Read Tobelo O MATIUS 28 Bible Online

O MATIUS 28 - Tobelo bible

O MATIUS 28

¹Maöraha o Yahudioka manga Puji mawange yatioka, o Minggu mawangeoka duru o ngoru-ngorumino, o ngo Maria Magdalena, deʼ o ngo Maria mahomoahi gënanga yoiki yölega o lungunu gënanga.

²Itodokanino o ohu duru kahägiria. Ma Jou aimalaekat womatëngo, o horogaka de wouti, deʼ walulu mahelewo o lungunu mabebeno gënanga, deʼ wogogeruku mahelewo mal̄okuoka.

³O malaekat gënanga aibiono hokä o leletongo, deʼ ai pakeanga duru kahamagarehe.

⁴O tentara yogöa-göana genangoka, duru yohawana hiädono önanga yohahara, deʼ ima dadi hokä o nyawa yohonengoka.

⁵O malaekat gënanga wätemo o ngongohekaika gënanga, ”Uha nihawana! Ngohi tohiöriki ngini niwilingiri o Yesus iwi sosaliboka gënanga.

⁶Unanga koiwiwa nenangoka. Unanga womomikoka hokä mahira winihi ngahuoka. Nia ino niolega Ai ngï Unanga iwi kelenga.

⁷Orahanënanga, nioiki nima tai-taiti, nihingahu iwinöninïkika, ’Unanga womomikoka de nënanga naga Unanga woiki wohiraka o Galileaika ngini niwihiduru. Dokengoka ngini aha niwimäke Unanga!ʼ Nio hininga okia winihi ngahuoka nginika.”

⁸O ngongoheka gënanga imatai-taiti yamal̄a o lungunu gënanga. De yamäo yohawana imaganu yomörene, önanga imapopäta la ihi ngahu o hali gënanga o Yesus iwinöninïkika.

⁹I todokanino o Yesus waino imakamäke de ongongoheka gënanga, deʼ wätemo, ”Tabea!” Deʼ onanga yaino imahi tigi Unangika, ipaha Ai l̄ou yakololo deʼ iwihuba Unanga.

¹⁰”Uha nihawana,” o Yesus wätemo onangika, ”nioiki niahingahu ahiroriadodotika hupaya önanga yoiki o Galileaika; dokengoka önanga aha ihi mäke Ngohi.”

¹¹O ngongoheka gënanga yosoboka, yamuruono naga matentara yogöa-göana o lungunu gënanga imakilioro o kotaika deʼ ihi ngahu o imam-imam manga häekika mata-mata okianaga i dädadioka.

¹²O imam-imam manga häeke gënanga imakatatoro ihidailako de o Yahudioka manga tutuda, deʼ yahidöaka o tiwikahä amoko o tentara yogöa-göanika gënanga,

¹³deʼ yätemo yato, ”Ngini kokiani niahëtongo, ngomi imï kiokoka deʼ o Yesus iwinö ninïki yaino o hutu-hutu deʼ ya tohiki o Yesus ai mayeti.

¹⁴Deʼ nako magubernur woihene o hali gënanga, ngomi aha miwi baja ünanga hupaya ngini ma o huha okia-kiaua nia mäke.”

¹⁵Deʼ o tentara yogöa-göana gënanga yal̄ë o tiwi gënanga, deʼ yadiai hokä okia yahibehehongo onangika. Mangale karana gënanga o ade-ade gënanga kahi ade-adeohi o Yahudi manyawa manga hidogoronaka hi ädono o wange nënanga.

¹⁶ Yangimoi de moi iwinö ninïki o Yesus gënanga yoiki o Galilea madoporonika imamoteke de o Yesus wahi paretaka onangika.

¹⁷Maöraha önanga iwi mäke o Yesus dokengoka, önanga ima ruku iwi huba Unanga. Mä naga manga hidogoronaka yongaku i kiria owahi.

¹⁸O Yesus womahi tigi onangika deʼ wätemo, ”Ingodumu o kuaha o horogaka deʼ o duniaka ihi döakoka Ngohino.

¹⁹ Hababu gënanga nioiki hagala o hoana de o berera o dunia mata-mataika, niahidadi önanga ihinöninïki. Niä ohiki önanga de niahëtongo ma Ama ai romanga, deʼ ma Ngohaka, deʼ ma Jou Madutu ai Womaha.

²⁰Nia dotoko önanga yamoteke mata-mata tinihi poparetaka nginika. Deʼ niohininga Ngohi aha salalu tinïtomoteke ngini hiädono o wange mabaha.”