Read Tobelo O MARKUS 10 Bible Online

O MARKUS 10 - Tobelo bible

O MARKUS 10

¹Ipaha o Yesus wamal̄a o ngï gënanga, deʼ woiki o Yudea madaeraika deʼ o Yordan ma Ngairi mahonongaka madaera. O nyawa manga ngöe yoböali yotoomu o Yesus iwikilolitino. Deʼ hokä biaha o Yesus wädotoko önanga.

²Yamuruono naga o Farisi manyawaö yaino laʼ mangale yalingiri o Yesus aihowono. Onanga yoleha, ”Imoteke nanga agama matita, boteka yakunu o nyawa yäoluku manga hekata?”

³O Yesus wohaluhu, ”O Musa wohi döaka o pareta okia nginika?”

⁴ ”O Musa wohi gumal̄a o nyawa yäoluku manga hekata, mangale yakunu ihira yotulihi o ngongoluku mahurata,” önanga yohaluhu.

⁵”O Musa watulihi o pareta gënanga hababu ngini ihuha holi inï dotoko,” o Yesus wato onangika.

⁶ ”Mä madodihiraka, maöraha ma Jou Madutu wodiai o nyawa, yahetongo ’Ma Jou Madutu wahidadi önanga o nauru deʼ o ngoheka.

⁷ Gënanga mahababu o nauru aha yamal̄a manga ayo deʼ manga ama deʼ yorimoi de ngoi hekata, hoʼ yahinoto yodadi moi.’

⁸Hoʼ, önanga o nyawa yahinoto okaua, duga-duga imatëngo.

⁹Gënanga mahababu, okia ma Jou Madutu wohirimoioka, yakunua o nyawa ihikitingaka!”

¹⁰Onanga yowohamoka o tauika, iwinöninïki yoleha o Yesusika mangale o hali gënanga.

¹¹ O Yesus wätemo onangika, ”O nagona yäoluku manga hekata deʼ yokawingi de o ngoheka mahomoa, o nyawa gënanga wohowono ngoi hekata mo hira-hiraika gënanga.

¹²Kogenangoli o ngoheka mioluku ami rokata deʼ mokawingi de o nauru mahomoa, munangö mohowono.”

¹³Naga o nyawa yä ao manga ngoha-ngohaka o Yesusika hupaya Unanga wäpal̄anga deʼ wahibarakati önanga. Mä iwinöninïki o Yesus yängamo o nyawa geönanga.

¹⁴Wamäke o hali gënanga, o Yesus wongamo daha Unanga wätemo iwinöninïkika, ”Nia mal̄aika o ngoha-ngohaka gënanga yaino Ngohino! Uha nia duhunu önanga, hababu o nyawa hokä hokonënanga yodadi o gegetongo ma Jou Madutu aiumati.

¹⁵ Nio hohininga nënanga! O nagona iwï himangua ma Jou Madutu hokä o ngohaka moi, önanga aha yodadiua o gegetongo ma Jou Madutu ai umati.”

¹⁶Iböto o Yesus wotemo hokogënanga, o Yesus wäkololo o ngoha-ngohaka gënanga, ipaha Unanga wakelenga Ai giama onanguku wägeto-getongo deʼ wahi barakati önanga.

¹⁷Maöraha o Yesus wohigila-gilali Ai dodagi, womatëngo waino woma popopäta o Yesusika. O nyawa gënanga woma ruku o Yesus ai himangoka deʼ woleha, ”Guru maoa, ngohi kokiani okia todiai hupaya yakunu tamäke o ngango madutu deʼ ikakali?”

¹⁸”Yadodoa hongona nato Ngohi yaoa?” o Yesus woleha. ”Mahomoa de ma Jou Madutu mahirete, koiwa naga yaöa.

¹⁹ Ngona nanakoka ma Jou Madutu ai pareta-pareta, ’Uha notoma, uha nohowono, uha notohiki, uha nohakihi i elu-eluku, uha notipu, nä horomati ani ama deʼ ngoni ayo.’ ”

²⁰”Bapa Guru,” o nyawa gënanga wato, ”Mata-mata o pareta gënanga ngohi tamotekoka madero kato magoduruohi.”

²¹O Yesus wïpulono o nyawa gënanga deʼ ai hayanga daha wïtemo, ”Ikuranga o hali moiohi ngona nöparalu. Noiki nahukunu mata-mata ani arata; laʼ matiwi nahi döaka o nyawa mihikinika, deʼ ngona aha nomä mäke o arata o horogaka. Iböto de gënanga naino laʼ nohi nïki Ngohi.”

²²Woihene o Yesus wotemo hoko gënanga, o nyawa gënanga woliwolu, daha watingaka o ngï gënanga de ai hininga i huha karana ünanga duru wokaya.

²³De o Yesus wäpulono iwinö ninïki daha wätemo onangika, ”Ihuha duru itike o nyawa yokaya-kaya yodadi o gegetongo ma Jou Madutu ai umati!”

²⁴Iwinö ninïki yohëranga yoihene o Yesus ai demo gënanga. Mä o Yesus wätemoli, ”Ahi ngoha-ngohaka igoungu ihuha itike hodadi o gegetongo ma Jou Madutu ai umati!

²⁵Gahumu moi o onta iwohama o populaki mapidahika i holoi gapanga de o nyawa yokaya-kaya yowohama ma Jou Madutu ai Dunia ma Hungiika.”

²⁶O Yesus aidemo-demo nënanga yadiai iwinöninïki yohëranga, hiädono önanga imakokeleha, ”Nako hokogënanga, o nagona daha yakunu yohalamati?”

²⁷O Yesus wäpulono önanga deʼ wohaluhu, ”Ka o nyawa gënanga de madudukoro mä ma Jou Madutu koiwa madudukoro; kema Jou Madutu mata-mata kaiyakunu.”

²⁸Daha o Petrus wotemo, ”Napulono, ngomi miamal̄aka hagala mata-mata mangale mininïki Bapa.”

²⁹O Yesus wotemo, ”Ningaku: o nyawa yamal̄aka manga tau madol̄a, ekola airiadodoto o nauru deʼ aibiranga, ekola ngoi ayo, ekola aiama, ekola aingoha-ngohaka, ekola manga dumule karana Ngohi deʼ karana o Abari ma Oa ma Jou Madutuino,

³⁰o nyawa gënanga aha watarima iholoi iwöe öraha nënanga. Unanga aha wamäke ihigali maratuhu moi matau iholoi iwöe, airiadodoto o nauru, aibiranga, ngoi ayo, aingoha-ngohaka, aidumule — deʼ o huha de hangiharaö. Deʼ aha o öraha aha iböa-böa gënanga, o nyawa gënanga aha watarima o ngango madutu deʼ ikakali.

³¹ Mä o nyawa mangangöe o örahanënanga yohohihira aha yodadi yotototuru deʼ manga ngöe örahanënanga yotototuru aha yodadi yohohihira.”

³²O Yesus deʼ iwinöninïki naga manga dodagi magoronaka o Yerusalemika. O Yesus womä dagi mahimangoka, deʼ iwinöninïki mata-mata manga hininga iëteke. Deʼ o nyawa yäninïki manga poretino mayamäo yohawana. Ipaha o Yesus wäahokoli iwinöninïki wätingakika deʼ wahingahu onangika okia aha idadi Ai dirika.

³³”Ni ihene,” Unanga wotemo, ”ngone öraha nënanga hodumutu o Yerusalemika. Dokengoka o Nyawa manga Ngohaka aha iwihilapahi o imam-imam manga häekika, deʼ o agama maguru-guru. Unanga aha iwihukumu iwihohonenge, ipaha iwihilapahi o Yahudi manyawaikaua.

³⁴Onanga aha iwihohedu Unanga, iwiobiri, iwihangihara, deʼ Unanga iwisalib. Mä de o wange hange Unanga aha womomiki.”

³⁵Daha o Yakobus deʼ o Yohanis, enagënanga o Zebedeus ai ngoha-ngohaka, yoiki o Yesusika, ”Bapa Guru,” önanga yotemo, ”naga o hali moiani ngomi miomau Bapa nodiai mangale ngomi.”

³⁶”Okia ngini niomau Ngohi todiai mangale ngini?” o Yesus wä leha.

³⁷Onanga yohaluhu, ”Ngomi miomau migogere Ani niraka de Ani higili Bapa, maöraha okia Bapa nodadi o koano de Ani mulia.”

³⁸ ”Ngini nihiorikua okia ngini nigahoko,” o Yesus wätemo onangika. ”Kani akunu ngini nio ngokere o huha de o hangihara magalahioko, kiaka aha Ngohi töngokere, deʼ niongohama o huha de o hangihara mangï ika kiaka aha Ngohi töngohama?”

³⁹”Kayakunu,” önanga yohaluhu. De o Yesus wätemoli onangika, ”Igoungu ngini aha niongokere o huha de o hangihara magalahioko kiaka aha Ngohi töngokere, deʼ niongohama o huha de o hangihara mangïika kiaka Ngohi aha töngohama.

⁴⁰Mä imakorona o nagona aha yögogere Ahi niraka ekola Ahi higiloka, gënanga Ngohiua Ahi haku tohigogere. Ma Jou Madutu wohi gogere o nagona de o nagona aha yögogere o ngï-o ngï gënanga.”

⁴¹Maöraha yangimoi iwinöninïki o Yesus mahomoa gënanga yoihene o hali gënanga, önanga yängamo o Yakobus deʼ o Yohanis.

⁴² Hoʼ o Yesus wä ahoko önanga mata-mata, daha wotemo, ”Ngini nihiöriki o hoana de o berera matutuda iwi näko-näkoua ma Jou Madutu manga kawaha yätuku. Deʼ manga gikiri yoago-agomo yätuku önanga.

⁴³ Mä ngini yakunua hokogënanga! Ngini hara moioli, o nyawa yomau yodadi yolamoko niahidogoronaka, önanga kokiani yodadi inïlöleleani.

⁴⁴Deʼ o nagona yomau yodadi madodihiraka niahidogoronaka, kokiani yodadi niagilaongo.

⁴⁵Hababu o Nyawa manga Ngohaka mawainoua mangale iwï leleani. Unanga woböa woma hilapahi Ai nyawa mangale wahibebasi manga ngöe o nyawa.”

⁴⁶Onanga imahiädono o Yerikho makotaika. Deʼ maöraha o Yesus de iwinöninïki inoli o nyawa yowöe-wöe yamal̄a o kota gënanga, womatëngo wopilo-piloko kawo gogeruku wogaho-gahoko o ngëkomo madatekoka. Ai romanga o Bartimeus, o Timeus ai ngohaka.

⁴⁷Maöraha ünanga woihene yakokaino gënanga ganga o Yesus o Nazaret manyawa, ünanga wopöaka, ”Yesus, o Daud ai Ngohaka! Nohï dora ngohi!”

⁴⁸Unanga iwingamo manga ngöe o nyawa, deʼ iwi huloko woma rïdi. Mä unanga iholoi ikuatil̄eoli woma pöaka, ”Daud ai Ngohaka, nohï dora ngohi!”

⁴⁹De o Yesus womatogumu daha wätemo, ”Niwi ahoko ünanga.” Hoʼ onanga iwi ahoko o nyawa wopilo-piloko gënanga. Onanga iwitemo unangika, ”Noma rirïdi! Ngona o Yesus woni ahoko, nomomiki!”

⁵⁰O nyawa wopilo-piloko gënanga wohikaweli aijuba, daha woma tai-taiti womaoko deʼ woiki o Yesusika.

⁵¹”Okia ngona nömau Ngohi todiai ngonaika?” o Yesus wïleha unangika. O nyawa wopilo-piloko gënanga wohaluhu, ”Bapa Guru, ngohi tönahihu tomahi öriki.”

⁵²”Noiki,” o Yesus wïtemo, ”karana ngona nongaku Ngohino, ngona notogumu.” Ka öraha gënanga dika o nyawa wopilo-piloko gënanga yakunu womahi öriki. Daha ünanga winïki o Yesus o ngekomika.