Read Tobelo O MATIUS 21 Bible Online

O MATIUS 21 - Tobelo bible

O MATIUS 21

¹Maöraha yotigioka o Yerusalemika, önanga imahi ädono o Betfage makotaika o Zaitun ma Doporonoka. Genangokadau o Yesus wähuloko yahinoto iwinöninïki imädagi yohira.

²”O kapongo nanga himangoka gënanga, genangika nioiki,” o Yesus wahibehehongo onangika. ”Itedekanua ngini aha niamäke moi o keledai ilikoika dema ngohaka. Niahohe hinotoö de niao nengino.

³Nako naga o nyawa okianaga inïleha, nihingahu madutuika, ’Ma Jou woparalu wapäke’, done o nyawa gënanga de majapati aha wohigumal̄a makeledai gënanganiao.”

⁴O hali gënanga hokogënanga hupaya idadi okia manabi wotemoka hokä hoko nënanga,

⁵ ”Nihi ngahu o Sion mamomoholehika, nia Koano naga winïädono ngini. I poluluku Unanga aihininga, deʼ wöbarene o keledai, magö o keledai mangohaka.”

⁶Ipaha yahinoto o Yesus iwinöninïki gënanga yoiki deʼ yadiai hokä o Yesus wahibehehongo onangika.

⁷Onanga yao o keledai gënanga de mangohaka. Dahao önanga o keledai-keledai gënanga maporetuku yönao de toona mangajuba. Ipaha o Yesus wodöa makeledaiil̄e.

⁸Manga ngöe dokengoka ihihohe manga juba o ngekomika, utuoli mahomoa yatobiki o gota mararaga, de hibarihi o ngëkomo mahoanika.

⁹ O nyawa manga ngöe imädagi mahimangoka deʼ o Yesus aiporetino yopöa-pöaka, ”Nowango o Daud ai Ngohaka! Unanga woböa-böa de ma Jou airomanga wamäke o barakati! Niwipuji ma Jou Madutu woko Kurutil̄e!”

¹⁰Deʼ maöraha o Yesus wowohama o Yerusalemika, o kota gënanga mata-mataika iburakituku. ”Ne Unanga o naguna?” o kota manyawa yoleha.

¹¹”Unanga o Yesus ma Nabi, o Nazaretino o Galilea madaeraka,” o nyawa manga ngöe iwinöninïki o Yesus yäbaluhu.

¹²Ipaha o Yesus wowohama ma Jou ai Tauika, deʼ wäduhu mata-mata o nyawa imahuku-hukunu de yoija-ija genangokadau. O tiwi ihitotagali mameja deʼ o namo dara yohuku-hukunu manga bangku o Yesus walulu momiki de wohikabarihi.

¹³ Deʼ Unanga wätemo onangika gënanga, ”Ma Jou Ai Demo ma Buku magoronaka i tulihi ma Jou Madutu wotemo, ’Ahi Tau aha yahetongo o Tau o niniata mangï.’ Mä ngini niadiaioka o nyawa yo ora-ora manga igutu!”

¹⁴O nyawa yopilo-piloko deʼ yolugu-lugu yaino o Yesusino ma Jou ai Tauoka, deʼ Unanga wahitogumu önanga.

¹⁵Mä o imam-imam manga häeke deʼ o agama maguru-guru yongamo yamäke o Yesus wododiai o nonako ihëra-hëranga gënanga. Deʼ onanga yongamoli yoihene o ngoha-ngohaka imä nëre-nëre ma Jou ai Tauoka, ”Nowango o Daud ai Ngohaka!”

¹⁶ Onanga yotemo o Yesusika, ”Ngona noihene okia önanga yahetongo gënanga?” ”Ia, Ngohi toihene,” o Yesus wohaluhu. ”Komaiwahi ngininia basa Ma Jou Ai Demo ma Buku maayat nënanga: ’O ngoha-ngohaka kayohühuhuohi deʼ o ngoha-ngohaka magil̄au Ngona nädotokoka la ihi demo o puji magoungu de madiai’?”

¹⁷Ipaha o Yesus wämal̄aika önanga deʼ wohupu de o Yerusalem makota de woiki o Betaniaika, deʼ genangoka hiädono yöhutu de imaidu.

¹⁸Yarehino o ngoru-ngorumino, imakilioro o Yerusalem makotaika, o dodagi mahidogoronaka o Yesus iwihahini.

¹⁹Unanga wamäke o ara magota o utu moi o ngëkomo madatekoka. Unanga woiki magotaika gënanga, mä kamoiö de wamäkeua mahohoko, sowaliua kama hoka dika. Ho o Yesus watemo o gotaika gënanga, ”Ngona aha nohohokokaua!” Gila-gila o ara magota gënanga i maai.

²⁰O Yesus iwinö ni nïki yamäke okia idä dadioka gënanga, önanga duru yohëranga. ”Sarakia ho o ara magota gënanga yakunu gila-gila i honenge kamamoi?” önanga yoleha.

²¹ ”Igoungu,” o Yesus wohaluhu, ”nako ngini ningaku niagou-goungu, ngini niakunu nidiai hokä okia Ngohi todiai o ara magotaika nënanga. Deʼ kagenangua dika, mä ngini aha yakunu nitemo o tonaka itotoporonika nënanga, ’Igöraka deʼ i umo o ngötuku’: done o hali gënanga idadi.

²²Okia dika ngini nigahoko nia hubayanga magoronaka, ngini aha niatarima, iti yakunu ngini ningaku.”

²³Ipaha o Yesus woikoli ma Jou ai Tauika, deʼ wodotoko genangoka. Maöraha Unanga wodotoko magogiriaka, o imam-imam manga häeke deʼ o Yahudioka manga tutuda yaino o Yesusino deʼ yoleha, ”De okia matiti Ngona nodiai mata-mata nënanga? O nagona inihidöaka o haku gënanga Ngonaika?”

²⁴O Yesus wohaluhu, ”Ngohiö tomau toleha nginika. Deʼ nako ngini niobaluhu, Ngohi aha tahetongo nginika de o nagona manga haku Ngohi takunu todiai o hali nënanga.

²⁵O Yohanis wo ohiki de o nagona manga haku? Ma Jou Madutu ekola o nyawa?” Ho o imam-imam manga häeke deʼ o Yahudioka manga tutuda, yomuläenge imaki tibanga dehi ade-ade manga hidogoronaka, ”Nako ngone hato, ’De ma Jou Madutu aihaku’, Unanga aha wotemo, ’Nako hokogënanga yadodoa hongini ningakuua Unangika?ʼ

²⁶Mä nako ngone hato, ’De o nyawa manga haku’, ngone hämodongo o nyawa manga ngöe, hababu imoteke önanga o Yohanis o nabi moi.”

²⁷Hoʼ onanga yohaluhu, ”Ngomi mihi orikua.” Ho o Yesus wätemo onangika, ”Nako hokogënanga Ngohiö ma aha tahetongua nginika, de o nagona manga haku Ngohi todiai mata-mata nënanga.”

²⁸”O öraha nënanga sarakia niadamäke mangale o hali nënanga?” o Yesus wotemo wohi gila-gila. ”Naga o ama womatëngo aingohaka yahinoto o nauru. O ama gënanga woiki ai ngohaka mariakika deʼ wïtemo, ’Ngohaka, o wange nënanga noiki nokarajanga o angguru madumuleoka.’

²⁹’Ngohi toluku,’ mangohaka gënanga wohaluhu. Mä i paha ünanga wangali aidibanga gënanga deʼ woiki maangguru madumuleika.

³⁰Ipaha ma ama gënanga woiki ai ngohaka madodotika, deʼ wïtemo, hokä mariakika wïtemo. ’Kayaoa toiki, Ama,’ mangohaka madodoto wohaluhu. Mä unanga woikua.

³¹Aa, yahinoto o ngohaka nënanga, o nagona yadiai manga ama aimau?” ”Mariaka,” o imam-imam manga häeke deʼ o Yahudioka manga tutuda yohaluhu. Ho o Yesus wätemo onangika, ”Ningaku: O soungu yogaho-gahoko deʼ o ngoheka o huhutu yaninïki, aha ihira yodadi ma Jou Madutu aiumati done ngini kanituru.

³² Karana o Yohanis Wo ohi-ohiki woböaino, deʼ wohi matoko nginika madodagi sarakia niawowango hupaya imamoteke de ma Jou Madutu aimau, mä ngini niangakuua aidodötoko; mä o soungu yogaho-gahoko deʼ o ngoheka o huhutu yaninïki yangaku toünanga aidodötoko. Mä ngarokö ngini niamäkeoka mata-mata gënanga, niadibanga ingaliua deʼ ningakuua ma Jouika.”

³³ ”Ni ihene o hitotero moiohi nënanga,” o Yesus wotemo. ”Womatëngo o tonaka madutu wodatomo o angguru o dumule moi. Unanga wohibeloho o pagara ikilolitino, deʼ wohaiti o guhu la genanguku yateo maangguru, ipaha wohigoko o tau o gahumu moi magögurutil̄e, la genangokadau önanga yogöana. Iböto de gënanga ünanga wohihewa o angguru madumule gënanga yomomanaramika, deʼ ipaha ünanga woiki o berera mahomoaika.

³⁴Maöraha yadonoka o angguru mahohoko gënanga ipagele, o tonaka madutu gënanga wahidingoto iwïlöleleani o dumule yomomanaramika, la ya tarima aihidoku.

³⁵Mä o dumule yomomanarama gënanga yätagoko o tonaka madutu iwïlöleleani gënanga: Womatëngo iwi gohara, mahomoa yätoma, deʼ mahomoaohi yäkaweli de o helewo.

³⁶O tonaka madutu gënanga wahidingotoli yolöleleani mahomoa, iholoi yowöe de madodihiraka. Mä onanga yädiai hokä yohira-hiraoli.

³⁷Mabobaha o tonaka madutu gënanga wihi dingoto ai ngohaka mahirete onangika. ’Marai ahingohaka aha iwihoromati,’ aihiningaka.

³⁸Mä o dumule yomomanarama gënanga de iwimäke o tonaka madutu aingohaka gënanga, önanga imake temo, ʼAa, nënanga ünanga o puhaka madutu. Niaino ngone hïtoma ünanga, hupaya ngone hamäke aipuhaka!ʼ

³⁹Ho mangohaka gënanga iwitagoko, de iwiumo maporetika, deʼ iwi toma.”

⁴⁰O Yesus wäleha, ”Aa, nako maangguru madumule madutu wolioino, ünanga aha okia wodiai o dumule yomomanaramika gënanga?”

⁴¹Onanga yohaluhu, ”Marai ünanga aha wätoma o nyawa madorou gënanga, dahaö o angguru madumule gënanga wahi hewa o nyawa mahomoaika, kiaka önanga yomodeke ihidöaka matonaka mahasili mahidoku kade yadono maöraha.”

⁴² De o Yesus wätemo onangika, ”Komaiwahi ngini niabasa Ma Jou Ai Demo ma Buku magoronaka i tulihi? ’O helewo yapäke-päkeua o tau yododiai i dadioka o helewo yairi-irikika. Nënanga ma Jou wadiai; hokokia toënanga mahailoa!ʼ ”

⁴³”Hoʼ niohininga,” o Yesus wätemo, ”mata-mata o haku ma Jou Madutu aiumati aha warahuku onangoka deʼ wahidöaka moi o hoana mahomoa manyawaika kiaka aha ihidagi yadiai ma Jou Madutu aipareta mata-mata. [

⁴⁴O nyawa yäotaka de yotifa o helewouku gënanga, aha yowedere; deʼ o nyawa yäbänga o helewo gënanga aha yatapal̄u yodadi o kafo.]”

⁴⁵Maöraha o imam-imam manga häeke deʼ o Farisi manyawa yoihene o Yesus aihitotero-hitotero gënanga, önanga yanäko o Yesus woade-ade mangale önanga.

⁴⁶Hoʼ onanga ihidailako iwitagoko. Mä onanga yämodongo o nyawa mangangöe, hababu o nyawa manga ngöe gënanga yanako o Yesus o nabi moi.