Read Tobelo O ZAKHARIA 5 Bible Online

O ZAKHARIA 5 - Tobelo bible

O ZAKHARIA 5

¹Ngohi tatailako tohi dodiaioli, deʼ ma moi nënanga ta make moi o buku i lü luluino i hoho o gitawaino.

²O malaikati gënanga i hi leha okia na make. To haluhu, ”Moi o buku ilü luluino ihoho o gitawa ino. Ma gurutu o metere hiwo deʼ ma ngoata o metere iata deʼ mahononga.”

³Daha ünanga wohi temo ngohino, ”O buku ilü luluino gënanga itulihi o lolai o bereraika nënanga ingodumu. Ma hononga moino itulihi yotohi-tohiki ma getongo aha yahi hupu o bereraino nënanga. De ma honongaino mahomoa itulihi moi-moi o nyawa yokoboto itiaiua ö aha yahi hupu.

⁴Ma Jou Duru woko Kuaha wotemo ololai nënanga o lolai gënanga aha yatapal̄u manga tau uku moi-moi yo tohi-tohiki deʼ manga tau o nyawa yokoboto itotiaiua. Hagala o tau gënanga aha hoko genangika yakorona o lolai gënanga hiädono idadi kama gogilianga.”

⁵O malaikati gënanga iboaoli deʼ itemo, ”Nolega! Nagali iboa!”

⁶”Okia gënanga?” toleha. Wohaluhu, ”Moi o karaja. Genanga manonako o baradoha o bereraino nënanga ingodumu.”

⁷O karaja gënanga ma dadamunu o hori. Kata totailakohi, o dadamunu gënanga igoraka deʼ inyata o karaja gënanga magoronaka moma tengo o ngoheka mogogeruku.

⁸Malaikati gënanga itemo, ”O ngoheka nënanga ihi nonako o dorou.” Daha imï dutukuoli o ngoheka gënanga o karaja magoronauku deʼ wa tamunu o karaja gënanga.

⁹Ngohi tomä lega taka il̄e deʼ tä make o ngoheka yahinoto yohoho ya meta ngohino. Toönanga manga gahuhu makuata hokä o totaleo o huweko magahuhu o karaja kangano önanga yal̄e daha önanga ihihoho.

¹⁰Ngohi ti leha o malaikatika gënanga, ”Okiaika önanga yao o karaha gënanga?”

¹¹Wohaluhu, ”O Babelika, dokengoka önanga aha ihi goko o gomanga matau mangale onanga. Nako o gomanga matau gënanga iböto, o karaja gënanga aha ihi gogere genangoka mangale yahuba.”