Read Tobelo O ZAKHARIA 6 Bible Online

O ZAKHARIA 6 - Tobelo bible

O ZAKHARIA 6

¹Ngohi tamake o lolega mahomoa. Mamoi nënanga tamake o kereta ihi poparangi o gahumu iata ihupu o l̄oku o tabaga hinoto mahi dogoronaino.

² Hagala o kereta gënanga yatauru o kuda deʼ ma habi-habi, madodihiraka o kuda madoka-dokara, mahinoto o kuda ma daro-daromo,

³ ma hange o kuda ma gare-garehe deʼ maiata o kuda ma bä bänga.

⁴Ngohi tileha o malaikatika gënanga, ”Tuanga, okia ma mangarati hagala o kereta ihi poparangi nënanga?”

⁵ Unanga wohaluhu, ”Onanga ima goraka manga meta iatika o alami magilolitino ma Jou iwi himanga ibötino.

⁶O kereta ihi poparangi ya tö tau-tauru mangale o kuda ma daro-daromo yo dumutu o Babelika o koremieuku. O kuda magare-garehe ma dumutu o wange ma dumuniha deʼ o kuda mabä bänga ma dumutu o negaraika o koreharail̄e.”

⁷Maöraha o kuda ma bä bänga gënanga ihupu, önanga hä pulo-pulono yosabarua mangale yöiki yatailako o dunia. O malaikat gënanga itemo, ”Nioiki mangale nia tailako o dunia!” Daha önanga yöiki.

⁸Ipaha o malaikat gënanga ipöaka ngohino, ”O kuda iyö oi-oiki o Babelika gënanga yarïdioka ma Jou Ai dohata.”

⁹Ma Jou wohi döaka o behehongo nënanga ngohino.

¹⁰Wato, ”Nal̄e o huhuba ihi dö doa-doaka o Heldai, o Tobia deʼ o Yedaya, enagënanga hagala o nyawa daha ö yolö lio-lio o tabuangino o Babeloka. Nao itaiti toönanga manga huhuba gënanga o Yosia o Zefanya aingohaka ai tauika.

¹¹O gurasi deʼ o haaka toönanga manga ngongike gënanga, na diai moi o makota deʼ nihi pake ma Imam womo Mulia o Yosua ai häekoka o Yozadak aingohaka.

¹² No hiädono unangika Ngohi o Jou Duru woko Kuaha totemo, ’O nyawa iwihö heto-hetongo o Dori i mo Mulia, aha wohasili ünanga naga ai ngïoka deʼ ünanga aha wohi gokookaoli ma Jou Ai Tau.

¹³Unanga aha wohi goko Ahi tau deʼ wa tarima o horomati hokä womatengo o koano, deʼ ünanga aha wäpareta mangale ai kawaha. Woma tengo ma imam aha widatekuku ünanga deʼ önanga aha yokarajanga imanïki deʼ imahininga moi.’

¹⁴O Mahkota gënanga yagogono Ahi Tauoka mangale ya hininga o Heldia, o Tobia, o Yedaya, deʼ o Yosia.

¹⁵Hagala o nyawa aha yoboa o ngï magogurutino deʼ yoriwo ihi goko Ahi Tau. Nako o tau ma ago-agomo gënanga iböto, önanga aha ihi öriki Ngohi o Jou Duru woko Kuaha toni hulokoka ngona onangika. Mata-mata gënanga aha idadi nako önanga igou-goungu ihi ngounu hagala Ahi pareta, o Jou toönanga manga Jou Madutu.”