Read Tobelo O MATIUS 12 Bible Online

O MATIUS 12 - Tobelo bible

O MATIUS 12

¹ Mamoiuku o Yahudioka manga Puji mawangeoka, maöraha o Yesus wakaino o gandum madumule madatekino, de iwinö ninïki yautuku o gandum gënanga, deʼ yo ol̄omo, hababu önanga yähahini.

²Maöraha o Farisi manyawa yämäke, önanga iwitemo o Yesusika, ”Namäke! ininöninïki yatilakuru nanga agama matita, de yodiai ilara-laranga o Yahudioka manga Puji mawangeoka.”

³ O Yesus wohaluhu, ”Komaiwahi ngini niabasa mangale okia o Daud wodiai maöraha ünanga deʼ ainyawa yähahini?

⁴ Una wowohama ma Jou Madutu ai Tauika; deʼ waol̄omo o roti ihihuba-huba ma Jou Madutuika. Enahioko imoteke nanga agama matita, o Daud de ainyawa yakunua yaol̄omo o roti gënanga — duga-duga o imam-imam dika yakunu yaol̄omo.

⁵ Ekola komaiwahi niabasa o Musa aititaoka, kiaka o Yahudioka manga Puji mawange magetongo o imam-imam yomanarama ma Jou ai Tauoka, yatilakuru o Yahudioka manga Puji madatoro, mä yahihowonua?

⁶Nia takihiri okia Ngohi totemo nënanga: nengoka naga iholoi ilamoko de ma Jou ai Tau.

⁷ Ma Jou Ai Demo ma Buku magoronaka itulihi: O hayanga de o dora dika Ngohi tömau, mä o aiwani hihuba-hubaua. Nako naga igou-goungu nimangarati o demo nënanga, marai ngini aha niahihowonua o nyawa yahowo-howonua.

⁸Karana o Nyawa manga Ngohaka wakuaha o Yahudioka manga Puji mawange.”

⁹O Yesus wamal̄a o ngï gënanga deʼ woiki o pupuji matauika.

¹⁰Genangoka naga womatëngo aigiama mahononga ihonenge. Yamuruono naga yomau yalingi-lingiri o Yesus aihowono, yoleha Unangika, ”Yakunu o nyawa hahitogumu o Yahudioka manga Puji mawangeoka?”

¹¹ O Yesus wohaluhu, ”Hohiade naga niahidogoronaka womatëngo aiduba gahumu moi, deʼ o Yahudioka manga Puji mawangeoka o duba gënanga itifa o baiti maluku-lukuku; sarakia maduba madutu gënanga wohidailakoua, wohihupu o duba gënanga o baiti magoronail̄e?

¹²Aa, o nyawa iholoi iragane de o duba! Hoʼ, nako hokogënanga, yakunu o nyawa häriwo o Yahudioka manga Puji mawangeoka.”

¹³Ipaha o Yesus wïtemo o nyawa aigiama i hone-honengika gënanga, ”Nohi döakino anigiama.” O nyawa gënanga watöakika aigiama, deʼ aigiama gënanga i togumu, hokä aigiama mahonongali.

¹⁴Mä o Farisi manyawa yamal̄a o pupuji matau gënanga deʼ ima teke fakati la iwitoma o Yesus.

¹⁵O Yesus wohiöriki o Farisi manyawa manga adekati itorou Unangika. Hoʼ Unanga genangokadau de womäjobo deʼ manga ngöe o nyawa iwinïki. Deʼ Unanga wahitogumu mata-mata o nyawa yopopanyake.

¹⁶Mä Unanga wäduhunu önanga ihingahu o nyawa mahomoaika mangale Unanga.

¹⁷Deʼ hokogënanga idadi hokä okia ma Jou Madutu wotemo, de ma Nabi Yesaya wohi ngahu,

¹⁸ ”Ne Unanga Ahi huhuloko ti irikoka, o nyawa tïdora-dora deʼ Ahi hininga yadäene. Ahi womaha aha tihidöaka Unangika, Ahi adili aha wohingahu hagala o hoana manyawaika.

¹⁹Unanga aha woributuua ekola wopöaka, ekola wopidato o ngëkomo maago-agomoka.

²⁰O tiba ipugi-pugiluku aha koitobikua o posi kai rongouku aha koihonengua. Una aha wogegoto hiädono o adili ihi gogere;

²¹hagala o hoana manyawa aha imahi nganono Unangika.”

²²Ipahaika iwiao o Yesusika womatëngo wopiloko deʼ womou karana o womaha madorou iwikuaha. O Yesus wihitogumu o nyawa gënanga hiädono ünanga wakunu wotemo deʼ womahi öriki.

²³Mata-mata o nyawa yohëranga deʼ yotemo, ”Boteka Unanga nënanga o Daud ai Ngohaka inahi jäjaji gënanga?”

²⁴ O Farisi manyawa yoihene gënanga, de önanga yohaluhu, ”O nyawa nënanga wakunu waduhu o womaha madorou duga-duga, karana o Beelzebul, o womaha madorou manga häeke, iwihidöakoka o kuaha gënanga Unangika.”

²⁵O Yesus wanäko o Farisi manyawa gënanga manga dibanga. Hoʼ Unanga wätemo onangika, ”Nako o negara moi imakokitingaka, o doomu-o doomu magoronaka imateke roributu, o negara gënanga aha itedekanua deʼ ikiliangoka. Deʼ moi o kota ekola o taumoi madol̄a, de imakokafara, de imakokalawani aha iwedere.

²⁶Kogenangoli oIbilihi mapopareta magoronaka; nako o doomu moi yaduhu o doomu mahomoa, done o Ibilihi mapareta gënanga itinga-tingakoka, deʼ aha iruba.

²⁷Ngini nitemo Ngohi taduhu o womaha madorou karana o Beelzebul makuaha. Nako hokogënanga de o nagona manga kuaha, inïnöninïki yaduhu o womaha madorou? Inïnöninïki mahirete, ihinyata igoungu ngini niahowono!

²⁸Mä Ngohi taduhu o womaha madorou de ma Jou Madutu ai Womaha makuaha. Deʼ genanga mamangarati ma Jou Madutu womulaengoka wopareta niahidogoronaka.

²⁹Sarakia o nyawa yakunu yöngohama womatëngo wokua-kuata ai tau magoronaika, de yaora aiarata, nako ünanga ihiraua iwi liko o nyawa wokua-kuata gënanga? Iwi likoka, daha unanga wakunu waora aiarata.

³⁰ O nyawa Ngohinoua yoböa, igoungu ihilawani Ngohi. Deʼ o nyawa ihiriwoua Ngohi, igoungu yakilianga Ahi manarama!

³¹Hababu gënanga, la nihiöriki, nako o nyawa o baradoha yodiai ihi demo o hikauku, önanga kayamäke o apongo! Mä nako önanga ihikauku ma Jou Madutu ai Womaha, önanga yamäkeua o apongo!

³² Nako o nyawa yotemo okianaga iwilawani o Nyawa manga Ngohaka, önanga yamäke o apongo, mä nako önanga ihikauku ma Jou Madutu ai Womaha, önanga yamäkeua o apongo, kayaoa o örahanënanga de mabahaka!”

³³ ”Nako homau hamäke mahohoko yaoa, kokiani magota mautu iburere. Nako magota mautu iburereua, mahohoko mai torou. O gota o utu moi iburere de iburereua, hanäko mahohokoka.

³⁴ Ngini o nyawa madorou, sarakia ngini yakunu nihidemo okia naga maoa, nako ngini itorou? Okia niauruiha o demo ihupu, genangala niahiningaka de ihupu ikopoa!

³⁵O nyawa maoa, ihidemo okianaga maoa, karana önanga yäomanga de o oa. Ho de o nyawa madorou ihidemo okianaga madorou, karana önanga yäomanga o dorou.

³⁶Hoʼ, niohohininga: o Kiamati ma Wangeoka, o nyawa moi-moi kokiani imahitagongo yohaluhu moi-moi mangademo mafaidä koiwa-iwa.

³⁷Hababu niademo-demo mahirete, aha yapäke de yaputuhu ngona nahowono ekola kowali.”

³⁸ Ipahaino yamuruono naga o agama maguru deʼ o Farisi manyawa yotemo, ”Bapa Guru, ngomi mio mau mia mäke Bapa nodiai o nonako i hëra-hëranga.”

³⁹ ”Duru itorou deʼ yotoba lawani, o nyawa o örahanënanga!” o Yesus wohaluhu. ”Ngini nigahoko Ngohi todiai o nonako ihëra-hëranga? Ngini aha kamoiö de inihi döakua o nonako ihëra-hëranga, duga-duga moi ma Nabi Yunus ainonako ihëra-hëranga.

⁴⁰ O Yunus wogogere o wange hange de o hutu hange o nawoko maago-agomo mamämata magoronaka. Kogenangoli o Nyawa manga Ngohaka aha wogogere o wange hange de o hutu hange o dunia mamämata magoronaka.

⁴¹ O Kiamati ma Wangeoka, o Niniwe manyawa aha yomomiki kamamoi imakutuono de o nyawa o öraha nënanga deʼ yahihowono önanga. Hababu o Niniwe manyawa yotoba yodiai okaua o baradoha, maöraha o Yunus woriwayati onangika. Mä orahanënanga nengoka naga iholoi wolamoko de ma Nabi Yunus!

⁴² O Kiamati ma Wangeoka, makoano ngoheka o Koreharauku aha momomiki kamamoi imakutuono de o nyawa o öraha nënanga, deʼ munanga mahihowono. Hababu mangale momau moihene ma Koano Salomo wobobarija aidodötoko, makoano ngoheka gënanga madiai o dodagi magogurutika, o dunia mabobahaka de maino. Mä örahanënanga nengoka naga iholoi wolamoko de ma Koano Salomo!”

⁴³”Orahaokia o womaha madorou iwimal̄aka womatëngo, o womaha madorou gënanga yakokiloliti o ngï madüdudungu imahi lingiri o ngï la imahibatongo, mä imahimäkeua o ngï.

⁴⁴Hababu gënanga ënanga itemo, ’Ngohi aha togilioli o tau kiaka ngohi tatinga-tingakoka.’ De imahi adonika dokengoka, o tau gënanga ihomoa, itebini, deʼ ihidiaioka.

⁴⁵Deʼ enanga ioiki, deʼ yaooli o womaha tumidi mahomoa iholoi itorou de ënanga. Ipaha o womaha madorou gënanga iwi ngohamoli manyawaika gënanga, deʼ igogere genangoka. Deʼ mabaha o nyawa gënanga iholoi itorou de madodihiraka. Kogenangoli aha idadi de o nyawa madorou o öraha nënanga.”

⁴⁶O Yesus kama gogiriahi imakoketemo de o nyawa manga ngöe gënanga, ngoi ayo deʼ airiadödoto yoböa. Onanga ihigokoino maporetoka de ihidailako la yakunu imateke ade-ade de Unanga.

⁴⁷Womatëngo yowöe-wöe manga hidogoronaka gënanga wïtemo o Yesusika, ”Bapa, ngoni ayo deʼ aniriadödoto naga doka maporetoka. Onanga yömau imateke ade-ade de Ngona Bapa.”

⁴⁸Hoʼ o Yesus wohaluhu, ”O nagona Ngohi ayo? O nagona Ahi riadödoto?”

⁴⁹Daha Unanga wätumutu iwinö ninïkika deʼ wotemo, ”Nenangala Ngohi ayo deʼ Ahi roriadödoto.

⁵⁰O nyawa yadodiai ahi Ama o horogaka Ai mau, geönanga Ahi riadödoto o nauru, de Ahi biranga, deʼ Ngohi ayo.”