Read Tobelo O MALEAKHI 2 Bible Online

O MALEAKHI 2 - Tobelo bible

O MALEAKHI 2

¹Ma Jou woko Kuaha wätemo o imam-imamika, ”Nenanga Ahi pareta nginiika:

²Nihi horomati Ngohi deʼ nia manarama. Nako ngini nioluku nihigihene Ahi demo, ngini aha Tinï lolai. Hagala ngini nia totarima hokä o rijiki aha ingali idadi o lolai. Igou-goungu, mata-mata maoa-oa gënanga Talolaioka, karana ngini nio legaikaua Ahi pareta.

³Nia ngoha-ngohaka aha Tä hukumu, deʼ nia biono Tohi nauhu deʼ o aiwani ma ioko ngini nihi huba-huba, deʼ ngini aha ini liliara o ioko ma doomuika.

⁴ Done nihi öriki ngini o pareta nënanga Tohi doakoka, hupaya Ahi jaji o imam-imam, o Lewi aidifauku, kahirahi idadi.

⁵ O jaji gënanga magoronaka Ngohi tohi jaji onangika o ngango isosanangi deʼ i dame-dame, de önanga Tä huloko ihi horomati Ngohi. O öraha gënanga önanga igoungu ihi horomati Ngohi deʼ ihi modongo Ngohino.

⁶Onanga yodotoko madiai, deʼ koihowonua. Onanga yotigi de de Ngohi, de manga hininga iriko-rikoto yanïki Ahi mau. Onangö yä riwo manga ngöe o nyawa mangale yodiaiokauaoli itotorou.

⁷Igoungu o imam-imam manga manarama mangale yodotoko madiai mangale Ngohi, o Jou Duru Tokö Kurutil̄e. Onangika o kawaha kokiani yoleha okia Ahi mau,

⁸o öraha nënanga, ngini, o imam-imam, ni rehenoka deʼ o ngekomo madiai. Hagala nia dodotoko ya tauroka manga ngöe o nyawa mangale yodiai o howono. Ngini nia kiliangoka o jaji Ta dodiai de de ngini.

⁹Done Ngohi ö Tinï diai ngini ini legaikaua mangale o umati o Israeloka karana ngini nihi ngounua Ahi mauika, deʼ karana ngini ni iri-iriki o nyawa maöraha nia dotoko Ahi umati.”

¹⁰Koigoungua ngone mata-mata tongone nanga Ama kamoi? Koigoungua ngone mata-mata wonahidadi o Jou Madutu kamoi? Nako hoko gënanga, yadodoa ngone homahi kopongono o jaji dede hoka gënanga hohi pongono o jaji wadodiai ma Jou Madutu de tongone manga ete deʼ nanga tohora.

¹¹O Yehuda manyawa yatilakuroka ma Jou Madutu Ai jaji de de önanga deʼ yadiai hagala o hali hoboborohono o Yerusalem ma bereraoka deʼ o berera yamode-modekika. Onanga yapesekoka ma Jou Ai Tau wohö hohininga deʼ yokawingi deʼ o ngongoheka yahuba-huba hagala manga gikiri o hoana deʼ o berera mahomoaino.

¹²Tanu hagala o nyawa yododiai hoko gënanga ma Jou wahi titokoka o Israel ma umatino. Tanu önanga ibötohi yanïki deʼ tongone nanga hoana ihi huba hagala o huhuba ma Jou Duru woko Kuahaika.

¹³De nënanga nia manarama mahomoa. Ma Jou Ai huba mangï ngini nia lepa de o köngo; ngini ni ari deʼ nidodora karana ma Jou Ai hininga yadaenua watarima hagala nia huhuba.

¹⁴Ngini nileha yadodoa Unanga woluku watarima. Karana ma Jou wohi öriki ngini nisetiaua ongo hekaika ngini nimi kawi-kawingï maöraha nimä göika. O ngoheka gënanga ani wowango madodiawo, mä ngini nisetiaokaua munangika, ngaroka ma Jou Madutu ai himangoka ngini nijajioka mangale kahirahi nisetia munangika.

¹⁵Koigoungua ma Jou Madutu woma tengo-tengooka wi nihi dadi o röehe moi deʼ o jiwa moi deʼ o ngoheka gënanga? Okia ai dungutu ma Jou deʼ gënanga? Mahomoa koiwa hupaya ngini nia make o ngoha-ngohaka yodadi ma Jou Madutu Ai umati ma dutu. Hö nio goana nia diri, uha hiadono naga tingini nia hidogoronaka yosetiaua manga hekatika.

¹⁶”Ngohi tödohata o ngongoluku,” wato ma Jou o Israeloka manga Jou Madutu. ”Ngohi todohata nako moi ani ngini wodiai mahayanga koiwa gënanga ngoi hekatika. Done nio goana nia diri deʼ uha hakali-kali ni setiaua nia hekatika.”

¹⁷Ngini nidiai ma Jou Madutu wogihounu deʼ nia demo-demo. Mä ngini nileha, ”Sarakia ngomi miwi gihounu ma Jou?” De yo temo, ”Mata-mata o nyawa yodo diai o dorou wa pulono yaoa ma Jou, deʼ Unanga ai hininga ya daene onangika.” Ekola deʼ yoleha, ”Kiaka ma Jou Madutu hi pulono woadili gënanga?”