Read Tobelo O MATIUS 26 Bible Online

O MATIUS 26 - Tobelo bible

O MATIUS 26

¹Maöraha o Yesus wabötoka wodotoko o hali gënanga mata-mata, Unanga wätemo iwinöninïkika,

² ”Ngini nihiöriki o wange hinotohi o Paskah ma Wange ma Amoko, deʼ o Nyawa manga Ngohaka iwi hilapahi la iwi salib!”

³Oraha gënanga o imam-imam manga häeke deʼ o Yahudioka manga tutudaima toomu o Kayafas ma Imam womo Mulia ai kadatoka.

⁴Onanga moiua yahi öriki imakaturu ihi dailako la iwi tagoko o Yesus de iwitoma.

⁵”Mä,” önanga yato, ”o hali gënanga uha idadi o wange ma amoko maorahoka, hababu done ipuda o huru-hara o kawaha manga hidogoronaka.”

⁶Maöraha o Yesus o Betania mabereraka, o Simon mahira iwi pado-pado, aitauoka,

⁷ o ngoheka momatëngo maino o Yesusino. Münanga moao o boto gahumu moi madol̄a o minya mabounu mahëmo-hëmoro de maija kahä hali. Maöraha o Yesus wogogeruku wol̄omo magogiriaka, o ngoheka gënanga mïgopöa o minya mabounu mahëmo-hëmoro gënanga o Yesus aimumukuku.

⁸Iwinö ninïki o Yesus, yamäke okianaga idädadi gënanga, deʼ onanga yongamo. ”Okia mafaidä mata-mata gënanga amiminya mohigogule?” önanga yotemo.

⁹”O minya mabounu mahëmo-hëmoro gënanga yakunu ihukunu de ma ija ikurutil̄e, deʼ matiwi ma ijaino yakunu yahi döaka o nyawa yomömihikinika!”

¹⁰O Yesus wanäko manga dibanga, hoʼ Unanga wätemo, ”Yadodoa ngini nimï diai o huha o ngoheka nënanga? Münanga modiai okia naga maoa deʼ idadi o puji Ngohino.

¹¹ O nyawa mihikini salalu naga niahidogoronaka, mä Ngohi salalua dede ngini.

¹²De mohi gopöa o minya mabounu mahëmo-hëmoro gënanga ahi röehuku, münanga mohi sadia Ngohi mangale aha ihilungunu.

¹³Ningaku! O dunia ikilolitino, kiaka dika o Abari ma Oa ma Jou Madutuino ihingahu, o ngoheka nënanga amimanarama aha ihiade-adeoli de kaima hohininga munangika.”

¹⁴Yangimoi de yahinoto, iwinöninïki o Yesus, de womatëngo ai romanga o Yudas Iskariot, woiki o imam-imam manga häekika.

¹⁵ Unanga wätemo onangika, ”Okia aha ngini nihihi döaka ngohino nako ngohi tihilapahi o Yesus nginika?” Ho önanga yaëtongo o tiwi haäka moruange, deʼ iwihi döaka unangika.

¹⁶Muläenge o öraha gënanga o Yudas wolingiri o öraha maoa la iwi tagoko o Yesus.

¹⁷O wange madodihiraka o Roti i Ragi-ragi Ua ma Rameanga magoronaka, iwinöninïki o Yesus yaino Unangino. Onanga yoleha, ”Kiaka Bapa nöigo ngomi mihidiai o Paskah mainomo mangale Ngona Bapa?”

¹⁸O Yesus wohaluhu, ”Nioiki o kotaika, niwi mäke womatëngo deʼ niwihi ngahu unangika, ’Ma Bapa Guru wato, Ahi öraha yadonoka; Ngohi tomau tohi amoko o Paskah ani tauoka de ihinö ninïki kama moi.’ ”

¹⁹O Yesus iwinöninïki yodiai hokä o Yesus wähuloko onangika. Onanga yoiki de hidiai o Paskah gënanga mainomo.

²⁰Yohutuku, o Yesus deʼ yangimoi de yahinoto iwinöninïki yogogeruku yol̄omo.

²¹Yol̄omo magogiriaka, o Yesus wätemo. ”Ni ihene; womatëngo niahidogoronaka aha wosetiaokaua Ngohino.”

²²Yoihene gënanga o Yesus iwinöninïki manga hininga duru ihuha. Ho önanga muläenge imatëngo-tëngo iwileha o Yesus, ”Marai ngohiua Bapa ani hininga yodagi?”

²³ O Yesus wohaluhu, ”Onagona yatono o roti o udo-udomuku mima tuono de Ngohi, ge unangala aha wosetia okaua Ngohino.

²⁴Done o Nyawa manga Ngohaka aha wohonenge hokä itulihi Ma Jou Ai Demo ma Buku mahiraka. Mä yobodito o nyawa yasetia okaua o Nyawa manga Ngohakika! Iholoi yaoa o nyawa gënanga ngarouha womakil̄au o duniaino!”

²⁵Deʼ o Yudas wososetia okaua gënanga wotemo, ”Marai ngohi Bapa Guru ani hininga yodagi?” O Yesus wï baluhu, ”Hoko gënanga hokä ani demoka!”

²⁶Maöraha önanga yol̄omo, o Yesus wal̄ë o roti, deʼ wohubayanga wosukur. Ipaha Unanga wabëla-bëlaka o roti gënanga de ai giama deʼ wahidöaka iwinöninïkika de wotemo, ”Nia l̄ë, deʼ nia ol̄omo; nënanga Tongohi ahi röehe.”

²⁷Iböto de gënanga Unanga wal̄ë o angguru magalahi o gahumu moi, deʼ wohubayanga wosukur ma Jou Madutuika. Ipaha Unanga wohidöaka o galahi gënanga iwinö ninïkika de wotemo, ”Niokere ngini mata-mata.

²⁸ Hababu nenangala Ahi awunu ihi goungu itiai ma Jou Madutu ai jaji — o awunu ikopoäka mangale o nyawa manga ngöe la önanga yamäke to önanga manga baradoha ma apongo.

²⁹Ningaku: Ngohi aha tokerokaua o angguru nënanga hiädono maöraha Ngohi tokere o angguru mahungi dede ngini mata-mata Ahi Ama ai Dunia ma Hungioka.”

³⁰Ipaha önanga yonyanyi i hi nyanyi o puji manyanyi moi. Deʼ i böto de gënanga onangö yoiki o Zaitun ma Doporonika.

³¹ Deʼ o Yesus wätemo iwinöninïkika, ”O hutu nënanga dika ngini mata-mata aha nioara nihi mal̄aika Ngohi; hababu Ma Jou Ai Demo ma Buku magoronaka itulihi; ma Jou Madutu wotemo, ’Ngohi aha tïtoma o duba magogöana gënanga, deʼ o duba de matikaka aha imakoki tingakoka.’

³² Mä ipaha de Ngohi tomomikoka, Ngohi aha toiki toma tihira de ngini o Galileaika.”

³³O Petrus wïtemo o Yesusika, ”Ngaro mata-mata mahomoa ini mal̄aika Bapa, ngohi hakali-kali kowali!”

³⁴”Nohohininga,” o Yesus wïtemo Unangika, ”O hutu nënanga dika, o kuru-kuru ihorenowahi ngona nohihi pongono nohi gali mahange.”

³⁵O Petrus wohaluhu, ”Ngarokö kokiani ngohi tohonenge dede Ngona Bapa, ngohi aha koto temoua, ngohi toni näkoua Bapa!” Deʼ mata-mata iwinö ninïki mahomoa mayo temo hoko gënanga.

³⁶Iböto de gënanga o Yesus de iwinöninïki yoiki o ngï moika maromanga o Getsemani. Dokengoka Unanga wätemo, ”Nigogeruku nengokadau jai-jai Ngohi toiki tomäniata.”

³⁷Deʼ Unanga wahigaro o Petrus deʼ o Zebedeus aingohaka yahinoto yoiki dede Unanga. Unanga muläenge wamäo aihininga ihuha deʼ wobaliha.

³⁸Unanga wätemo iwinöninïkika, ”Ahi hininga duru ihuha, tamäo hokä aha tohonenge dika. Nigögogere ngini nenangoka, deʼ nginiö nimä göa-göana dede Ngohi.”

³⁹Ipaha o Yesus woiki iholoi mahuhutulu ikurutika, deʼ Unanga womahi tudukuku o tonakuku de womäniata. Wato, ”Bapa,” ”nako kayakunu, nohihirehene dede Ngohi o huha de o hangihara kiaka Ngohi kokiani tatagongo. Mä uha imoteke Ahi mau, duga-duga imoteke dika Ani mau Ama.”

⁴⁰Iböto de gënanga o Yesus womakilioroli yaruange iwinö ninïkino deʼ wämäkeino önanga imaiduoka. Unanga wïtemo o Petrusika, ”Duga-duga o jam moi dika ngini iniruange niakunua nigöana dede Ngohi?

⁴¹Nimä göa-göana, deʼ nimä niata hupaya ngini uha nia ohana o cocoba. I goungu niawomaha imau yadiai o diai, mä ngini niakunua, karana o nyawa gënanga nanga biaha hobole.”

⁴²Mamoioli o Yesus woiki womä niata, wato, ”Bapa, nako o huha de o hangihara nënanga kokiani Ngohi tatagongo, deʼ yakunua i hï rehene, mal̄aika animau Ama idadi.”

⁴³Iböto de gënanga Unanga womakilioroli iwinöninïkino deʼ wämäkeino iwinöninïki kaima iduokahi, karana önanga duru yäkioko.

⁴⁴Mamoioli o Yesus wamal̄aika önanga deʼ mahigali mahangeoka womäniata, mademo kaimatero de mahinotoka.

⁴⁵Iböto de gënanga Unanga woma kilioroli iwinöninïkino deʼ wätemo, ”Kani maiduokahi deʼ kanimahi batongohi? Nio lega, maöraha yadonoka o Nyawa manga Ngohaka iwihi lapahi o nyawa yoböbaradoha manga kuahaika.

⁴⁶Nimomiki, niaino ngone hoiki. Nia lega! O nyawa yososetiaokaua Ngohino yoböaka.”

⁴⁷O Yesus kawo temo-temohi, o Yudas iwinöninïki manga dodiawo ünanga waino. Imakomoteke dede ünanga, yainoli manga ngöe o nyawa imägao o oworo deʼ o boboha. Onanga o imam-imam manga häeke deʼ o Yahudioka manga tutuda yähuloko.

⁴⁸O Yudas wososetiakaua o Yesusika, wahi ngahuoka onangika o nonako nënanga, ”O nyawa ngohi tïame, ge Unanga doka manyawa. Unanga niwitagoko!”

⁴⁹Ka deimahi ädono genangika o Yudas gila-gila woiki o Yesusika deʼ wïtemo, ”Tabea, Bapa Guru!” Deʼ unanga wïame o Yesus.

⁵⁰O Yesus wïbaluhu, ”Riadodoto, mangale okia Riadodoto naino nenangino?” Ipaha o nyawa manga ngöe gënanga iwïdagi deʼ iwitagoko o Yesus.

⁵¹Womatëngo iwinöninïki manga dodiawo genangokadau de o Yesus, warahuku aioworo deʼ wihioto ma imam womomulia aigilaongo, hiädono o gilaongo gënanga aingauku watöaka.

⁵²O Yesus wïtemo wininïkika gënanga, ”Nohi ngohamoli anioworo maharunguku, hababu mata-mata o nyawa nako yapäke o oworo aha yohonenge de o oworo.

⁵³Natobote Ngohi takunua togahoko o roriwo Ahi Amaika, deʼ Unanga de majapatioka aha wohidingoto o tentara malaekat o doomu ngimoi dehinoto?

⁵⁴Mä nako hoko gënanga, yakunua idadi hokä ihingahuoka Ma Jou Ai Demo ma Buku magoronaka, kiaka kokiani idadi hokä idadioka o öraha nënanga?”

⁵⁵ Deʼ o Yesus wätemo o nyawa yowöe-wöeika gënanga, ”Boteka Ngohi nënanga o nyawa madorou, hiädono ngini niaino de nimä gao o oworo deʼ o boboha la Ngohi nihitagoko? O wange higetongo Ngohi todotoko ma Jou Madutu ai Tauoka, deʼ ngini nihi tagokua!

⁵⁶Mä itiaioka kokiani hokogënanga hupaya idadi hokä okia o nabi-nabi yatulihoka Ma Jou Ai Demo ma Buku magoronaka.” Ipaha de gënanga, mata-mata iwinöninïki yopiringana iwidogumal̄aika o Yesus.

⁵⁷O nyawa iwitago-tagoko o Yesus iwiao o Kayafas ma Imam womoMulia aitauika. Dokengoka o agama maguru-guru deʼ o Yahudioka manga tutuda-tutuda imatoomuinoka.

⁵⁸O Petrus kai gurutika winïki o Yesus hiädono maimam womomulia ailöaka, daha o Petrus wowohama o löa magoronaika gënanga deʼ wogogeruku de yogöa-göana. Unanga wöigo wanäko sarakia aha mata-mata gënanga hiädono mabaha.

⁵⁹O imam-imam manga häeke deʼ mata-mata o Agama ma Juru Hakimi ihidailako yamäke o hakihi yoelu-eluku la yakunu o Yesus iwihukumu, o honenge mahukumanga.

⁶⁰Mä onanga yamäkeua manyonyata igoungu o Yesus wahowono, ngaroka manga ngöe yätumutu yodadi hokä o hakihi yoelu-eluku. Ma baha naga yahinoto mahimangoka yaino.

⁶¹ Onanga yotemo yato, ”O nyawa nënanga wotemo, ’Ngohi takunu takilianga ma Jou Madutu ai Tau, deʼ o wange hange magoronaka takunu tohi gikoli.’ ”

⁶²Deʼ ma imam womomulia womaoko, deʼ wïtemo o Yesusika, ”Boteka Ngona nakunua nöbaluhu o galaki madumutu ngonaika gënanga?”

⁶³Mä o Yesus woma rirïdoka dika. Mamoioli ma imam womomulia wïtemo Unangika, ”De ma Jou Madutu wowango-wango, nohi ngahu ngomino, boteka Ngona ma Koano Wohi hohalamati ma Jou Madutu ai Ngohaka?”

⁶⁴ O Yesus wïbaluhu, ”Hoko gënanga ani demo. Mä ningaku: muläenge o öraha nënanga ngini aha niwimäke o Nyawa manga Ngohaka wogogeruku ma Jou Madutu woko Kuaha ainirakoka, deʼ woböa o dihangoka o lobi-lobi mal̄okuoka!”

⁶⁵ De maimam womomulia gënanga wakä kakihi aibaju, deʼ wotemo, ”Unanga ma Jou Madutu wihikauku. Paraluokaua dema hakihiohi. Ngini mata-mata ni ihenoka mahirete o demo-demo iwihikauku ma Jou Madutu.

⁶⁶Oraha nënanga sarakia ngini nia damäke?” Onanga yohaluhu, ”Unanga wahowono, de kokiani wohonenge.”

⁶⁷ Dahaö önanga yaobiri o Yesus aibiono, deʼ iwigohara. Nagaoli iwi poka,

⁶⁸deʼ yotemo, ”Beika nahetongo deʼ nohi ngahu ngomino, hei ma Koano Wohihohalamati! O nagona inipoka Ngona?”

⁶⁹O Petrus wogogerukuohi maporetoka o löaka. Momatëngo molöleleani maino, deʼ mïtemo o Petrusika, ”Mode koigoungua ngonaö ninïki o Yesus o Galilea manyawa gënanga?”

⁷⁰Mä o Petrus womahi pongono önanga mata-mata mangahimangoka. ”Ngohi tohiorikua okia madungutu anidemo,” o Petrus wohaluhu,

⁷¹deʼ unanga woiki o löa mangoranika. Momatëngo molöleleani mahomoali mïmäke o Petrus, deʼ mä temo manyawa genangokadau, ”O nyawa nënanga kangano unangö winïki de o Yesus o Nazaretino gënanga.”

⁷²Deʼ o Petrus wihipongonoli, deʼ wokoboto. ”Igou-goungu ngohi tïnäkoua o nyawa ge Unanga!” o Petrus wato.

⁷³I böto de gënanga itedekanua, o nyawa ima oko-okoino genangokadau yaika o Petrusika, deʼ iwitemo, ”Maraioka ngona nënanga o Yesus de iwinöninïki manga dodiawo. Gënanga duru ima tungü uku ani lugo.”

⁷⁴Deʼ o Petrus womuläenge womahilolai deʼ wotemo, ”Ngohi ti näkoua o nyawa ge Unanga!” O öraha genangö o kuru-kuru ihorene.

⁷⁵Deʼ o Petrus womä hininga o Yesus wïtemoka unangika, ”O kuru-kuru ihorenowahi, ngona nohigali mahange nohihi pongono Ngohi.” Deʼ o Petrus wohupu, deʼ woari de aihininga i huha.