Read Tobelo O MATIUS 9 Bible Online

O MATIUS 9 - Tobelo bible

O MATIUS 9

¹Manga ngotiri yahitomoko, o Yesus wodöa o ngotiril̄e deʼ yatöaka o taaga, imakilioro manga kapongika.

²Genangokadau o nyawa iwiao Unangika womatëngo wolugu-lugu kawo rubaiha aidangiroka. Oraha o Yesus wamäke hokokia maamoko manga ngongaku, Unanga witemo wolugu-luguika gënanga, ”Ani hininga nabitumu, Ahi ngohaka! Ani baradoha iapongoka.”

³Genangokadau o agama maguru-guru yamuruono naga manga hiningaka yotemo, ”O nyawa nënanga wihikauku ma Jou Madutu!”

⁴O Yesus wanäko manga dibanga, deʼ Unanga wotemo, ”Yadodoa honiadibanga mamodorouino gënanga?

⁵Kiaka iholoi igapanga: Totemo, ’Ani baradoha iapongoka’, ekola Totemo, ’Nomomiki deʼ nomä dagi’?

⁶Mä orahanënanga Ngohi aha tohi nyata igoungu nginika, o dunia mal̄okuoka nënanga o Nyawa manga Ngohaka wokuaha waapongo o baradoha.” Deʼ o Yesus wïtemo wolugu-luguika gënanga, ”Nomomiki, nagoraka anitikara, deʼ nolio!”

⁷O nyawa wolugu-luguö gënanga womomiki deʼ wolio aitauika.

⁸Oraha o nyawa yamäke idädadioka gënanga, önanga yohawana deʼ iwihigiriri ma Jou Madutu, hababu ma Jou Madutu wohidöakoka o kuaha hokogënanga maamoko o nyawaika.

⁹Ipaha o Yesus watingaka o ngï gënanga. Yotagi magogiriaka, Unanga wïmäke womatëngo o soungu wogaho-gahoko, airomanga o Matius, kawo gogerukuohi aikantoroka. O Yesus wïtemo unangika, ”Naino nohi nïki ngohi!” De o Matius womaoko deʼ wïnïki o Yesus.

¹⁰ Maöraha o Yesus wol̄omo magogiriaka o Matius aitauoka, o soungu yogaho-gahoko manga ngöe yaino deʼ o nyawa imoteke o kawaha manga lolegaka o nyawa madorou, yaino imahi kol̄omo de o Yesus deʼ iwinöninïki.

¹¹Naga o Farisi manyawa yamäke o hali gënanga. Deʼ önanga yoleha o Yesus iwinöninïkika, ”Okia mahababu niaguru wol̄omo imakongol̄omo moi de o soungu yogaho-gahoko, deʼ o nyawa madorou?”

¹²O Yesus woihene mangaloleha gënanga deʼ wohaluhu, ”O nyawa yopopanyakeua yoparaluua o dotere, duga-duga o nyawa yopopanyake dika.

¹³ Nia tailako okia mamangarati Ma Jou Ai Demo ma Buku mademo nënanga: ’Ngohi tömau o hayanga de o dora, mä o huhuba de o aiwaniua’. Hababu Ngohi taino tä ahokua o nyawa imamäo mangadiri yaoaka, duga-duga önanga o nyawa manga lolegaka okiaua yädäene.”

¹⁴Ipaha de gënanga iwinöninïki o Yohanis Wo ohi-ohiki yaino o Yesusino. Deʼ onanga yoleha, ”Yadodoaho ngomi deʼ o Farisi manyawa mipuaha hode ininöninïki Bapa kowali?”

¹⁵O Yesus wohaluhu, ”Sarakia ngini niadamäke? Yakunu yaino-ino o kawingi marameangino manga hininga ihuha nako o nauru wokawi-kawingi una naga dede onangohi? Marai kowali! Mä aha maöraha iböa o nauru wokawi-kawingi onangoka de iwi ngoho. O öraha gënanga daha önanga yopuaha.

¹⁶Moiua o nyawa manga baju madorou, ihitapa de o ngöere mahungi. Hababu done o dadapa gënanga yakakihi, deʼ makakihi iholoi ilamoko.

¹⁷Kogenangoli moiua o nyawa yoguhe o angguru mahungi, o ngï madorouku. Hababu o ngï gënanga aha i pooteke deʼ i bodito, deʼ maangguru ikopoa. O angguru mahungi kokiani yöguhe mangï mahungiuku, hupaya hinotö yadodoaua.”

¹⁸O Yesus kawä temo-temohi o Yohanis Wo ohi-ohiki iwinöninïki, womatëngo o pupuji matau mabaluhu waino. Unanga wa tilabukuku o Yesus aihimangoka deʼ wotemo, ”Ngohi ora gënanga dahaö mohonenge. Mä tanu naino nomi pal̄anga hupaya muna mowangoli.”

¹⁹O Yesus womaoko deʼ iwinöninïki onangö yoiki, de o nyawa gënanga.

²⁰O ngëkomo mahidogoronaka o ngoheka mopopanyake momatëngo, o taongo ngimoi de hinoto mokokopoa, maino momahitigi o Yesus aiporetino. Muna amihiningaka mato, ”Ngohi ngaroka tapal̄anga aijuba, ngohi aha totogumu.” Deʼ munanga mapal̄anga o Yesus ai juba mabarene.

²²O öraha gënanga o Yesus womälega aiporetoko deʼ womi mäke o ngoheka gënanga, deʼ womitemo munangika, ”Ani hininga nabitumu, Ngohi ora! Karana ngona nongaku Ngohino, ngona notogumu!” O öraha gënanga dika mangoheka gënanga motogumu.

²³Ipaha o Yesus womahi ädono o pupuji matau mabaluhu, ai tauika. Maöraha Unanga wämäke youle-ule o duka magogule, deʼ manga ngöe yogïgigoro,

²⁴Unanga wätemo onangika, ”Nihupu ngini mata-mata! O ngohaka nënanga mohonengua; münanga imi kiokoka dika.” Onanga mata-mata iwïgogiete o Yesus.

²⁵Iböto o nyawa gënanga yohupu, o Yesus wowohama o ngohaka gënanga amikamarika deʼ wasö amigiama. Deʼ momomiki o ngohaka ngoheka gënanga.

²⁶O abari gënanga yodogilianga madaera gënanga mata-mataika.

²⁷O Yesus genangoka de womä jobo, deʼ o ngëkomo mahoanoka yahinoto o nyawa yopilo-piloko iwinïki. Onanga yopöaka, ”Daud ai Ngohaka, nomï dora ngomi!”

²⁸De o Yesus wowohama o tauika, yahinoto yopilo-piloko gënanga yaino Unangino. O Yesus wäleha onangika, ”Mode ngini ningaku Ngohi takunu tinihi togumu?” ”Mingaku, Bapa!” önanga yohaluhu.

²⁹Deʼ o Yesus wapal̄anga manga lako de wotemo, ”Karana ngini ningaku, idadi hokä okia ngini nionganono.”

³⁰Hoʼ önanga yakunu imahi öriki. O Yesus wahi poma-poma hupaya o hali nënanga moikaö de uha ihingahu.

³¹Mä önanga yoiki deʼ ihingahu-ngahu o abari mangale o Yesus, o daera gënanga mata-mataika.

³²Yahinoto yopilo-piloko gënanga yoikoka, womatëngo womou-mou, o womaha madorou iwingohamika iwiao o Yesusika.

³³O Yesus waduhu o womaha madorou gënanga, deʼ o öraha gënanga dika o nyawa gënanga wakunoli wotemo. O nyawa mangangöe gënanga yohëranga deʼ yotemo, ”Komaiwahi ngomi miamäke idadi hokonënanga, o Israel matonakoka!”

³⁴ Mä o Farisi manyawa yotemo, ”O womaha madorou mangahäeke iwihidöaka o kuaha la waduhu o womaha madorou gënanga.”

³⁵ Hoko gënanga o Yesus woiki wokiloliti, o kota wögeto-getongo deʼ o kapongo wögeto-getongo. Unanga wodotoko o pupuji matauoka, deʼ wohingahu o Abari ma Oa mangale sarakia ma Jou Madutu wopareta hokä o Koano. Unanga wahitogumu o nyawa yatago-tagongo hagala rupa o panyake, deʼ mangaröehe iahumua.

³⁶ Oraha o Yesus wämäke o nyawa mangangöe gënanga, Unanga wädora, hababu önanga yobingu deʼ okiaua yakunu, hokä o duba magogöana koiwa.

³⁷ Deʼ o Yesus wätemo iwinö ninïkika, ”Io utu-utuku iwöe, mä youtu-utuku kamanga huhutulu.

³⁸Hababu gënanga nigahoko madumule madutuika, hupaya wohi dingoto youtu-utuku youtuku.”