maöraha önanga kayo wango-wangoohi.

¹³O wange gënanga ma Jou aha wädiai o hoana deʼ o berera gënanga duru imahiorikokaua deʼ yohawana hiädono moi-moi o nyawa aha yatagoko manga dodiawo naga manga honongaoka deʼ yaparangi.

¹⁴Hagala o nyawa o nau-nauru o Yerusalemoka aha yoparangi yoriwo o Yerusalem. Hokä o baranga i ora-oraino önanga aha yal̄e mata-mata manga arata o hoana deʼ o berera yahi gogilolitino ma rupa o gurasi, o haaka deʼ o pakeanga kama dodoporono.

¹⁵Moi o panyake ho modo-modongö aha yatapal̄u o kuda, o bagal, o unta deʼ o keledai, ikali mata-mata o aiwani o haturu manga tau-tauoka.

¹⁶ Ipaha mata-mata o nyawa kayo wango-wangoohi o hoana deʼ o berera manga hidogoronaka yapoparangi o Yerusalem, aha yöiki o kotaika gënanga mangale iwi huba ma Koano, o Jou Duru woko Kuaha, deʼ mangale ihi amoko o Rameanga o Tau-tau ihi Katu o Hoka-hoka.

¹⁷Nako naga o hoana deʼ o berera yoluku yöiki o Yerusalemika mangale iwi huba ma Koano, ma Jou Duru woko Kuaha, done manga bereraka aha wohi gutiua o awana.

¹⁸De nako o Mesir manyawa yoluku ihi amoko o Rameanga o Tau-tau ihi Katu Hoka-hoka, done onangö aha yatapal̄u o panyake wadö dotagao ma Jou o hoana de o bererauku ma getongo yo olu-oluku yöiki yo puji.

¹⁹Genanga manga hukumanga mangale o Mesir deʼ mangale mata-mata o hoana deʼ o berera yo olu-oluku ihi amoko o Rameanga o Tau-tau ihi Katu o Hoka-hoka.

²⁰O wange gënanga hagala o losenge o kuda mapakeangoka aha yagarade deʼ o demo-demo ”Ihitö tinga-tingakoka mangale ma Jou”. Hagala o panci ma Jou Ai Tauoka aha yahoromati hokä hagala o mako ihi huba-huba o huhuba mangï ma himangoka.

²¹Mata-mata o panci o Yerusalemoka deʼ o Yehuda yamode-modekika aha ihi tinga-tingakoka idadi madutu ma Jou Duru wo koKuaha. Manyawa ihihö huba-huba o huhuba aha yapake mangale ihi lemaha o hiode ma akeme ihi huba-huba. Nako maöraha gënanga iboa, aha koiwakaoli ima huku-hukunu ma Jou Duru woko Kuaha ai Tauoka.