Read Tobelo O MATIUS 17 Bible Online

O MATIUS 17 - Tobelo bible

O MATIUS 17

¹ O wange butanga ipahaika o Yesus wäao o Petrus, o Yakobus deʼ aidodoto o Yohanis, imatingaka o l̄oku moika, mal̄oku gënanga kaha gurutil̄e.

²Manga himangoka, itodokanino o Yesus airupa ingali: Ai biono idadi itararono hokä o wange malako de Ai pakeanga mama garehe dei leto-letongo.

³Ipaha yaruange o Yesus iwinöninïki gënanga yämäke o Musa deʼ o Elia imäteke ade-ade de o Yesus.

⁴Deʼ o Petrus wotemo o Yesusika, ”Jou nenangoka ngone duru hosanangi. Nako Jou nöigo, ngohi aha tohi goko o tau-tau nenangoka gahumu hange: moi Tongona Jou, moi to Musa deʼ moioli to Elia.”

⁵ O Petrus kawo temo-temohi, o lobi duru madodararono yähawo o Yesus, o Musa, deʼ o Elia, deʼ o lobino gënanga yoihene o ilingi itemo, ”Nenangala Ahi Ngohaka tïdora-dora. Unanga ahi hininga yadäene. Niwihi gihene Unanga!”

⁶O Petrus, o Yakobus deʼ o Yohanis, yoihene o ilingi gënanga önanga duru yohawana, hiädono imahitudukuku o tonakuku.

⁷Mä o Yesus waino deʼ wäsö önanga de wätemo, ”Nimomiki,” üha nihawana!”

⁸Ho de önanga imalegali, moiokaua önanga yämäke sowaliua o Yesus dika.

⁹Maöraha önanga o l̄okuoka de youti, o Yesus wahipoma-poma, ”Uha nihingahu kamoikaö okia kangano ngini niamäke nako o Nyawa manga Ngohaka womomikowahi o honenge mahi dogoronaka.”

¹⁰ O Yesus iwinöninïki yoleha Unangika, ”Yadodoaho o agama maguru-guru yato o Elia kokiani wohiraino woböa?”

¹¹O Yesus wohaluhu, ”Igoungu o Elia woböa deʼ unanga aha wohidiai itiai hagala mata-mata.

¹² Mä Ngohi tinïtemo nginika, o Elia woböaka, mä o nyawa iwinäkoua ünanga; önanga iwidiai manga hininga mahuka dika. Deʼ hoko genangoli önanga aha iwidiai o Nyawa manga Ngohaka.”

¹³Hoʼ o Yesus iwinöninïki imangarati, o Yesus woade-ade mangale o Yohanis Wo ohi-ohiki.

¹⁴Maöraha o Yesus deʼ iwinöninïki yaruange imakilioro o nyawa yowöe-wöeino gënanga, o nauru womatëngo waino, wohuba o Yesus aihimangoka,

¹⁵deʼ wotemo, ”Bapa nïdora ahingohaka. Unanga iwihohomu. Nako aihohomu iböa duru kaihiri, hiädono mamoi-mamoi woduruba ukuika ekola o akeruku.

¹⁶Ngohi tiao oka iwinöninïkika Bapa, mä onanga yakunua iwihitogumu ünanga.”

¹⁷O Yesus wohaluhu, ”Goguleua ngini nënanga! Ngini igoungu niahininga irehene, deʼ ningakuua. Hiädono hokokia madëkana kokiani Ngohi togogere dede ngini deʼ Tinihi sabari? Niwiaoino o ngohaka gënanga!”

¹⁸Deʼ o Yesus wahuloko o womaha madorou o ngohaka aigoronaka gënanga ihupu. Deʼ o womaha madorou gënanga ihupu, deʼ o ngohaka gënanga o öraha gënanga dika wotogumu.

¹⁹Ipaha o Yesus iwinöninïki yaino o Yesusino, womatëngoka deʼ iwileha, ”Bapa, okia mahababu hongomi miakunua miaduhu o womaha madorou gënanga?”

²⁰ O Yesus wohaluhu, ”Hababu ngini niangongaku ikuranga. Nio hohininga! Nako ngini de niangongaku mapako hokä o sasawi mamui, ngini yakunu nitemo o l̄okuika nënanga, ’Nomatururu dokengika!ʼ marai o l̄oku nënanga aha imatururu. Koiwa moi okianaga la ngini niakunua nidiai! [

²¹Mä o womaha madorou marupa hoko nënanga, yakunu iduhu, kokiani o hubayanga de o puaha dika.]”

²²Maöraha o Yesus iwinöninïki imatoomu o Galileaoka, o Yesus wätemo onangika, ”Itedekanokaua, o Nyawa manga Ngohaka aha iwi hilapahi o nyawa manga kuahaika.

²³Unanga aha iwi toma, mä o wange hangeoka Unanga aha iwihimomiki.” De iwinöninïki duru manga hininga i huha.

²⁴ Maöraha o Yesus deʼ iwinöninïki imahi ädono o Kapernaum makotaika, ma Jou Madutu ai Tau masoungu yogaho-gahoko yaino o Petrusino deʼ yoleha, ”Ani Guru wofangu ma Jou Madutu ai Tau ma soungu ekola kowali?”

²⁵O Petrus wohaluhu, ”Wofangu!” O Petrus wolioino, de o Yesus ihira wïleha, ”Simon, sarakia tongona ani damäke? O nagona kokiani yofangu o bea ekola o soungu o dunia mako koanoika? O kawaha ekola o nyawa maporetino?”

²⁶”O nyawa maporetino,” o Petrus wohaluhu. ”Nako hokogënanga,” o Yesus wato, ö kawaha ngarouha yofangu.

²⁷Mä uha ngone o nyawa manga hininga hakuranga. Hoʼ, noiki o taagaika la nomemekana. Nal̄ë o nawoko madodihiraka natago-tagoko. Ma uru magoronaka gënanga aha namäke o tiwi, la yakunu nohifangu nanga soungu inähinoto. Nal̄ë o tiwi gënanga deʼ nofangu onangika nanga soungu, ma Jou Madutu ai Tau masoungu.”