Read Tobelo O MATIUS 13 Bible Online

O MATIUS 13 - Tobelo bible

O MATIUS 13

¹O wange gënanga dika o Yesus wamal̄a o tau gënanga de woiki o taaga madatekika deʼ wogogeruku genangokadau.

² Duru manga ngöe o nyawa imatoomu iwihigilolitino o Yesus, karana gënanga Unanga woharene o ngotiril̄e de wogogeruku o ngotiri magoronaka, ho deo nyawa yowöe-wöe gënanga imaokoino o dowongioka.

³Hoʼ o Yesus wädotoko o hali mangöe onangika de wapäke o hitotero. ”Womatëngo wototumule woiki wohibarihi o gihihi,” hoko gënanga o Yesus womuläenge Ai jarita.

⁴”Wohibarihi magogiriaka, naga magihihi itifa o ngekomuku. Hoʼ o totaleo yaino deʼ o gihihi gënanga yamatäka yaol̄omo.

⁵Nagaoli itifa ihohelewouku, matonaka mahuhutulu. O gihihi gënanga itaiti iwango karana matonaka ikuranga.

⁶Mä de o wange iböail̄e, magihihi itori-torioka gënanga imuläenge imaai, ipaha itoolenge deʼ ihonenge, karana mangutuku iwohama ilukuukua.

⁷Nagali magihihi itifa o momo mahohihikauku. O momo mahohihika gënanga iwango deʼ ihi dehoto yapakiti, magihihi itori-torioka gënanga hiädono ihonenge.

⁸Mä nagaoli magihihi itifa o tonaka iboburereuku, hoʼ ihohoko; naga ilio hara maratuhu moi, nagahara mamoributanga, deʼ nagali hara mamoruange.”

⁹Iböto wohi jarita o hitotero gënanga, o Yesus wotemo, ”Nako denia ngauku, niihene!”

¹⁰Ipahaino o Yesus iwinö ninïki yaino deʼ yoleha Unangika, ”Yadodoa ho Bapa napäke o hitotero, nako noade-ade de o nyawa yowöe-wöe gënanga?”

¹¹O Yesus wohaluhu, ”Hababu ngini inihidöakokao ngongike la nianako ma Jou Madutu wopareta marahasia, hode onangika kowali.

¹² Karana o nyawa de ma enangoka, aha yahidöaka i holoi iwöeoli, deʼ onanga aha yoholoi. Mä o nyawa manga kia-kiaua, de naga mahuhutulu onangoka maaha yal̄ë.

¹³Hababu genangala Ngohi tapäke o hitotero nako Toade-ade de o nyawa yowöe-wöe, karana ona yölega, mä hokä o nyawa imahi mäkeua; de ona yoihene mahokä o nyawa yoihenua deʼ imangaratiua.

¹⁴ De gënanga idadi hokä ma Nabi Yesaya mahirahi de wohingahuoka, ’Ma Jou Madutu wotemo: Onanga aha kahoko genangika yoihene mä i mangaratiua; önanga aha kahoko genangika yapulono mä okia idadi koya näkoua.

¹⁵Hababu manga dibanga o nyawa ne önanga idadioka ibongono, manga ngauku i dadioka yatopongono deʼ manga lako iruhutoka. Nënanga idadi hupaya manga lako uha i mahimäke, manga ngauku uha imahihene, manga dibanga uha imangarati deʼ uha yolio Ngohino, la Ngohi tahitogumu o nanga.’ ”

¹⁶ O Yesus wätemo iwinöninïkika, ”Mä hokokia ngini niautumu,” ”hababu igoungu ngini niamäke deʼ niihene.

¹⁷Niohohininga, mangangöe o nabi deʼ o nyawa yototo moteke ma Jou Madutuika, yönahihu yamäke, okia ngini o öraha nënanga niamäke, mä onanga yamäkeua. Onanga yönahihu yoihene, okia ngini o öraha nënanga niihene, mä onanga yoihenua.”

¹⁸”Niihene okia mamangarati o hitotero mangale o gihihi wohi bari-barihi gënanga.

¹⁹O gihihi itifa o ngekomuku, hohitero o nyawa yoihene o abari mangale sarakia ma Jou Madutu wopareta, mä imangaratiua. O Dorou idodiai gënanga yaino deʼ yaora, okia hibari-barihoka manga hininga magoronaka.

²⁰O gihihi itifa o tonaka ihohelewouku, hohitero o nyawa yoihene o abari gënanga, deʼ gila-gila yatarima de mangahininga isanangi.

²¹Mä o abari gënanga imahingutukua mangahininga magoronaka, hiädono itongohonua. Hoko gënanga önanga yatagongo o huha ekola o aniaya karana o abari gënanga, gila-gila önanga imadohuku de yosetiaokaua.

²²O gihihi itifa o momo ihohihika mahidogoronauku gënanga hohitero o nyawa yoihene o abari gënanga, mä yohawatere mangale manga wowango, deʼ yonahihu yowango okia-kiaua yokuranga. Karana gënanga o abari ma Jou Madutuino ihidehoto manga hininga magoronaka hiädono ihohokua.

²³Deʼ o gihihi itifa o tonaka iboburereuku gënanga hohitero o nyawa yoihene o abari gënanga deʼ yanäko mamangarati. Onanga manga hohoko iwöe, naga o ratuhu moi, naga moributanga, deʼ naga moruange mahasili.”

²⁴O Yesus wohijaritali moi o hitotero o nyawa yowöe-wöeika, wato, ”Orahaokia ma Jou Madutu wopareta, madodagi hokä o hitotero nënanga: Womatëngo wototumule wohibarihi o gihihi maoa aidumuleoka.

²⁵O hutu moiuku, mata-mata o nyawa imäkoki iduoka, wototumule aihaturü gënanga waino deʼ wohibarihi o nguhumu mahohoko o gandum mahidogoronaika, deʼ womä joboka.

²⁶Ho de o gandum gënanga iwango deʼ imuläenge ihuputu, manguhumö mayamäke.

²⁷Deʼ wototumule aihewa manyawa yaino madumule madutuino deʼ yotemo, ’Tuanga, mode koigoungua Tuanga nodatomo o gihihi maoa anidumuleoka Tuanga? Sarakia imadadi hiädono naga o nguhumu genangoka?ʼ

²⁸Wototumule gënanga wohaluhu, ’Gënanga ahihaturü aimanarama.’ Deʼ aihewa manyawa yolehali, ’Tuanga nomau ngomi mioiki miarahuku o nguhumu gënanga?ʼ

²⁹Madumule madutu wohaluhu, ’Ngarouha.’ ’Hababu nako o nguhumu gënanga niarahuku, done ma gandum imahidarahuku.

³⁰Nia mal̄aika o nguhumu gënanga ibori wango de o gandum hiädono o gugutuku maöraha. Dahaö ngohi aha tätemo youtu-utukika: Nia toomu ihira manguhumu, nialiko, deʼ niatuhuku. Iböto gënanga niatoomu magandum, deʼ niagogono matauika.’ ”

³¹O Yesus wohijaritali moi o hitotero o nyawa yowöe-wöeika, wato, ”Orahaokia ma Jou Madutu wopareta, madodagi hokä o hitotero nënanga: O sasawi mamui gahumu moi, o nyawa yal̄ë, deʼ yadatomo manga dumuleoka.

³²O sasawi mamui gënanga o gihihi duru ma alu-aluhu. Mä nako iwangoka, ënanga imadadi o gota ma ago-agomo, iholoi i ago-agomo de o gota idato-datomo maröehe ibole-bole mahomoa. Enanga imadadi o gota, hiädono o totaleo yaino imä igutu majaga-jagaika.”

³³Naga moi o hitotero mahomoali o Yesus wohijarita o nyawa yowöe-wöeika. ”O örahaokia ma Jou Madutu wopareta, madodagi hokä o ragi o ngoheka momatëngo mal̄ë, mohiganuino de o tarigu o litere moruata hiädono mata-mata i hero!”

³⁴Mata-mata o Yesus wodotoko o nyawa yowöe-wöeika wapäke o hitotero.

³⁵ De hokogënanga idadi hokä o nabi yotemo, ”Nako de önanga totemo-temo Ngohi tapäke o hitotero; Ngohi aha tohingahu okianaga i iu-iunu ka demadero idadi o dunia nënanga.”

³⁶Ipaha de gënanga o Yesus wämal̄a o nyawa manga ngöe gënanga, deʼ wowohama o tauika. Iwinöninïki yaino deʼ yotemo, ”Beika Bapa nohitararono ngomino mamangarati o hitotero mangale o nguhumu o gandum mahidogoronaka.”

³⁷O Yesus wohaluhu, ”O nyawa wohibari-barihi o gihihi maoa ganga o Nyawa manga Ngohaka.

³⁸O dumule gënanga ganga o dunia nënanga. O gihihi maoa gënanga ganga o nyawa yodadioka ma Jou Madutu aiumati. O nguhumu gënanga ganga o nyawa iwimote-moteke o Ibilihi.

³⁹O haturü wodato-datomo o nguhumu gënanga ganga o Ibilihi. O gugutuku maöraha ganga o Kiamati ma Wange, deʼ o nyawa youtu-utuku gënanga ganga o malaekat-malaekat.

⁴⁰Hokä sarakia o nguhumu yatoomu deʼ yatuhuku o ukuika, hokogenangoli o Kiamati ma Wangeoka.

⁴¹O Nyawa manga Ngohaka aha wahuloko Ai malaekat-malaekat yätoomu mata-mata Ai umati mahidogoronaka yodödädadi o hababu o nyawa o baradoha yodiai, deʼ o nyawa mahomoaohi mata-mata o dorou yododiai.

⁴²Onanga mata-mata aha yäumo o uku itoka-tokara mangï ika; genangoka ona aha yoari deʼ yatagongo o hangihara.

⁴³Deʼ o nyawa yadodiai ma Jou Madutu aimau aha yocahaya hokä o wange malako, ma Jou Madutu ai Dunia ma Hungi magoronaka, to ona manga Ama. Hoʼ, nako de nia ngauku, ni ihene!”

⁴⁴”O örahaokia ma Jou Madutu wopareta, madodagi hokä o hitotero nënanga: Naga o arata o tonaka magoronaka imahi baituku, deʼ womatëngo wofai-faiti de wamäke, deʼ wohi baitokali o tonaka magoronauku. Ipahaika karana aimörene, o nyawa gënanga woiki wahukunu mata-mata aiarata, deʼ woma kilioro waija o tonaka gënanga.”

⁴⁵”O örahaokia ma Jou Madutu wopareta, madodagi hokä o hitotero nënanga: Womatëngo o dagangoka wolingiri o muhutika maija ihali-hali.

⁴⁶Maöraha ünanga wamäke o muhutika moi duru kahahailoa, woma taiti ünanga woiki deʼ wahukunu mata-mata ai arata, deʼ waija o muhutika gahumu moi gënanga.”

⁴⁷”O öraha okia ma Jou Madutu wopareta, madodagi ihitero hokä o homa yaumo o taagaoka, deʼ yamäke o nawoko i rupa-rupa.

⁴⁸Mahoma gënanga i omangoka, o nawoko yolingi-lingiri gënanga yagöraka o homa gënanga o dudungiha. Ipaha önanga yogogeruku deʼ yatinga-tingaka o nawoko gënanga: O nawoko maoa yönöa o karajauku, deʼ manawoko madorou yaumo.

⁴⁹Hoko genangoli o Kiamati ma Wangeoka, o malaekat-malaekat aha yoiki yätingaka o nyawa madorou deʼ o nyawa yadodiai ma Jou Madutu ai mau.

⁵⁰I paha o nyawa madorou gënanga yäumo o uku mangïika. Genangoka ona aha yoari deʼ yatagongo o hangihara.”

⁵¹”Sarakia naga ngini nimangaratioka mata-mata gënanga?” o Yesus wäleha. ”Mimangarati Bapa!” önanga yohaluhu.

⁵²De o Yesus wätemo, ”Gënanga mahababu moi-moi o agama maguru yodadioka ma Jou Madutu aiumati, ganga hokä womatëngo o tau madutu, wohihupu aiarata mangïino, o baranga mahungi, deʼ i hira-hira.”

⁵³Ipahaka o Yesus wohijarita o hitotero-hitotero gënanga, Unanga wamal̄a o ngï gënanga,

⁵⁴deʼ woma kilioro Ai kapongika. Dokengoka Unanga woiki wodotoko o pupuji matauoka, deʼ o nyawa ihigihe-gihene Ai dodötoko gënanga, duru yohëranga. Onanga yotemo, ”O nyawa nënanga kiaino wamäke o barija hoko nënanga? Deʼ kiaino Unanga wamäke o kuaha howodiai o nonako ihëra-hëranga?

⁵⁵Mode koigoungua Unanga o gota matukanga mangohaka? Koigoungua o ngo Maria gënanga ngoi ayo; deʼ Ai riadodoto ganga o Yakobus, o Yusuf, o Simon deʼ o Yudas?

⁵⁶Deʼ koigoungua Ai bira-biranga yogogere nenangoka? Kiaino Unanga wamäke mata-mata gënanga?”

⁵⁷ De önanga iwitarimaua o Yesus. Deʼ o Yesus wätemo onangika, ”O nabi womatëngo kiaka dika iwihoromati, sowaliua Ai kapongoka deʼ Ai tauoka mahirete.”

⁵⁸Hoʼ genanga o Yesus woluku wodiai o nonako ihëra-hëranga ma ngöe genangoka hababu önanga yongakuua.