Read Tobelo O MATIUS 3 Bible Online

O MATIUS 3 - Tobelo bible

O MATIUS 3

¹O öraha gënanga o Yohanis Woohi-ohiki waino o tonaka ikokakahaino o Yudea mabereraka deʼ muläenge woriwayati.

² Wotemo, ”Nitoba bötohi o baradoha nidiai,” ”karana ma Jou Madutu de majapatioka aha wopareta hokä o Koano!”

³ O Yohanis neünanga manyawa ma Nabi Yesaya wohidungutu aidemo-demo nënanga magoronaka, ”Naga o nyawa yopöa-pöaka o tonaka ikökakahaka, ’Nihidiai o ngëkomo mangale ma Jou; mangale Una o ngëkomo nihi rata.’ ”

⁴ O onta magogo yadiai o baju, gënanga o Yohanis womahi baju. O aiwani makai yadiai o Yohanis ai gorona maninikutu, deʼ ai inomo o kahoho deʼ o honganika maohungu magula.

⁵O Yerusalem manyawa manga ngöe, deʼ ingodumu o Yudea maberera, deʼ o Yordan ma Ngairi magilolitino, önanga yoböa o Yohanisino.

⁶Onanga imangaku manga baradoha, deʼ o Yohanis wäohiki o Yordan ma Ngairoka.

⁷ Manga ngöeoli o Farisi deʼ o Saduki manyawa yoböa o Yohanisino la wäohiki. Mä o Yohanis wämake önanga yaino, ünanga wätemo onangika, ”Ngini o nyawa madorou! O nagona inihingahu ngini aha inïkoronaua ma Jou Madutu Ai hukumanga aha iböa-böa gënanga?

⁸Nihi dumutu niamanarama, ngini nitobaka o baradoha nidiaiokaua.

⁹ Uha niatobote ngini niakunu nimahi rehene de o hukumanga, de nitemo o Abraham ganga niaete de niatohora. Nio hohininga, o helewo-helewo nenangö, ma Jou Madutu wakunu wodiai o Abraham aidifauku!

¹⁰ O bahuku ikelenga ukuoka o gota mapëngoka la magota yatol̄anga hiädono mangutu-ngutuku. O gota-gota ihohokua o hohoko maoa aha yatol̄anga deʼ yaümo o ukuika.

¹¹Ngohi tinï ohiki de o akere, la inyata ngini o baradoha nidiai okaua de nitobaka; mä ipaha de ngohi aha womatengoli woböa, Una aha winï ohiki de ma Jou Madutu Ai Womaha deʼ o uku. Unangohi wolamoko de ngohi. Ai hapato dika to ao, genangö de topatutua.

¹²Ai giamoka naga o tatapa, la o gandum de maakemoka aha yatoomu, matauika, mä maafa aha yatuhuku o ukuika, mauku ihone-honengua.”

¹³O öraha gënanga o Yesus o Galilea de woiki o Yordan ma Ngairika. Dokengoka Una waino o Yohanisino, deʼ wogahoko wïohiki.

¹⁴Mä o Yohanis wohitaili watila Ai gogahoko gënanga. O Yohanis wotemo, ”Ngohi kokiani ngona Bapa nohiohiki. Ino de o öraha nënanga Bapa naino ngohiino.”

¹⁵Mä o Yesus wohaluhu, ”Mal̄aika dika, örahanënanga. Hababu de hokogënanga, ngone hadiaioka mata-mata ma Jou Madutu Ai mau.” Hoʼ o Yohanis wïohiki o Yesus.

¹⁶Wïohiki iböto, de majapati o Yesus wohupu o akeril̄e. Itedekanua o dihanga ihelenga deʼ o Yesus wamäke ma Jou Madutu Ai Womaha iuti hokä o namo dara itangi unanguku.

¹⁷ Ipaha yoihene ma Jou Madutu Ai ilingi ihi ngahu, ”Nenangala Ahi Ngohaka tïdora-dora. Unanga Ahi hininga yadäene.”