Read Tobelo O MATIUS 1 Bible Online

O MATIUS 1 - Tobelo bible

O MATIUS 1

¹Nënanga o Yesus Kristus aiete de aitohora manga roma-romanga, o Yesus Kristus, o Daud aidifauku, o Abraham aidifauku. O Abrahamoka hiädono o Daud o Yesus aiete de aitohora manga roma-romanga hoko nënanga:

²O Abraham aingohaka o Ishak, o Ishak aingohaka o Yakub, o Yakub aingohaka o Yehuda deʼ airiadodoto, o Yehuda aingohaka o Peres deʼ o Zerah (manga ayo amiromanga o ngo Tamar), o Peres aingohaka o Hezron, o Hezron aingohaka o Ram, o Ram aingohaka o Aminadab, o Aminadab aingohaka o Nahason, o Nahason aingohaka o Salmon, o Salmon aingohaka o Boas (ngoi ayo o ngo Rahab), o Boas aingohaka o Obed (ngoi ayo o ngo Rut), o Obed aingohaka o Isai, o Isai aingohaka ma Koano Daud.

⁶ O Daudoka hiädono maöraha o Israel manyawa yä umo o Babelika, itulihi o roma-romanga hoko nënanga: O Salomo (ngoi ayo ihira o Uria ngoi hekata) aingohaka o Rehabeam, o Rehabeam aingohaka o Abia, o Abia aingohaka o Asa, o Asa aingohaka o Yosafat, o Yosafat aingohaka o Yoram, o Yoram aingohaka o Uzia, o Uzia aingohaka o Yotam, o Yotam aingohaka o Ahas, o Ahas aingohaka o Hiskia, o Hiskia aingohaka o Manasye, o Manasye aingohaka o Amon, o Amon aingohaka o Yosia, o Yosia aingohaka o Yekhonya deʼ airiadodoto.

¹²O Israel manyawa yäumo o Babelika, gangoka de yaino hiädono o Yesus womakil̄au itulihi o roma-romanga nënanga: O Yekhonya aingohaka o Sealtiel, o Sealtiel aingohaka o Zerubabel, o Zerubabel aingohaka o Abihud, o Abihud aingohaka o Elyakim, o Elyakim aingohaka o Azur, o Azur aingohaka o Zadok, o Zadok aingohaka o Akhim, o Akhim aingohaka o Eliud, o Eliud aingohaka o Eleazar, o Eleazar aingohaka o Matan, o Matan aingohaka o Yakub, o Yakub aingohaka o Yusuf o ngo Maria ami rokata. Deʼ o ngo Mariaino gënanga o Yesus womakil̄au iwihi ahoko o Kristus.

¹⁷Hoʼ o Abrahamoka de yaino hiädono o Daud, mata-mata naga o bäta ngimoi de iata. O Daudoka de yaino hiädono o Israel manyawa yäumo o Babelika naga o bäta ngimoi de iata. Deʼ o Israel manyawa yäumo o Babelika de yäino hiädono o Kristus womakil̄au nagaoli o bäta ngimoi de iata.

¹⁸ O Yesus Kristus womakil̄au majarita hokonënanga. Ngoi ayo o ngo Maria, imä mäne de o Yusuf. Mä o Yusuf de ngo Maria yokawingowahi inyataka o ngo Maria o ngohaka mohiaoka. (O Yusuf wohi orikua o ngo Maria o ngohaka mohiao karana ma Jou Madutu ai Womaha makuaha.)

¹⁹O Yusuf, amimamäne gënanga, o nyawa moi salalu wohi ngounu o agama mau-mau. Hoʼ una womau watöaka mangamamäne, mä kawapongono, hupaya o ngo Maria o mal̄eke mamäkeua yowöe-wöe manga himangoka.

²⁰O Yusuf kawa tiba-tibangohi o hali gënanga, yohutuku una wonänere. Ai nänere magoronaka, una wamäke ma Jou aimalaekat womatëngo de iwitemo unangika, ”Yusuf, o Daud aidifauku, uha nohawana nokawingi de o ngo Maria; hababu o ngohaka amiröehoka gënanga idadi de ma Jou Madutu ai Womaha makuaha.

²¹ O ngo Maria aha momägilianga deʼ amingohaka o ngohaka o nauru womatëngo. O ngohaka gënanga kokiani nihiromanga o Yesus, karana Unanga aha wahihalamati Ai umati yoböbaradohaka.”

²²Mata-mata gënanga idadi hokogënanga hupaya imadadi hokä okia ma Jou wotemo, ainabi ihingahu, enagënanga,

²³ ”Momatëngo o moholehe maboro muna aha o ngohaka mohiao, deʼ momagilianga amingohaka o nauru womatëngo. O ngohaka gënanga aha iwihi romanga Imanuel.” (Imanuel ganga o Ibranioka manga demo mamangarati, ”Ma Jou Madutu naga dede ngone”.)

²⁴O Yusuf womomikino, de wadiai hokä ma Jou aimalaekat iwihi ngahu unangika. O Yusuf wokawingi de o ngo Maria.

²⁵ Mä hokokia madekana o ngo Maria moma giliangowahi, o Yusuf womahi ganua de o ngo Maria. Deʼ o ngohaka gënanga womahiadonino, o Yusuf wïromanga o Yesus.