Read Tobelo O MATIUS 18 Bible Online

O MATIUS 18 - Tobelo bible

O MATIUS 18

¹ O öraha gënanga o Yesus iwinöninïki yaino o Yesusino deʼ yoleha, ”O nagona yähetongo i holoi yolamoko ma Jou Madutu aiumati manga hidogoronaka?”

²O Yesus wïahoko o ngohaka maiteteke womatëngo, deʼ wïokoi l̄e manga himangoka.

³ Deʼ o Yesus wotemo, ”Ningaku! Duga-duga nako ngini nimägali de nidadi hokä o ngoha-ngohaka, ngini aha nidadi ma Jou Madutu aiumati.

⁴O nyawa ihi tipokouku manga diri deʼ yodadi hokä o ngohaka nënanga, ünanga iholoi wolamoko ma Jou Madutu aiumati manga hidogoronaka.

⁵Deʼ o nyawa yätarima o ngohaka hoko nënanga mangale Ngohi, mamangarati ihi tarima Ngohi.”

⁶”O nagona yodadi o hababu iti imatëngo o ngohaka ma alu-aluhu nënanga yongakuokaua Ngohino, iholoi yaoa nako manga tomarino ihiliko o tapu de maguminoka deʼ yädoda o ngöto maluku-lukuku.

⁷Hokokia mabodito o dunia nënanga karana o hali mangöe idadi hababu o nyawa yobaradoha. Itiai mangöe o hali hokogënanga aha salalu naga, mä yobodito o nyawa yodädadi o hababu!

⁸ Nako anigiama ekola anil̄ou idiai o hababu ngona nobaradoha, natobiki deʼ naumoka. Iholoi yaoa ngona nowango de ma Jou Madutu ngaroko anigiama deʼ anil̄ou kama hononga, imateroua nako de anigiama de anil̄ou hinotoö ini umo o naraka ma uku magoronaika.

⁹ Deʼ nako ani lako idadi o hababu ngona o baradoha nodiai, natubalenge deʼ naumoka. Iholoi yaoa ngona nowango de ma Jou Madutu ngaroko anilako kamahononga, materoua nako de anilako hinotoö iniumo o naraka ma uku magoronaika.”

¹⁰”Nimahidodiai! Uha niahikauku mangale moi o ngoha-ngohaka manga alu-aluhu nënanga. Hababu nio hohininga toona manga malaekat-malaekat salalu naga Ahi Ama o horogaka aihimangoka. [

¹¹ Hababu o Nyawa manga Ngohaka woböa la wahihalamati o nyawa yohïhihanga!]

¹²Sarakia niadamäke? Demo maade naga womatëngo aiduba o ratuhu moi, deʼ gahumu moi o duba-duba gënanga mahi dogoronaka ihihanga, done okia aha wodiai maduba madutu gënanga? Marai ünanga aha wamal̄aika maduba mori hiwo de hiwo gënanga o tonaka i totoporonoka deʼ woiki walingiri ihïhihanga gënanga.

¹³Deʼ nako ünanga wamäkeoli o duba gënanga — nihi ngaku Ngohi — ünanga aha iholoi womörene de o duba gahumu moi ihï hihanga gënanga, iholoi de mori hiwo de hiwo ihï hihangua gënanga.

¹⁴Hoko genangoli nia Ama o horogaka, woluku o nyawa gënanga dahao ihingaku-ngaku Ngohino nënanga ima tëngoani yohihanga.”

¹⁵ ”Nako aniriadodoto wobaradoha ngonaika, noiki unangika deʼ nihidumutu aihowono. Nadiai gënanga inihinotoka dika ngarouha de mahomoa ihiöriki. Nako wamoteke anidemo-demo, nohasiloka yakunu aniriadodoto gënanga nïmäke woma kilioro.

¹⁶ Mä nako kowali, nä ao womatëngo ekola yahinotohi. Hababu Ma Jou Ai Demo ma Buku magoronaka itulihi, ’Makuranguku yahinoto ekola yaruange iparalu yohakihi, la yakunu inyata iwikokalaki gënanga wahowono.’

¹⁷Nako ünanga watarimaua to ona manga nasihati, nohingahu o hali gënanga o jemaatika. Deʼ mabobaha nako ünanga woluku watarima o Jemaat manga nasihati, niwi etongoka ünanga hokä o soungu yogaho-gahoko deʼ iwi näko-näkoua ma Jou Madutu.”

¹⁸ ”Nihiorikoka: Okia ngini nihigumal̄aua o duniaka, o horogaokaö ihigumal̄aua. Deʼ okia ngini nihigoungu o duniaka, o horogakaö ihigoungu.

¹⁹Deʼ nihi orikoli: Nako ngini niahidogoronaka o duniaka nënanga yahinoto okia dika önanga imafakati, deʼ ihiniata, manga niata gënanga aha Ahi Ama o horogaka wohi moteke.

²⁰Hababu kiaka yahinoto ekola yaruange imatoomu karana Ngohi, Ngohi naga to önanga manga hidogoronaka.”

²¹ De ipaha o Petrus waino o Yesusino deʼ woleha, ”Jou, nako ahiriadodoto wobaradoha ngohino, hiädono mamuruono ngohi kokiani tihiapongo ünanga? Hiädono matumidi?”

²²O Yesus wohaluhu, ”Kowali, hiädono higali matumidua, mä matumidi higali mamori tumidi!

²³Hababu o örahaokia ma Jou Madutu wopareta, madodagi hokä o hitotero nënanga: Okoano womatëngo womau aigogilaongo manga nagimi yofangu mata-mata.

²⁴Maöraha ünanga womuläenge wotailako, womatëngo aigilaongo ainagimi de majuta-juta, wihimangika ma koano,

²⁵deʼ wakunua wafangu wamata-mata. Hoʼ, ma koano gënanga wohi pareta hupaya o gilaongo gënanga iwi hukunu kamamoi de aingohaka de ngoi hekata deʼ hagala aiarata la ainagimi ihifangu.

²⁶O gilaongo gënanga womaruku wohuba ma koano aihimangoka, deʼ wogahoko, ’Tuanga, nohihisabarohi anigilaongo. Ani gilaongo aha tafangu tamata-mata ahinagimi.’

²⁷Ma koano gënanga wïdora unangika, hiädono ma koano waehe mata-mata ainagimi hokoiwaka.

²⁸Ipaha o gilaongo gënanga wohupuika, ünanga imamäke de aidodiawo womatëngo kao gilaongoli, ainagimi unangika o ribuhu muruono naga. Unanga wïtagoko aidodiawo gënanga de wïgoodongo deʼ wïtemo, ’Nofangu mata-mata aninagimi!ʼ

²⁹Deʼ ai dodiawo gënanga womarukuku aihimangoka deʼ wogahoko, ’Ahi dodiawo nohihi sabarohi, aha tofangu tamata-mata!ʼ

³⁰Mä o gilaongo gënanga woluku. De inoli, ünanga wihingohama aidodiawo o buika hiädono ünanga ainagimi wofangu.

³¹O gogilaongo mahomoa yamäke okia idädadioka gënanga, önanga manga hininga ihuha, deʼ ihingahu o hali gënanga ma koanoika.

³²Ho ma koano gënanga wïahoko o gilaongo madorou gënanga deʼ wïtemo unangika, ’Gilaongo madorou! Mata-mata aninagimi taeheoka duga-duga karana ngona nogahoko ngohino.

³³Mode koigoungua ngonaö kokiani nïdora anidodiawoika hokä ngohi ma tonïdoraka ngonaika?ʼ

³⁴Ma koano gënanga duru wongamo. O gilaongo madorou gënanga iwihingohama o buika hiädono ünanga wofangu ainagimi wamata-mata.”

³⁵O Yesus wohi bobaha aijarita de o demo-demo nënanga, ”Hoko genangoli Ahi Ama o horogaka aha wodiai nginika moi-moi, nako ngini niahiapongua niariadodoto de niahininga itebini.”