Read Tobelo O MALEAKHI 3 Bible Online

O MALEAKHI 3 - Tobelo bible

O MALEAKHI 3

¹ Wo haluhu ma Jou Duru woko Kuaha, ”Ngohi aha tihi dingoto Ahi huhüloko mangale wohidiai o ngekomo mangale Ngohi. Done deʼ itodokanino Ngohi, o Jou ngini nihilö lingi-lingiri, aha Toboa Ahi Tauika. Ahi huhuloko ngini niwi hohininga gënanga aha woboa deʼ wohi ngahu Ahi jaji.”

² Mä o nagona yakunu yotongohono ma Jou woboa mawangeoka deʼ woma himatoko Ai diri? Hababu Unanga hokä o gurasi deʼ o haaka wododiai ai uku, deʼ hokä yofoka-foka manga sabongo.

³Unanga woboa mangale wä juru hakimi, hokä o nyawa yaberehi deʼ yatebini o haaka. Hokä womatengo wododiai watebini o gurasi deʼ o haaka hoko gënanga ma Jou Ai huhuloko aha wä tebini o imam-imam hupaya önanga ihi huba o huhuba-o huhuba deʼ madodagi ma Jou woigo-igo.

⁴Done hokä maöraha mahira, ma Jou aha ai hininga yadaene hagala o huhubaika ihi hö huba-huba Unangika mangale o Yehuda deʼ o Yerusalem ma umati.

⁵Wato ma Jou Duru woko Kuaha, ”Ngohi aha toboa nginiika mangale Tinï juru hakimi. Ngohi aha deʼ majapati todadi o hakihi yogogumaterika, hagala o nyawa yo howo-howono, yo hakihi yoelu-eluku, yodiai iadilua ihi doaka manga gaji magoronaka o nyawa yähewa-hewaika, yä tuku o babao-o babao, o gohihi madutu, deʼ o nyawa maporetino, o nyawa mata-mataika ihihö horomatiua Ngohi.”

⁶”Ngohi o Jou, deʼ ngohi tongaliua. Karana gënanga ngini, o Yakub aidifauku, ya hibinahaua.

⁷Hokä nia ete deʼ nia tohora mahira, ngini mata-mata nirehenoka deʼ hagala Ahi tita deʼ nisetiaua nihi dagi. Nimaidulu Ngohino, done Ngohi ö aha toma idulu nginika. Mä ngini nileha, ’Okia kokiani ngomi midiai mangale mima idulu Ngonaika?ʼ

⁸O öraha nënanga Ngohi tini leha nginiika: Kaiyakunu o nyawa iwi tipu ma Jou Madutu? Maraioka dika kowali. Mä ngini nihï tipu Ngohi ö. Ngini nileha, ’Sarakia?ʼ Tohaluhu: O hali o ratuhu moi magoronaka iregu ngimoi nifangu o regu moi deʼ nihi döaka o huhuba.

⁹O hoana de o berera yongodumu ihi tipu Ngohi, done ngini mata-mata i ni daene o lolai.

¹⁰ Nia ao nia huhuba o ratuhu moi iregu ngimoi hupaya naga o inomo deʼ ma boloioka dokengoka, Nihi uji Ngohi, done ngini aha nihi make Ngohi tahelenga o horoga mangora-ngorana deʼ maboboloi ngini deʼ hagala maoa-oa.

¹¹Ngohi aha tamal̄aikaua o kahoho yabinaha nia tonaka ma hasili; hagala ma utu nia angguru aha iwöe mahohoko.

¹²Done ngini aha ini hetongo niutumu mangale o hoana deʼ o berera mata-mata, hababu nia berera idadi o ngï maoa-oa mangale niö gogere.”

¹³Ma Jou wato, ”Nia demo-demo igoungu ihihikauku Ngohi.” ”Mä ngini nileha, ’Okia ngomi mitemo mangale Ngoha?ʼ

¹⁴Ngini nitemo, ’Parasuma dika hopuji ma Jou Madutuika. Okia maguna hadiai tongone nanga manarama ma Jouika Duru woko Kuaha, ekola hohi dumutu Unangika ngone homa toduba tongone nanga howono?

¹⁵Ngone hamake mahirete hagala o nyawa ima ede-edenge youtumu. O nyawa madorou duga-duga kai dogoua mata-mata ka deʼ ma enanga, mä nako önanga ya uji ma Jou Madutu Ai sabari deʼ yodiai o dorou, önanga kayo otana dika.’ ”

¹⁶Daha hagala o nyawa iwï modo-modongo ma Jou ima ketemo moi deʼ moiika. Ma Jou woihene deʼ wohininga okia önanga yotemo. Hagala o nyawa iwi hö horomati Unanga deʼ iwi modongo Unangika, itulihi ai römanga moi o buku watuli-tulihi magoronaka naga Ai himangoka.

¹⁷Ma Jou Duru woko Kuaha wotemo, ”Onanga aha yodadi Ahi umati. Mawange Ngohi todiai, önanga aha yodadi to Ngohi ma dutu Ta haya-hayanga. Ngohi aha ta dora önanga, hokä woma tengo o ama wä dora o ngohaka imahi gogilaongo Unangika.

¹⁸Ahi umati aha ya makeoli imakohowono manga wowango o nyawa maoa de o nyawa madorou manga hidogoronaka, o nyawa yo puji-puji Ngohiino deʼ kowali manga hidogoronaka.”