Read Tobelo O MATIUS 10 Bible Online

O MATIUS 10 - Tobelo bible

O MATIUS 10

¹O wange moiuku o Yesus wäahoko yangimoi de yahinoto iwinö ninïki imatoomu. Deʼ Unanga wahidöaka onangika o kuaha la yaduhu o womaha madorou deʼ yahitogumu hagala rupa o panyake, deʼ hagala rupa o röehe makuranga.

²O rasul yangimoi de yahinoto manga romanga; madodihiraka, o Simon (iwi hetongoli o Petrus) de aidodoto o Andreas, daha o Yakobus de aidodoto o Yohanis, ganga o Zebedeus aingoha-ngohaka.

³Ipaha o Filipus deʼ o Bartolomeus, de o Tomas, deʼ o Matius, o soungu wogaho-gahoko, de o Yakobus o Alfeus aingohaka, deʼ o Tadeus;

⁴deʼ mabobaha o Simon, o berera ma Gogöana deʼ o Yudas Iskariot wïhuku-hukunu o Yesus.

⁵O rasul-rasul yangimoi de yahinoto gënanga o Yesus wähuloko de yamäke o behehongo hokonënanga, ”Uha nioiki genangika nako o Yahudiokaua manga daera. De uha niaika o Samaria makota-kotaika.

⁶Mä nioiki o Israel manyawaika, niädumutu önanga yohöhihihanga.

⁷ Niahingahu onangika ma Jou Madutu womulaengoka wopareta hokä o Koano.

⁸Niahitogumu o nyawa yopopanyake; niahiwango o nyawa yohone-honengoka; niahitogumu o nyawa yäpado-pado, deʼ niaduhu o womaha madorou. Ngini niatarimaka mata-mata gënanga de mabobangu koiwa. Hoʼ, nginiö niahidöaka de mabobangu koiwa.

⁹Uha niao o tiwi gurasi, o tiwi haäka ekola o tiwi tabaga.

¹⁰ Uhali nimägao o popoje o tiwi mangï, ekola o pakeanga dobiki hinoto niadodagi magoronaka, ekola o hapato, ekola o diki-diki. Hababu o nyawa yomomanarama, kokiani yahidöaka, okia manga paralu.

¹¹Nako ngini niädono o kota ekola o kapongo, niwilingiri womatëngo kawömodeke winïtarima ngini. Nigogere dede ünanga hiädono ngini nima gorakoli.

¹²Nako ngini niwohama o tauika, nitemo o tau madutuika, ”Tanu ma Jou winihi barakati ngini.”

¹³Nako o tau manyawa gënanga inï tarima ngini, mal̄aika niatabea gënanga igogere onangoka. Mä nako önanga inïtarimaua ngini, niakilioli niatabea gënanga.

¹⁴ Nako naga o tau ekola o kota inïtarimaua ngini ekola inihigihenua ngini, niamal̄a o ngï gënanga deʼ o kafo nial̄ou mahoatil̄e nia hurerouku.

¹⁵ Nio hohininga! O Kiamati ma Wangeoka, o Sodom deʼ o Gomora manyawa aha iholoi igapanga ma Jou Madutu wäapongo, ngaro de o berera gënanga manyawa!”

¹⁶ ”Niohininga nënanga: Ngohi tinïhuloko hokä o duba imägaku-gakunua, o serigala ihohatera mahi dogoronaka. Ngini kokiani nisawaro de nimä göana hokä o dodiha deʼ nia hininga irikoto hokä o namodara.

¹⁷ Nimä göa-göana, hababu ngini aha inïtagoko deʼ inïao o juruhakimi manga himangika. Ngini aha inïhangihara o pupuji matauoka.

¹⁸Ngini aha inïao o popareta deʼ o kokoano manga himangika, karana ngini Nihinöninïki. Deʼ genanga o ngëkomo moi nginika la nihidöaka o hakihi mangale Ngohi, onangika deʼ o nyawa iwinäko-näkoua ma Jou Madutu.

¹⁹Mä nako ngini inïao la yalingiri niahowono ekola niadiai, uha nihawatere okia aha ngini kokiani nitemo, ekola sarakia kokiani ngini nitemo. Hababu okia kokiani ngini nitemo gënanga aha inihi ngahu nginika nako maöraha yadono.

²⁰Karana yotemo-temo o örahagënanga nginiua, duga-duga o Ama ai Womaha o horogaka, inihi ngahu nginika, de aha nitemo-temo.

²¹ Aha idadi o nyawa aha yahilapahi manga riadodoto mahirete la yätoma. Deʼ genanga aha idadi o ama de o ngohaka manga hidogoronaka. O ngoha-ngohaka aha yälawani manga ayo de manga ama, deʼ yahilapahi önanga la yätoma.

²² Ngini aha mata-mata o nyawa inïdohata, karana ngini nihinïki Ngohi. Mä o nyawa yotongohono hiädono mabaha aha yohalamati.

²³Nako ngini inïaniaya o kota moioka, nipiringana o kota mahomoa ikali. Ngohi tinihi ngahu nginika: Konia mataua niodulu o Israel makota mata-mata, de o Nyawa manga Ngohaka woböaka.

²⁴ O muri woholoiua wolamoko de aiguru, deʼ wolöleleani woholoiua wolamoko de aituanga.

²⁵ Yaoaka nako o muri womatëngo wodadi hokä aiguru, deʼ womatëngo wolöleleani hokä aituanga. Nako o ama o tauoka iwihiromangoka o Beelzebul, okiali done matau madol̄a. Ona aha yahi romanga iholoi itorou!”

²⁶ ”Uha niämodongo o nyawaika. Koiwa niaga i iu-iunu, aha koya mäkeua, deʼ koiwa naga irörahasia aha koihiorikua.

²⁷Okianaga Ngohi tinihi ngahu nginika o hagahutuoka, kokiani niogilioli nihingahu o wange-wange. Deʼ okia Tinihi hudu niangaukika, nihingahu okiaikadika nihiado-adono!

²⁸Uha niämodongo yatoma niaröehe, mä yokuahaua, yatoma niajiwa. Niwï modongo ma Jou Madutu wokuaha wabinaha kayaoa o röehe, yaoa o jiwa o naraka magoronaka.

²⁹O totoai ngai hinoto yakunu yaija o rupiaratuhu moi. Mä ngaro hoko gënanga, kao ngai moiö de magogo i tifaua o tonakuku, nako nia Ama aimauowahi.

³⁰Nia tadauru nia häekoka mata-mata ietongoka.

³¹Hababu gënanga, uha nihawana! Ngini niaija iholoi de o totoai!”

³²”O nagona hönanga imangaku yowöe-wöe manga himangoka önanga ihinöninïki Ngohi, Ngohi ö aha tomangaku önanga Ahi Ama o horogaka aihimangoka, önanga ihinöninïki Ngohi.

³³ Mä o nagona hönanga yowöe-wöe manga himangoka imahi pongono önanga ihinö ninïki Ngohi, onangö aha Tahipongono Ahi Ama o horogaka ai himangoka.”

³⁴”Uha niatobote, Ngohi toao o dame o duniaino. Ngohi to aoua o dame, mä o galawani.

³⁵ Ngohi toböa idadi o hababu o ngohaka o nauru wïlawani aiama, de o ngohaka o ngoheka momilawani ngomi ayo, deʼ mamol̄oka momilawani ngomi hunungu.

³⁶Igoungu, aha idadi o haturü maago-agomo, ganga kaororiadodoto mahirete.

³⁷O nyawa o nagona yädora manga ama ekola manga ayo, iholoi de Ngohi, ipatutua yodadi ihinöninïki. Kogenangoli o nagona yädora manga ngohaka o nauru, ekola manga ngohaka o ngoheka, iholoi de Ngohi ihïdora.

³⁸ Deʼ o nagona yoluku yamoku manga salib deʼ ihinïki Ngohi, ipatutua yodadi ihinöninïki.

³⁹ O nyawa yoriwo manga ngango, aha i hihanga manga ngango, mä o nyawa ihihanga manga ngango karana yosetia Ngohino, aha yamäke mangangango.”

⁴⁰ ”O nyawa o nagona inïtarima ngini, ganga ihitarima Ngohi. Deʼ o nagona ihitarima Ngohi, ganga iwitarima Una wohihulo-huloko Ngohi.

⁴¹O nyawa o nagona yätarima o nabi karana ünanga o nabi, aha yatarima o nabi mahewa. Deʼ o nagona yätarima o nyawa maoa womatëngo, karana ünanga yaoa, aha yatarima o nyawa maoa mahewa.

⁴²O nagona hönanga yahiokere, ngaroka o akere mamäta dika, o nyawa wohina de wohuhuhaika, karana unanga wohinöninïki Ngohi, ningaku maraioka aha yatarima manga hewa!”