Read Tobelo O MARKUS 11 Bible Online

O MARKUS 11 - Tobelo bible

O MARKUS 11

¹Maöraha yotigioka o Yerusalemika, önanga imahiädono o Betfage deʼ o Betania makotaika, o Zaitun ma Doporono magelehoroka. Gangoka yahinoto iwinöninïki yohira o Yesus wähuloko.

²”Nioiki makapongo höhima-himangika gënanga,” o Yesus wätemo onangika. ”Hoko gënanga ngini niwohama o kapongika gënanga, ngini aha niamäke o keledai moi mangohaka yalikoika, komaiwahi o nyawa yöbarene. Nia hohe o keledai gënanga deʼ niao nenangino.

³Deʼ nako naga o nyawa inï leha nginika okia mahababu ho ngini niahohe o keledai gënanga, niahëtongo, ’Ma Jou wöparalu, deʼ Unanga de majapati aha wohigilio.’ ”

⁴Yahinoto ö iwinö ninïki o Yesus yoiki, deʼ yamäkeika moi o keledai mangohaka yalikoika o tau mangoranoka o ngëkomo madatekoka. Onanga yahohe o keledai gënanga.

⁵O nyawa ima oko-okoino genangoka yäleha onangika, ”Hei, okia ngini nidiai? Yadodoa ho niahohe o keledai mangohaka gënanga?”

⁶Onanga yohaluhu hokä sarakia o Yesus wahetongoka onangika. Ino manyawa gënanga yahi gumal̄a önanga yao o keledai gënanga.

⁷Maöraha imahi ädono o Yesusika, o keledai maporete gënanga yönao de toönanga manga juba, daha o Yesus wöbarenuku.

⁸Manga ngöe o nyawa ihihohe manga juba o ngekomika, nagali ihi hohe o ngëkomo mahi goronaoko o gota majaga-jaga kiaka önanga manga dumuleoka de yol̄ë.

⁹ O nyawa yotagi mahima-himangoka, deʼ o nyawa yoninïki maporetino, mata-mata yopöa-pöaka, ”Niwi puji ma Jou Madutu! Iwi hibarakati Unanga waino-ino de ma Jou ai romanga!

¹⁰Iwango Ai popareta aha iböa-böa — o Daud nangaete de nangatohora ai popareta! Niwi puji ma Jou Madutu woko Kurutil̄e!”

¹¹De mabobaha o Yesus womahiädono o Yerusalemika, daha wowohama ma Jou ai Tauika. Gangoka Unanga watötailako magilolitino. Mä karana ngade-ngade ihuhutuoka, ipaha Unanga womagoraka o Betaniaika kamamoi de yangimoi de yahinoto iwinö ninïki.

¹²Yarehino mawange, maöraha önanga yotagi magogiriaka o Betaniaka de yohupu, o Yesus iwihahini.

¹³Ma gurutikahi Unanga wamäke o ara magota o utu moi de mahoka kahä rubu. Hoʼ Unanga woiki mautuika gënanga mangale wölega boteka naga mahohoko. Mä maöraha Unanga womahi ädono mautuika gënanga, Unanga okia-kiaua wamäke, sawaliua mahoka-hoka dika, hababu o öraha gënanga maorahowahi o ara ihohoko.

¹⁴Daha o Yesus watemo o ara mautuika gënanga, ”Muläenge o öraha nënanga kao nyawa moiö de koiwa naga aha yaol̄omoli o hohoko ngonaino!” Iwinöninïki o Yesus yoihene o demo gënanga.

¹⁵Ipaha önanga imahi ädono o Yerusalemika, deʼ o Yesus woikoli ma Jou ai Tauika. Genangoka Unanga muläenge wäduhu mata-mata o nyawa imahuku-hukunu deʼ yoija-ija gangoka. Unanga wamotumu bitikanga o tiwi yototururu manga meja deʼ o namodara yohuku-hukunu manga bangku.

¹⁶Deʼ kao nyawa moiö de wahi gumal̄aua yoao okia dika yanonu ma Jou ai Tau malöaino gënanga.

¹⁷ Ipaha o Yesus wädotoko o nyawa genangokadau. Unanga wato, ”Ma Jou Ai Demo ma Buku magoronaka itulihi hoko nënanga: ma Jou Madutu wotemo, ’Ahi Tau aha yahetongo o tau o hoana de o berera manga hubayanga mangï.’ Mä ngini niadiai yo ora-ora manga igutu!”

¹⁸O imam-imam manga häeke deʼ o agama maguru-guru yoihene o demo gënanga. Onanga yomuläenge o ngëkomo yolingiri mangale o Yesus iwitöma. Onanga iwïmodongo Unangika, karana mata-mata o nyawa yohëranga de yokiriri yoihene Ai dodötoko.

¹⁹I tigi-tigi yöhutu, o Yesus deʼ iwinöninïki yamal̄a o kota gënanga.

²⁰Yarehino o ngoru-ngorumino, maöraha önanga yakaino o ara mautuino gënanga, önanga yamäke o ara mautu gënanga ihonengoka hiädono mangutu-ngutukuku.

²¹Daha o Petrus woma hininga okia idadioka o wange moi ipahaika. De o Petrus wïtemo o Yesusika, ”Bapa Guru, beika nölega! O ara mautu kiaka Bapa nalolai gënanga ihonengoka!”

²²O Yesus wohaluhu, ”Ningaku ma Jou Madutuika.

²³ I goungu yakunu niatemo o tonaka itotoporonika gënanga, ’I goraka deʼ iumo o ngötuku!ʼ done o hali gënanga aha ngini niadiai idadi; mangale yakunu ngini nibingua, deʼ ngini ningaku okia ngini nitemoka gënanga aha i gou-goungu idadi.

²⁴Hababu gënanga niohohininga nënanga: O öraha okia ngini nimä niata deʼ nigahoko okia naga moi, ningaku ma Jou Madutu wohi döakoka nginika okia ngini nigahoko, de ngini aha niatarima.

²⁵ Deʼ nako ngini nimä niata, mä niahininga isanangua o nyawa moika, niahiapongohi o nyawa geönanga, hupaya nia Ama o horogakaö wa apongo niabaradoha. [

²⁶Nako ngini niahi apongua o nyawa mahomoa, nia Ama o horogakaö aha wa apongua niabaradoha.]”

²⁷Onanga imakilioroli o Yerusalemika. Deʼ maöraha o Yesus wotagi wokokiloliti ma Jou ai Tau magoronaka, o imam-imam manga häeke, deʼ o agama maguru-guru deʼ o Yahudioka manga tutuda yaino Unangino.

²⁸Onanga yoleha, ”Okia matiti ho Ngona nodiai mata-mata nënanga? O nagona inihidöaka o haku gënanga Ngonaika?”

²⁹O Yesus wohaluhu, ”Ngohiö tomau toleha nginika. Nio baluhu deʼ Ngohi aha tahetongo nginika de o nagona manga haku Ngohi tadiai o hali-hali nënanga.

³⁰O Yohanis woohiki de o nagona manga haku, ma Jou Madutu eko o nyawa?”

³¹Ipaha o imam-imam manga häeke deʼ o Yahudioka manga tutuda yomuläenge ihi ade-ade manga hidogoronaka. Onanga yato, ”Nako ngone hahetongo, ’De ma Jou Madutu aihaku,’ Unanga aha wotemo, ’Yadodoa ho ngini ningakuua o Yohanisika?ʼ

³²Mä kai huha dika nako hato, ’De o nyawa manga haku.’ ” Hababu önanga yämodongo o nyawa yowöe-wöe, karana mata-mata o nyawa yanäko o Yohanis o nabi moi.

³³Hoʼ, önanga yohaluhu, ”Ngomi mia nakoua.” Ipaha o Yesus wätemo onangika, ”Nako hokogënanga, Ngohiö toluku tahetongo nginika de o nagona manga haku Ngohi todiai mata-mata nënanga.”