Read Tobelo O MALEAKHI 1 Bible Online

O MALEAKHI 1 - Tobelo bible

O MALEAKHI 1

¹Nenanga ai behehongo ma Jou o Maleakhiika mangale o umati o Israeloka.

² Ma Jou wätemo Ai umatika, ”Ngohi tini dora ngini.” Mä önanga yohaluhu, ”Sarakia Jou nomi dora ngomi?” Ma Jou wohaluhu ”Koigoungua o Esau o Yakub ai riaka? Mä o Yakub Ti dora,

³enahioko o Esau Tidohata. O Esau ai daira deʼ ma doporonoka Tawederoka, deʼ ai tonaka Tohilapahi hagala o aiwani madorouika o tonaka ma kokakahaka.”

⁴O demo maade o Esau aidifauku, hagala o Edom manyawa gënanga yo temo, ”To ngomi mia kota-kota iwederoka, mä ngomi aha mihi gokookaoli,” done ma Jou wohaluhu, ”Onanga yakunu ihi gokookaoli, mä Ngohi aha taruba. Onanga aha yahetongo o ’Berera isetiaokaua’ deʼ o Hoana deʼ o berera yakokorona ma Jou Ai murukä mangale kahi adono-adonika.’ ”

⁵O Israeloka manyawa aha yamake mahirete, deʼ yotemo, ”Igoungu ma Jou wolamoko; Ai kuaha hiadono o Israel matonaka ma poretoka!”

⁶Ma Jou Duru woko Kuaha wätemo o imam-imamika, ”Womatengo o ngohaka wi horomati ai ama, de woma tengo wolö leleani wi horomati ai tuanga. Ngohi nënanga nia Ama; yadodoa ngini nihi horomatiua Ngohi? Ngohi nënanga nia baluhu; yadodoa ngini nihï modongua Ngohino? Ngini nihihikauku Ngohi, mä ngini nileha, ’De madodagi sarakia ngomi mini hikauku Ngona?ʼ

⁷De nihi huba o inomo ipatu-patutua ihi huba o huba mangï mal̄okuoka. Daha ngini nileha, ’De madodagi sarakia ngomi mini legaikaua Ngona?ʼ De nia peseke Ahi huba mangï.

⁸ Nako ngini ni hihihuba Ngohino o aiwani ipilo-piloko, ipopanyake ekola ilugu-lugu, koigoungua gënanga nia manarama ihowono? Abeika nihi döaka o aiwani ma rupa gënanga ma gubernurika! Boteka ünanga aha wosanangi deʼ winï hidiai ngini deʼ kayaoa-oa?”

⁹O öraha nënanga, hei imam-imam, beika ni gahoko ma Jou Madutuika hupaya Unanga wona dora ngone. Unanga aha wobaluhua nia niata, deʼ gënanga nia howono mahirete.

¹⁰Ma Jou Duru woko Kuaha wotemo, ”Iholoi yaoa Ahi Tau mangorana ibeno, hababu kaparahaja ngini nia tokara o uku Ahi huhuba mangï mal̄okuoka. Ngohi tinï igoua nginiika, deʼ toluku Ta tarima nia huhuba.

¹¹Ngohi ihi horomati mangale o hoana deʼ o berera o dunia yamode-modekika. Okiaoka honanga yotuhuku o dupa mangale yahoromati Ahi romanga deʼ ihi huba hagala o huhuba ipatu-patutu, hababu mata-mata o hoana deʼ o berera ihi horomati Ngohi!

¹²Mä ngini nihi hikauku Ngohi karana nia pulono Ahi huba mangï i raganeua, deʼ nihi huba genangoka o inomo ngini nia olu-oluku.

¹³Ni temo, ’Ngone hogihounoka deʼ mata-mata gënanga’, deʼ ngini nihi legaikaua Ngohi. Ngini niao o aiwani ni tohikino, o aiwani ilugu-lugu ekola ipopanyake mangale nihihihuba Ngohino. Ngini nia pikiri Ngohi tomau tatarima nia huhuba gënanga?

¹⁴O lolai i wi daene wo tipu-tipu wohi hihuba ngohino o aiwani ibö baragunaua, nako nia giginimahi dogoronaoka naga o aiwani maoa nihi jä jajioka Ngohino! Hababu Ngohi o Koano Tomo Mulia, deʼ ihi horomati mata-mata o hoana de o berera.”