Read Tobelo O MATIUS 7 Bible Online

O MATIUS 7 - Tobelo bible

O MATIUS 7

¹”Uha nimadadi hakimi o nyawa mahomoaika, hupaya ngini mahirete, uha winihihakimi ma Jou Madutu.

² Hababu hoka sarakia ngini niahihakimi o nyawa mahomoa, hoko genangoli aha ma Jou Madutu winihihakimi. Deʼ o duduga niahipäke-päke o nyawa mahomoaika, aha ma Jou Madutu winihipäke ö nginika.

³Yadodoa ho ngini niolega o gota mawal̄e niariadodoto ailako magoronaka, barikua o balaki nialako mahirete magoronaka ngini nia tailakoua?

⁴Sarakia ngini yakunu nitemo niariadodotika, ’Naino ngohi tohihupu o gota mawal̄e gënanga anilakoka,’ barikua anilako magoronaka mahirete naga o balaki?

⁵Hei tengeluku! Nohi hupuokahi o balaki anilako mahireteoka, dahaö ngona nölega de madiai, deʼ yakunu nohihupu o gota mawal̄e ani riadodoto ai lakoka.

⁶Uha nohi döaka o baranga madebi-debini o kahoika, hupaya o kaho gënanga uha imaidulino deʼ inigoli. Deʼ uha nohi döaka o muhutika o odeika, hupaya o ode gënanga uha yadoko-doko o muhutika gënanga.”

⁷”Nigahoko, ngini aha niatarima. Nilingiri, ngini aha niamäke. Nitolo, o ngorana aha inï dobelenga.

⁸Karana o nyawa yogahoko aha yatarima; o nyawa yolingiri aha yamäke; deʼ o nyawa yotolo aha yädobelenga o ngorana.

⁹Ngini niahidogoronaka mode naga o ama wahidöaka o helewo ai ngohakika, nako o roti yogahoko?

¹⁰Ekola wahi döaka o dodiha, nako o nawoko yogahoko?

¹¹Ngarokö ngini itorou, ngini kania näko nihidöaka okia naga maoa nia ngoha-ngohakika. Maboboloioli nia Ama o horogaka! Una iholoioli aha wahi döaka okia naga maoa o nyawa yogaho-gahoko Unangika.

¹² Nia hidiai o nyawa mahomoaika hokä ngini nioigo önanga ini hidiai. Genangala o Musa aitita matiti deʼ o nabi-nabi manga dodötoko.”

¹³”Niwohama nianonu o ngorana ipopeneto, hababu o ngorana deʼ o ngëkomo yodumutu o narakaika, ilamoko deʼ i wöata, deʼ manga ngöe o nyawa yanonu.

¹⁴Mä ipeneto deʼ ihuha o ngorana deʼ o ngëkomo, yä ao o nyawa o ngangoika. Deʼ duga-duga ka manga huhutulu o nyawa yamäke.”

¹⁵”Nimahidodiai mangale o nabi-nabi madutua. Onanga yaino nginino imahi biono o duba, mä imoteke madiai önanga hokä o kaho honganika itotual̄ono.

¹⁶Ngini aha niä näko önanga, toönanga manga manarama mahasiloka. O gota ihohihika ihohokua o angguru, deʼ o momo mahohihika ihohokua o ara.

¹⁷O gota mautu iboburereino hamäke o hohoko maoa, deʼ o gota mautu ipopelelakino hamäke o hohoko madorou.

¹⁸O gota mautu maboburere hamäkeua mahohoko itorou, deʼ o gota mautu ipopelelaka, hamäkeua mahohoko yaoa.

¹⁹ O gota mautu moi-moi i hohokua o hohoko maoa, yatol̄anga deʼ yatuhuku.

²⁰ Hoko genangoli de o nabi-nabi madutua. Ngini aha nianako önanga manga manarama mahasiloka.”

²¹”Mata-mataua o nyawa ihi ahoko Ngohi, ’Jou, Jou,’ aha yodadi ma Jou Madutu aiumati, mä duga-duga o nyawa yadodiai Ahi Ama o horogaka Ai mau.

²²O Kiamati ma Wangeoka manga ngöe o nyawa aha yotemo Ngohino, ’Jou, Jou, koigoungua de Ani romanga ngomi mihingahuoka Jou Madutu anibehehongo? Deʼ koigoungua de Ani romangoli Jou, ngomi mia duhuoka o womaha madorou de midiai mangöe o nonako ihëra-hëranga?ʼ

²³ Mä Ngohi aha tohaluhu, ’Ngohi komaiwa tinïnäko ngini! Nioiki nenangokadau, ngini nidodiai o dorou!ʼ ”

²⁴”Aa, o nyawa yoihene Ahi demo nënanga, deʼ yamoteke, ima tero hokä o nyawa yososawaro ihigoko manga tau o helewo mal̄okuoka.

²⁵Maöraha o awana iuti, deʼ o nguihi iböa deʼ o hidal̄oko i puturungu yawuwu o tau gënanga, o tau gënanga irubaua, hababu higokoka o helewo mal̄okuoka.

²⁶Deʼ o nyawa yoihene Ahi demo nënanga, mä yamotekua, önanga imatero hokä o nyawa yobodo-bodo ihigoko manga tau o dowongi mal̄okuoka.

²⁷Maöraha o awana iuti, deʼ o nguihi iböa, deʼ o hidal̄oko i puturungu yawuwu o tau gënanga, o tau gënanga iruba. Deʼ i kilianga duru kahagiria!”

²⁸ Mabaha o Yesus wodotoko iböto, deʼ o nyawa naga genangoka duru yohëranga yoihene Ai dodötoko.

²⁹Hababu Unanga wodotoko de makumati, hokä manga guru-guru agamaua.