Read Tobelo O MATIUS 14 Bible Online

O MATIUS 14 - Tobelo bible

O MATIUS 14

¹Ma orahoka gënanga o Herodes, o Galilea maberera wakokuaha, woihene mangale o Yesus.

²O Herodes wätemo o häe-häekika, ”Maraioka nënanga o Yohanis Wo ohi-ohiki wowango okali! Gënanga mahababu ünanga de ai kuaha wodiai o nonako ihëra-hëranga.”

³ Hababu ihira de gënanga o Herodes wohuloko o Yohanis iwi tagoko deʼ unanga iwiliko de iwihingohama o buika. O Herodes wodiai hokogënanga karana o ngo Herodias, aidodoto airomanga o Filipus, ngoi hekata.

⁴ Hababu o Yohanis wïtemoka o Herodesika hokonënanga, ”Yakunua ngona nokawingi de o ngo Herodias!”

⁵Imoteke madiai o Herodes wönahihu wïtoma o Yohanis, mä o Herodes wämodongo o nyawaika, hababu önanga iwinako o Yohanis gënanga o nabi.

⁶Ma orahoka o Herodes wohirame aitaongo mawange wodadi, o ngo Herodias ngomi ora moselo o tamu-tamu manga himangoka. Ami selo o Herodes duru aihininga yasanangi,

⁷hiädono o Herodes wojaji munangika de makoboto, okia dika mogahoko aha womihidöaka.

⁸Karana ngomi ayo o demo mominoäka, o moholehe gënanga motemo, ”Ngohi togahoko o Yohanis Woohi-ohiki ai häeke nihi döaka ngohino, örahanënanga dika o dulanga mal̄okuoka!”

⁹Woihene o gogahoko gënanga, o Herodes duru aihininga idadi ihuha. Mä karana ünanga wokobotoka ai tamu-tamu manga himangoka, ünanga wohipareta hupaya o moholehe gënanga ami gogahoko ihimoteke.

¹⁰Unanga wähuloko o nyawa yoiki o buika la yatobiki o Yohanis aihäeke.

¹¹Ipaha o Yohanis aihäeke gënanga yaao ihingohama o dulanga mal̄okuoka deʼ ihi döaka mamoholehika gënanga. Deʼ mamoholehe gënanga ma aoli ngomi ayoika.

¹²Ipaha de gënanga o Yohanis iwinöninïki yaino yal̄ë o Yohanis aimayeti deʼ yalungunu. Deʼ onanga yoiki deʼ ihi ngahu o hali gënanga o Yesusika.

¹³Maöraha o Yesus woihene o abari gënanga, Unanga womatëngouku wongotiri deʼ wamal̄a o ngï gënanga, la woiki o ngï moika koiwanaga o nyawa yogigoro. Mä o nyawa de yoihene o hali gënanga, önanga yamal̄a manga kota deʼ yoiki iwinïki iwihi duru o Yesus yanïki o dudungika mangëkomo.

¹⁴Maöraha o Yesus o ngotiroka de wo uti, deʼ wä mäke o nyawa mangangöe gënanga, Unanga wädora önanga. Ho Unanga wahi togumu yopopanyake.

¹⁵Mabimaoauku, iwinö ninïki o Yesus yaino deʼ yotemo Unangika, ”O wange bimaoaka deʼ o ngï nënanga itingakino. Iholoi yaoa Bapa nähuloko o nyawa neönanga yoiki, hupaya yamäke o inomo imaija o kapo-kapongika.”

¹⁶”Ngaro uha önanga yoiki,” o Yesus wato, ”nginidika niahio l̄omo.”

¹⁷”Ngomi duga-duga miaroti motoa deʼ o ngai hinoto o nawoko!” o Yesus iwinöninïki yohaluhu.

¹⁸”Niaoino gënanga nenangino,” o Yesus wato.

¹⁹Ipaha Unanga wähuloko o nyawa yowöe-wöe gënanga yogogeruku o momo mal̄okuoka. Ika de wal̄ë o roti motoa deʼ manawoko o ngai hinoto gënanga, ika de womamataga o dihangil̄e deʼ wotemo sukur ma Jou Madutuika, iböto de gënanga Unanga wabëla-bëlaka o roti gënanga de ai giama deʼ wohi döaka iwinöninïkika la yahikodoku o nyawa yowöe-wöeika gënanga.

²⁰Onanga mata-mata yol̄omo hiädono yäpunuhu. Iböto de gënanga iwinöninïki o Yesus yatoomu o inomo maboloi gënanga; naga o karaja ngimoi de hinoto yaömanga.

²¹Yool̄o-ol̄omo o öraha gënanga done hoyaribuhu motoa, yä etongowahi o ngoheka deʼ o ngoha-ngohaka.

²²De iböto gënanga o Yesus wähuloko iwinöninïki yoharene manga ngotiril̄e deʼ yohira yotöaka o taaga, Unanga magogiria wähuloko o nyawa yowöe-wöe gënanga yolio.

²³O nyawa yowöe-wöe gënanga yoikoka, o Yesus wadöa moi o doporono la womäniata womatëngoka. Yohutuoka, o Yesus kao doporonokahi womatëngoka.

²⁴Hokokiaowahi, o ngotiri yöbare-barene o Yesus iwinöninïki, magurutikaka, o taaga yatogorona ikaka. Manga ngotiri gënanga o lulu ihiboha-boha yaumo yaika yaino, karana o hidal̄oko manga himangino.

²⁵O takoro hange deʼ o takoro butanga mahigorona kama hohutuohi, o Yesus waino onangino kao akere mal̄okuika woböa.

²⁶Iwinöninïki iwimäke Unanga womä dagi kao akere mal̄okuika woböa, önanga duru yätodokana, yohawana deʼ yopöaka, ”O Tokata!”

²⁷Mä o Yesus gila-gila wohaluhu, ”Nima rïdi! Ngohi o Yesus. Uha nihawana!”

²⁸Ika de o Petrus wotemo, ”Nako Ngona igoungu o Yesus, nohi huloko ngohi taika tomä dagi o akere mal̄okuika.”

²⁹O Yesus wohaluhu, ”Naino.” Hoʼ o Petrus o ngotiroka de wouti, womadagi o akere mal̄okuika, deʼ waika o Yesusika.

³⁰Mä maöraha o Petrus wamäke o hidal̄oko mabuturungu o taagaoka gënanga, ünanga wohawana deʼ muläenge iwilutu. ”Jou nohïriwo!” o Petrus wopöaka.

³¹O Yesus woma taiti wohidöakika Ai giama deʼ wïtagoko ünanga, deʼ wïtemo, ”Petrus, Petrus, ngona nënanga kuranga nongaku. Yadodoaho nohidodato Ngohino?”

³²Ika de yahinoto ö yoharene o ngotiril̄e gënanga, deʼ mahida l̄oko mairïdi.

³³De o Yesus iwinöninïki yatilabuku iwihuba o Yesus. Onanga yotemo, ”Igoungu o Jou ganga ma Jou Madutu ai Ngohaka!”

³⁴Maöraha önanga imahi ädono o taaga gënanga mahonongaika, önanga youti o Genesaret mahohaniha.

³⁵Deʼ manyawa genangoka yämäke, yaino-ino gënanga o Yesus, önanga ihi ngahu o abari gënanga o daera yögetongo, o kota gënanga magilolitino. Ho o nyawa yopopanyake mata-mata yä ao o Yesusika.

³⁶Deʼ onanga yogahoko o Yesusika, hupaya yakunu yasö aijuba, ngaro kama dekara dika. Deʼ o nagona hönanga yatigi o Yesus aijuba önanga mata-mata yotogumu.