Read Tobelo O MATIUS 11 Bible Online

O MATIUS 11 - Tobelo bible

O MATIUS 11

¹Ipaha o Yesus wohidöaka o hidumutu-hidumutu yangimoi de yahinoto iwinöninïkika gënanga, Unanga wamal̄a o ngï gënanga. Unanga woiki wodotoko deʼ wohingahu ma Jou Madutu aibehehongo, o kota imakokadateke wögetongo.

²O Yohanis Woohi-ohiki naga o bui magoronakahi, woihene mangale o Kristus aimanarama. Deʼ unanga wähuloko iwinö ninïki yoiki o Yesusika la iwileha,

³”Bapa Ngona nënanga aha noböa imoteke ma Jou Madutu aijaji, ekola ngomi kokiani mia damä o nyawa mahomoa?”

⁴O Yesus wohaluhu, ”Nima kilioro o Yohanisika, deʼ niwihi ngahu okia niamäke deʼ okia niihene:

⁵ O nyawa yopiloko imahi öriki, o nyawa yolugu-lugu imädagi, o nyawa yäpado yotogumu; de o nyawa yätopongono imahihene, o nyawa yohonenge yowango okali, deʼ o Abari ma Oa ma Jou Madutuoka ihingahu o nyawa mihikinika.

⁶Youtumu o nyawa yomau ihi tila Ngohi de mahababu ihi mäkeua!”

⁷De o Yohanis aihuhuloko gënanga yopahaka, o Yesus womuläenge wätemo o nyawa manga ngöe-ngöeika mangale o Yohanis, wato, ”Ngini nioiki o tonaka ikokakahaika okia niolega? O momo o utumoi o hidal̄oko yawüwuwu?

⁸Ngini nioiki okia niolega? Womatëngo wapäke o pakeanga mahöhailoa? O nyawa yapäke-päke o pakeanga mahöhailoa gënanga yogogere o kadatoka!

⁹Hoʼ yadodoa hongini nioiki o tonaka ikokakahaika? La niwi lega manabi womatëngo? Itiai, iholoioli de o nabi moi.

¹⁰ Hababu o Yohanis genangala Ma Jou Ai Demo ma Buku ihingahu, Ma Jou Madutu wotemo, ’Ne ünanga Ahi huhuloko, Ngohi tïhuloko ünanga wohira de ngona hupaya ünanga wonï belenga o ngëkomo mangale Ngona.’

¹¹Nio hohininga! O duniaka nënanga moiua naga o nyawa iholoi yolamoko de o Yohanis Woohi-ohiki. Ngaro hokogënanga, o nyawa duru yoeteke ma Jou Madutu aiumati mahidogoronaka, önanga gënanga iholoi yolamoko de o Yohanis.

¹² Madero o Yohanis wohiabari aidodötoko hiädono o örahanënanga, o nyawa ihidailako yakuaha de yätatoko ma Jou Madutu aiumati.

¹³Hiädono o Yohanis aiböa mata-mata o Musa aitita de o nabi-nabi manga dodötoko, ihiraka ihingahu mangale o hali-o hali kokiani idadi.

¹⁴ Deʼ nako ngini nimau ningaku o Yohanis genangala o Elia, kiaka aiböa ihi ngahuoka ihira.

¹⁵Nako de nia ngauku niihene!

¹⁶De okia kokiani Ngohi tahitero o nyawa o örahanënanga? Onanga hokä o ngoha-ngohaka yogogeruku o paharoka. O doomu moi yäböaka o doomu mahomoaika,

¹⁷’Ngomi mimusikoka miarame-rameoko, mä ngini nironggeua! Ngomi mihinyanyioka o duka manyanyi miainga-ingara mä ngini niariua!ʼ

¹⁸O Yohanis waino — ünanga wopuaha deʼ wokerua o angguru; deʼ o nyawa yato, ’Unanga o hetanga iwï ngohamika!ʼ

¹⁹Oraha nanga o Nyawa manga Ngohaka, waino — Unanga wol̄omo deʼ wokere; ho o nyawa yato, ’Niamäke o nyawa gënanga! Wokal̄il̄u, wotoba daluku, o soungu yogaho-gahoko manga dodiawo, deʼ o baradoha manyawa manga dodiawo.’ Ngarokö hokogënanga, ma Jou Madutu aisawaro to ëna mahasiloka aha inyata igoungu.”

²⁰Deʼ o Yesus womuläenge wöngelo o kota-kota, kiaka genangoka Unanga iwöe wodiai o nonako ihëra-hëranga. Hababu o kota manyawa genangoka yoluku yotoba, mangale o baradoha.

²¹ ”Nibodito ngini, Korazim! Deʼ ngini Betsaida manibodito! Hohiade nako o nonako ihëra-hëranga idiai o Tirus deʼ o Sidon makotaka, hokä idiaioka ngini niahidogoronaka, marai o Tirus deʼ o Sidon manyawa, madekanoka yotoba mangale manga baradoha deʼ yapäke o huha mapakeanga inoli yogelenga o kafo manga häekuku.

²²Niohohininga o Kiamati ma Wangeoka o Tirus deʼ o Sidon manyawa de ngini, ahao o Tirus deʼ o Sidon manyawa iholoi igapanga ma Jou Madutu wä apongo!

²³ Deʼ ngini, Kapernaum! Boteka ngini aha inïtede hiädono o horogail̄e? Kowali! Mä ngini aha inïumo o narakaika! Hababu ade-ade nako o nonako ihëra-hëranga, idodiaioka niahidogoronaka gënanga de idiai o Sodom makotaka, o Sodom gënanga kanaga ohi hiädono o öraha nënanga!

²⁴ Niohohininga, o Kiamati ma Wangeoka, o Sodom manyawa de ngini, ahao o Sodom manyawa iholoi igapanga ma Jou Madutu wä apongo!”

²⁵O örahagënanga o Yesus womä niata, ”Ama, o Jou nakokuaha o dihanga deʼ o dunia! Ngohi totemo tarima kasi Ngonaika karana mata-mata gënanga Ngona narahasia o nyawa yososawaroika, deʼ o nyawa yohohakolaika, mä Ngona nahidumutu o nyawa yohohakola ikaua.

²⁶Genangala Ama anihininga isanangi.”

²⁷ Deʼ o Yesus wotemo, ”Hagala moi-moi o Ama wohilapahioka Ngohino. Mahomoa de o Ama, kamoiö de o nyawa iwi näkoua ma Ngohaka. Mahomoa de ma Ngohaka, moiua iwinäko ma Ama, deʼ o nyawa o nagona ma Ngohaka wahinäko ai Ama geönanga iwi näko ma Ama.

²⁸Niaino Ngohino, ngini mata-mata inïbole-boleoka, deʼ nia mäo niagina madubuho; Ngohi aha tohidöaka nginika o röehe maguwini.

²⁹ Niamoteke Ahi pareta deʼ nimädotoko Ngohino. Hababu Ngohi nënanga Ahi hininga ibole deʼi poluluku, de ngini aha niamäo niaröehe iuwini.

³⁰Karana To ngohi ahi pareta nisanangi, deʼ o gina Tinihi tagongo nginika iuwini.”