Read Tobelo O MATIUS 23 Bible Online

O MATIUS 23 - Tobelo bible

O MATIUS 23

¹Deʼ o Yesus wätemo o nyawa yowöe-wöeika deʼ iwinöninïkika,

²”O agama maguru-guru deʼ o Farisi manyawa yamäke o kuaha la ihiguti mangale o Musa aitita.

³Hababu gënanga nihi ngounu de niamoteke mata-mata okia önanga ihiparetaka. Mä uha niaduru niadiai, okianaga önanga yadodiai, hababu önanga yadiaiua okia önanga yodotoko.

⁴Onanga inihi patutu o hali mahuhuha, deʼ ihi döaka o datoro-datoro madodubuho, mä kamahuhutulö de önanga yäriwoua o nyawa yadodiai o hali de o datoro gënanga.

⁵ Mata-mata, önanga yadodiai, duga-duga hupaya o nyawa yamäke. Hangaja önanga yapäke manga hubayanga magumini mangoa-ngoata, deʼ yakurutu manga juba marami-ramini!

⁶Onanga yöigo o ngï duru yaoa-oa o rameangoka deʼ o kuruhi yairi-irikika o pupuji matauoka.

⁷Onanga yosanangi o nyawa yähoromati o paharoka, deʼ yä ahoko ’Bapa Guru’.

⁸Mä ngini, uha niomodeke iniahoko ’Bapa Guru’, hababu nia Guru duga-duga naga womatëngo, deʼ ngini mata-mata o riadodoto.

⁹Womatëngö deuha niwiahoko o duniaka nënanga ’Bapa’, hababu nia Ama duga-duga moi, enagënanga nia Ama o horogaka.

¹⁰Deʼ uha ngini nimau inïahoko ’Tutuda’, hababu niatutuda duga-duga naga moi, enagënanga ma Koano Wohihohalamati ma Jou Madutu winihijäjajioka.

¹¹ O nyawa duru yoamoko niahidogoronaka kokiani yodadi inïlöleleani.

¹² O nyawa ihikurutil̄e mangadiri aha yahitipokouku, deʼ o nyawa ihitipokouku manga diri aha yahikurutil̄e.”

¹³”Nibodito ngini o agama maguru-guru deʼ o Farisi manyawa! Ngini niabiaha nielu-eluku. Ngini niätatoko o nyawa yodadi ma Jou Madutu aiumati. Ngini mahirete nioluku nidadi ma Jou Madutu aiumati, deʼ o nyawa mahomoa yömodeke, ngini niätatoko. [

¹⁴Nibodito ngini o agama maguru-guru deʼ o Farisi manyawa: Ngini niabiaha nielu-eluku. Ngini niätipu o ngoheka bobao deʼ niäora manga tau deʼ nihitamunu niadorou gënanga, ngini niahubayanga niakuru-kurutu. Gënanga mahababu niahukumanga aha itubuho!]

¹⁵Nibodito ngini o agama maguru-guru deʼ o Farisi manyawa! Ngini niabiaha nielu-eluku! Ngini nioiki magogurutika o ngöto niatöaka, deʼ o dudungu niamöde-mödeke la imatëngoani yowohama niaagama. Deʼ manyawa gënanga yowohamoka niaagamaino, ngini niadiai önanga o naraka mahidoku, higalimahinoto iholoi itorou de ngini mahirete!

¹⁶Nibodito ngini o tutuda nipilo-piloko! Ngini nidotoko hokonënanga, ’Nako o nyawa yokoboto de ma Jou ai Tau, o nyawa geönanga yädaenua manga koboto gënanga; mä o nagona yokoboto de o gurasi ma Jou ai Tauoka, manga koboto gënanga yädäene.’

¹⁷Ngini o nyawa nibodo-bodo de nipiloko! Kiaka iholoi iamoko: magurasi, ekola ma Jou ai Tau, yadiai o gurasi gënanga itebini?

¹⁸Ngini nidotokoli hokonënanga, ’Nako womatëngo wokoboto de o huhuba mangï, o nyawa gënanga iwidaenua aikoboto; mä nako ünanga wokoboto, de o huhuba, ikokelengauku o huhuba mangïoka, ünanga aha iwidäene aikoboto.’

¹⁹Ngini duru nipiloko! Kiaka iholoi hohi amo-amoko? Mahuhuba ekola mahuhuba mangï, yadiai idadi mahuba gënanga itebini?

²⁰Hababu gënanga, nako womatëngo wokoboto de o huhuba mangï, gënanga mamangarati ünanga wokoboto de o huhuba mangï deʼ mata-mata o huhuba, o huhuba mangï mal̄okuoka ikokelengauku.

²¹Deʼ nako womatëngo wokoboto de ma Jou ai Tau, gënanga mamangarati ünanga wokoboto de ma Jou ai Tau, deʼ de ma Jou Madutu wogögogere genangokadau.

²² Deʼ nako womatëngo wokoboto de o horoga, gënanga mamangarati ünanga wokoboto deʼ ma Jou ai kuruhi imomulia, deʼ de ma Jou Madutu wogö gogere o kuruhi imomuliaka gënanga.

²³ Nibodito ngini o agama maguru-guru deʼ o Farisi manyawa! Ngini biaha nielu-eluku. O rampa-rampa hokä o hulahi, o momongere, deʼ o jintanö, ngini nihi döaka o regu ngimoi ma Jouika. Ena hioko o hali hohi amo-amoko nanga agama matita mahidogoronaka, hokä hokonënanga: O adili, o dora, deʼ o setia, ngini nia diaiua. Ena hioko gënanga doka kokiani ngini niadiai, de mahomoa uha niälipa.

²⁴Ngini o tutuda nipilo-piloko! O guhuru nia akere magoronaka niatafi, ena hioko o onta o aiwani ilago-agomo ngini nial̄ahiri!

²⁵Nibodito ngini o agama maguru-guru deʼ o Farisi manyawa! Ngini biaha nielu-eluku! Niaudo-udomo deʼ niadodai ngini niaihoro maporetino niatebi-tebini, enahioko magoronauku duru ipeseke, de o hali ngini niamäke okianaga, dema pakisa deʼ niarusi.

²⁶Farisi ipilo-piloko! Nia ihorokahi ihira niatebi-tebini niaudo-udomo deʼ niadodai magoronauku, hupaya maporetino idadioli itebini!

²⁷ Nibodito ngini o agama maguru deʼ o Farisi manyawa! Ngini biaha nielu-eluku! Ngini hokä o lungunu ihi eheoka de o dofae homa gare-garehe; maporetino hölega-lega ihailoa, mä magoronaka i ömanga de o kobongo, deʼ mata-mata imö mela-mela.

²⁸Hoko genangoli ngini. Maporetino o nyawa yölega-lega yaoa, mä magoronaka i ömanga de o tengeluku de o dorou, deʼ o dodilakuru.”

²⁹”Nibodito ngini o agama maguru-guru deʼ o Farisi manyawa! Ngini biaha nielu-eluku! Ngini niadiai o nabi-nabi manga jere marorahai deʼ o nyawa manga ngango yaoa-oa, manga tugu niadiai nihidodiai.

³⁰Deʼ ngini nitemo, ’Ade-ade nako ngomi miwango miaete de miatohora yohöhira-hira manga orahoka, ngomi mimahi motekua dede önanga miätoma o nabi-nabi.’

³¹Hoʼ ngini mahirete nima ngaku ngini ganga o nyawa yätoma-toma o nabi-nabi, manga difauku!

³²Nako hokogënanga o baradoha niaete de niatohora yamulaengoka, gënanga nihigila-gila deʼ niadiai hiädono iböto!

³³Ngini itorou deʼ o nyawa madorou manga difauku! Sarakia ngini niakunu niadiri nihihalamati de o naraka mahukumanga?

³⁴Ni ihene nihidodiai: Ngohi aha tahidingoto nginika o nabi-nabi, o nyawa yososawaro, deʼ o guru-guru; o hidoku moi önanga ngini aha niä toma, deʼ o hidoku moioli aha niä salib. Naga aha ngini niähangihara o pupuji matau magoronaka, deʼ aha niä kinïki o kota moioka de o kota moiika.

³⁵Hababu gënanga, ngini aha inïhukumu, karana ngini niätoma o nyawa manga howono koiwa-iwa — muläenge o Habel wahowo-howonua iwi toma hiädono o Zakharia o Berekia ai ngohaka iwi toma, kiaka ngini niä toma ma Jou ai Tau deʼ o huhuba mangï mahi dogorona.

³⁶Ningaku: mata-mata gënanga, aha o nyawa o öraha nënanga yatagongo!”

³⁷”Yerusalem, Yerusalem! O nabi-nabi ngona nätoma. Ma Jou Madutu aihuhuloko-huhuloko ngona näkaweli de o helewo hiädono yohonenge. Mamuruono iböto Ngohi töigo tätoomu ani nyawa hokä o kuru-kuru maayo yömoduku mangoha-ngohaka magahuhu matimiino, mä ngini nioluku!

³⁸Karana gënanga ma Jou Madutu dede nginiokaua.

³⁹La nihi öriki: Muläenge o örahanënanga ngona aha nohimäkeokaua Ngohi hiädono ngona notemo: ’Unanga woböa-böa de ma Jou ai romanga wamäke o barakati.’ ”