Read Tobelo O ZAKHARIA 7 Bible Online

O ZAKHARIA 7 - Tobelo bible

O ZAKHARIA 7

¹O wange maiata o Kislew ma mede, enagënanga o mede mahiwo, o taongo maiata magoronaka ma Koano Darius ai paretaka, ma Jou wohi doakoli o behehongo ngohino.

²O Betel manyawa yahulokoka o Sarezer deʼ o Regem-Melekh ikali toönanga manga nyawa ma Jou Duru wo Ko Kuaha Ai Tauika mangale yogahoko Ai barakati.

³Onangö yä huloko yä leha o imam-imamika deʼ o nabi-nabiika, hoko nënanga, ”Kai paraluohi ngomi mio dodora ibinaha ma Jou Ai Tau de mi puaha o mede motoa ma getongo hokä ngomi mia dodiaioka deʼ ma tao-taongo ma dekana?”

⁴Nënanga ma Jou Ai behehongo ibö boa-boa ngohino.

⁵Wato, ”No hiädono o berera nënanga ma nyawaika yongodumu deʼ o imam-imamika, o puaha deʼ o dodora önanga yadodiai o mede mamotoaoka deʼ matumidoka madekana o taongo mori tumidi nënanga ma horomati koiwa Ngohino.

⁶Ma orahö önanga yol̄omo deʼ yokere, önanga ima lingiri ima higihounu mahirete.”

⁷Gënanga wahö heto-hetongo ma Jou itilakuru o nabi-nabi maöraha ipaha-paha maöraha o Yerusalemoka yogogerohi deʼ ma nyawa mata-mata ka dema enanga mata-mata. O öraha gënanga o nyawa duga-duga yogogerua o kapo-kapongoka deʼ o kota ma gilolitino mä iholoioli o korehara il̄e idaduoka deʼ o doporono ma timi-timino o wange madumuniha idaduoka.

⁸Ma Jou Duru woko Kuaha wohi döaka o behehongo nënanga ngohino,

⁹”De ma tao-taongo ipahaika tohi döaka hagala o pareta nënanga Ahi umatika, ’Ngini kiani nia jako iadili, nia dora deʼ nia hayanga deʼ nia hininga maoa-oa nimahi koka nyawaika.

¹⁰Uha niä tuku o bobobao, o ngoha-ngohaka o gohihi ma dutu, hagala o nyawa ma poretino yo gö gogere nia hidogoronaka ngini, ekola o nagona dika manga wowango ihü huha magoronaka. De uha ö nia datoro itotorou nimahi koka nyawaika.’

¹¹Mä Ahi umati manga häeke itogowini deʼ kama moiuku yoluku yoihene; önanga yajumu toönanga manga ngauku hupaya uha yoihene.

¹²Onanga yatogowini toönanga manga hininga hiädono ima tero ma dogowini o helewo. Ngohi duru to ngamo karana önanga ya motekua hagala o dodotoko Tahi döa-döaka onangika deʼ mangekomo o nabi-nabi mahira.

¹³Ngohi tobaluhua toönanga manga niata, karana onangö ihi gihenua maöraha Ngohi tä temo-temo.

¹⁴Hokä o rato, Ngohi tä heharoka önanga hiädono önanga pakisa yogogere hagala o berera maporetino. O tonaka maboburere nënanga idadioka duru kai rïdika moiua yogogere deʼ kama dodöongoro.”