Read Tobelo O MATIUS 8 Bible Online

O MATIUS 8 - Tobelo bible

O MATIUS 8

¹O Yesus o doporonoka de wouti, deʼ manga ngöe o nyawa iwinïki.

²O öraha gënanga waino womatëngo iwi pado-pado. Unanga watilabuku o Yesus aihimangoka, deʼ wotemo, ”Bapa, nako Bapa nömodeke, Bapa yakunu nohihi togumu ngohi.”

³O Yesus wipal̄anga o nyawa gënanga de wotemo, ”Ngohi tomau. Notogumu!” Oraha gënanga dika aipanyake ihihanga.

⁴ Deʼ o Yesus wïtemo, ”Nohohininga! Kamoikaö de uha nohi ade-ade. Mä noiki maimamika, deʼ nogahoko ünanga wohigoungu ngona notogumoka. Iböto gënanga nohihuba o huhuba o Musa wohipopareta, hokä manonako igoungu o nyawaika, ngona igou-goungu notogumoka!”

⁵Maöraha o Yesus wowohama o Kapernaum makotaika, womatëngo o Roma manga kapita waino imamäke de una, deʼ wogahoko wïriwo.

⁶Ma kapita gënanga wotemo, ”Bapa,” ”wohilö leleani wopanyake ahi tauoka. Una woluluiha aidangiroka, wakunua womädagi deʼ duru kaihiri.”

⁷O Yesus wato, ”Ngohi aha toiki tihitogumu.”

⁸”Ngarouha Bapa,” makapita gënanga wohaluhu, ”Ngohi topatutua, Bapa tonitarima ahi tauoka. Bapa nopareta dika. Done aha wohilö leleani gënanga wotogumu.

⁹Hababu ngohiö nënanga kata moteke ahi l̄okuil̄e manga pareta. Deʼ ahi timiuku naga o tentara-tentara kokiani yamoteke ahi pareta. Nako ngohi tïhuloko o tentaraoka womatëngo, ’Noiki!ʼ unangö woiki. Ngohi tätemo mahomoaika, ’Naino nengino!ʼ Unangö waino; deʼ nako ngohi tïpareta ahi gilaongo, ’Nadiai nënanga!ʼ unangö wadiai.”

¹⁰O Yesus woihene okia makapita gënanga wotemo, una duru wokiriri. Deʼ una wätemo o nyawa iwinöninïkika, ”Goguleua o nyawa nënanga. O Israel manyawa manga hidogoronakaö de komaiwahi Ngohi tamäke o ngongaku hokonënanga maämoko!

¹¹ Igoungu! Manga ngöe o nyawa aha yoböa o wange mahiwariha deʼ o wange madumunoko la yomore-morene de o Abraham, o Ishak, deʼ o Yakub, ma Jou Madutu ai Dunia ma Hungi magoronaka.

¹² Enahioko o nyawa kokiani yodadi ma Jou Madutu aiumati, aha yäumo mahohuhutuika, doka maporetoka. Genangoka önanga aha yoari deʼ yohangihara.”

¹³Deʼ o Yesus wïtemo makapitaika gënanga, ”Nolio, okia ngona nongaku gënanga aha idadi.” Deʼ o öraha gënanga dika wilö leleani gënanga wotogumu.

¹⁴O Yesus woiki o Petrus aitauika. Genangoka una womi mäke o Petrus ngoitoroa magogiriaka imigogama amidangiroka.

¹⁵O Yesus wapal̄anga amigiama, deʼ amipanyake ihihanga. Münanga momomiki deʼ muläenge mïleleani o Yesus.

¹⁶O öraha muläenge bimaoa, o nyawa yä ao o Yesusika, manga ngöe o nyawa yangohamika o womaha madorou. Deʼ o demo döaka moi dika, o Yesus wadühu o womaha madorou gënanga deʼ wahitogumoli mata-mata o nyawa yopopanyake.

¹⁷ O Yesus wadiai mata-mata gënanga, deʼ hokogënanga idadi hokä okia ma Nabi Yesaya wotemo hokonënanga, ”Unanga womahi tagongo, nanga huha de nanga hangihara, deʼ wohitogumu nanga panyake.”

¹⁸Naga duru manga ngöe o nyawa o Yesus iwikilolitino. O Yesus de wämäke önanga mata-mata, Unanga wähuloko iwinöninïki, yoiki o taaga mahonongaika.

¹⁹Deʼ o agama maguru womatëngo waino Unangino deʼ wotemo, ”Bapa Guru, ngohi tomau toni nïki Bapa kiaika dika!”

²⁰O Yesus wohaluhu, ”O kaho honganika de maaruku, deʼ o totaleo de maigutu, mä o Nyawa manga Ngohaka koiwa aingï womahi ruba-ruba.”

²¹Deʼ womatëngo iwinöninïki mahomoa wotemo, ”Bapa, nohihi gumal̄a toliohi la ahi ama tilungunohi.”

²²Mä o Yesus wohaluhu, ”Nohi nïki Ngohi, deʼ mal̄aika o nyawa mahonenge yälungunu mahirete manga nyawa yohone-honenge.”

²³O Yesus deʼ iwinöninïki yoharene o ngotiril̄e yoiki o taaga mahonongaika.

²⁴Mahoanika o Yesus womäiduoka. Itodokanino o rato duru kahagiria yöduguti o taagauku, hiädono manga ngotiri o lulu hiboha-boha.

²⁵Iwinöninïki yoiki Unangika, deʼ iwitömanga. ”Bapa! Nonä riwo! Ngone hobodito!” önanga yopöaka.

²⁶”Yadodoa hongini nihawana?” o Yesus wotemo. ”Ngini ikuranga ningaku Ngohino!” Ipaha o Yesus womaokoil̄e deʼ wataaere o hidal̄oko deʼ o taaga gënanga. Deʼ o taaga idadi duru irïdi.

²⁷Iwinöninïki o Yesus yohëranga. Onanga yotemo, ”O nyawa okia ne Unanga, hiädono o hidal̄oko deʼ o lulu mayamoteke Ai pareta!”

²⁸O Yesus womahiädono o taaga mahonongaika, o Gadara madaeraoka. Dokengoka yahinoto yangohamika o womaha madorou. Yaino Unangino o nyawa yahinoto gënanga duru yokinïki, hiädono moiua yämoroëne genangino yakaino.

²⁹Onanga o jere mabai-baitino de yohupu, deʼ yopöaka, ”Jou Madutu ai Ngohaka aha Ngona nomï sarakia ngomi? Boteka Ngona nomï mauoka nomihangihara ngarokö koma orahowahi?”

³⁰Genangoka de hokokiaua magurutika, naga o ode duru kahangöe magogiriaka o inomo imälingiri.

³¹O womaha madorou gënanga igahoko o Yesusika, ”Nako Ngona nomau nomïhuloko mihupu, nomï huloko ngomi miwohama o odeika gënanga.”

³²O Yesus wotemo, ”Nioiki!” O womaha madorou gënanga ioiki yätingaka o nyawa yahinoto gënanga, deʼ iwohama o odeika. Deʼ o ode mangöe gënanga ipiringana deʼ imangumo o taaga mabakoruku, deʼ yalutu.

³³O ode yogöa-göana gënanga imapopäta o kotaika, deʼ hijarita mata-mata idädadioka gënanga, de okia idadioka de o nyawa yahinoto o womaha madorou yangoha-ngohamika gënanga.

³⁴Hoʼ mata-mata o nyawa o kotaoka gënanga yoiki imakamäke de o Yesus, maöraha önanga iwimäke o Yesus, önanga duru yogahoko hupaya wamal̄a manga daera.