Read Tobelo O MATIUS 4 Bible Online

O MATIUS 4 - Tobelo bible

O MATIUS 4

¹ Ipaha, ma Jou Madutu Ai Womaha iwi ao o Yesus, o tonaka ikokakahaika la o Ibilihi iwi taili.

²O wange moruata de o hutu moruata, o Yesus wol̄omua. Deʼ una wamäo iwi hahini.

³O Ibilihi yaino deʼ itemo, ”Koigoungua Ngona ma Jou Madutu Ai Ngohaka? Aa, nahuloko o helewo-helewo nënanga idadi o roti.”

⁴ O Yesus wohaluhu, ”Ma Jou Ai Demo ma Buku magoronaka itulihi: O nyawa yamäkeua yowango de o roti dika, mä yakunoli, de o demo moi de moi, ma Jou Madutu wohidö demo-demo.”

⁵I böto de gënanga o Ibilihi iwi ao o Yesus o Yerusalemika, o kota itebi-tebini, deʼ iwi kelengauku ma Jou Madutu Ai Tau maponatoka.

⁶ Deʼ o Ibilihi itemo Unangika, ”Koigoungua Ngona ma Jou Madutu Ai Ngohaka? Nomangumo daenguku; hababu Ma Jou Ai Demo ma Buku magoronaka naga itulihi hoko nënanga, ’Ma Jou Madutu aha wähuloko Ai malaekat-malaekat ini göana ngona, ona aha ini lëgono de manga giama, hupaya ani l̄ou mauha ipeleke o helewoika.’ ”

⁷ O Yesus wohaluhu, ”Mä Ma Jou Ai Demo ma Buku magoronaka i tuliholi, ’Uha ngona nï taili ani Jou Madutu.’ ”

⁸Ipaha o Yesus iwiaooli o Ibilihi o l̄okuil̄e, de o l̄oku gënanga duru ikurutil̄e, deʼ iwihi dumutu Unangika mata-mata o duniaka mapopareta de toënanga makaya.

⁹Deʼ o Ibilihi iwitemo o Yesusika, ”Mata-mata nënanga ngohi tonihidöaka Ngonaika, nako Ngona natilabuku nohihuba ngohi.”

¹⁰ O Yesus wohaluhu, ”Noiki, nopiringana ngona, hei Nogoda-goda! Ma Jou Ai Demo ma Buku magoronaka itulihi: Niwi huba ma Jou, nia Jou Madutu, deʼ niwï leleani Unanga dika!”

¹¹Mabaha o Ibilihi iwimal̄aka o Yesus, deʼ o malaekat-malaekat yaino iwï leleani Unanga.

¹² Maöraha yoihene o Yohanis iwihi ngohama o buiika, o Yesus womahiditoko o Galileaika.

¹³ Una wamal̄a o Nazaret, deʼ wogogere o Kapernaum mabereraka, o Galilea ma Taaga madatekoka, o Zebulon deʼ o Naftali manga daeraoka.

¹⁴Karana o Yesus wadiai o hali gënanga, idadi hokä okia ma Nabi Yesaya wotemo,

¹⁵ ”O Zebulon aitonaka deʼ o Naftali aitonaka, o ngëkomo o taagaika, o Yordan ma Ngairi mahonongaka, o Galilea o Yahudi okaua manga tonaka!

¹⁶O hoana manyawa yowango o huhutu magoronaka o dararono itotararono yamäkeoka! Yogö gogere o honenge mahuhutu mabereraka yadupudaka o dararono macahaya!”

¹⁷ Madero o öraha gënanga, o Yesus womuläenge wohi ngahu, ”Nitoba bötohi o baradoha nidiai, karana aha dema japatioka, ma Jou Madutu wopareta hokä o Koano!”

¹⁸Maöraha o Yesus magogiriaka wotagi o Galilea ma Taaga mahohanino, Unanga wämäke yahinoto o nawoko yolingi-lingiri, enagënanga o Simon (iwihi romangoli o Petrus) de aidodoto, o Andreas. Onanga magogiriaka o nawoko yotagoko, de o homa, o taagaoka.

¹⁹O Yesus wätemo onangika, ”Niaino nihinïki Ngohi. Ngohi tinï dotoko ngini o nyawa nihoma.”

²⁰Onanga kahigila yamal̄aika manga homa deʼ iwi nïki o Yesus.

²¹O Yesus wotagi gila-gila, de wä mäkeoli mahomoa o riadodoto, enagënanga o Yakobus deʼ o Yohanis, o Zebedeus aingoha-ngohaka. Onanga de manga ama magogiriaka manga homa ihidiai manga ngotiroka. O Yesus wä ahoko onangö,

²²deʼ onanga kahigila yamal̄aika manga ngotiri deʼ manga ama, deʼ iwinïki o Yesus.

²³ O Yesus wakiloliti o Galilea maberera mata-mataika, deʼ wodotoko o pupuji matauoka. Unanga wohi ngahu o Abari ma Oa, ma Jou Madutu aha wopareta. De Unangö wahi togumu o nyawa yopopanyake deʼ manga röehe iahu-ahumua.

²⁴O abari mangale o Yesus gënanga yodogilianga o Siria maberera mata-mataika, hiädono manga ngöe o nyawa yaino Unangino. Onanga yä ao o nyawa yatago-tagongo hagala rupa o panyake, deʼ o huha. O nyawa yängoha-ngohama o womaha madorou, yahöhohomu, deʼ yolugu-lugu, mata-mata o Yesus wahitogumu.

²⁵Iwinöninïki o Yesus o öraha gënanga duru kamanga ngöe. Naga o Galilea de yaino, o Kota Ngimoi de yaino, o Yerusalem de yaino, o Yudeaino, deʼ nagaoli o Yordan ma Ngairi mahonongaka de yaino.