Read Tobelo O MARKUS 13 Bible Online

O MARKUS 13 - Tobelo bible

O MARKUS 13

¹Maöraha o Yesus wamal̄a ma Jou ai Tau, womatëngo iwinö ninïki wato, ”Bapa Guru, beika nolega o tau ima oko-okoino gënanga. Natailako nohi dodiai mahelewo. Goguleua marahai!”

²O Yesus wohaluhu, ”Ngona namäke o tau imahi goko-gokoino mapako-pako gënanga? O tau ima oko-okoino gënanga mahelewo aha kamoiö de i ma teke tapal̄ukua mangïoka. Mata-mata aha yaruba.”

³Ipaha o Yesus woiki o Zaitun ma Doporonika, deʼ wogogeruku ima teke rihimanga de ma Jou ai Tau. Daha o Petrus, o Yakobus, o Yohanis, deʼ o Andreas yaino Unangino mangale imä teke ade-ade imahi teke dodiai.

⁴”Beika Bapa nohi ngahu ngomino,” önanga yotemo Unangika, ”Muruonoka mata-mata gënanga aha idadi? Deʼ o nonako-nonako okia hokä i hi dumutu maöraha yadonoka?”

⁵”Nimahi dodiai,” o Yesus wohaluhu, üha hiädono ngini inï tipu.

⁶O nyawa manga ngöe aha yoböa de yapäke Ahi romanga deʼ yotemo, ’Ngohi nanga una!ʼ daha wätipu manga ngöe o nyawa.

⁷Nako ngini ni ihene o pasangi mailingi deʼ o parangi ma abari, uha nihawana. O hali-hali gënanga kokiani idadi, mä genanga koiwa mamangarati o kiamati maöraha yadonoka.

⁸O hoana de o berera moi aha yäparangi yälawani o hoana de o berera mahomoa. O negara moi aha yaino yälawani o negara mahomoa. Okiaka dika aha idadi o ohu deʼ o habirokata. Mata-mata gënanga daha mamuläenge dika, hokä o hiri o ngoheka momatëngo mamäo, nako momau ami ngohaka ima kil̄au.

⁹ Ngini kokiani nimahi dodiai, hababu ngini aha inï tagoko deʼ inï tatauru o juru hakimika. Ngini aha inï gohara o pupuji matauoka. Ngini aha inï ao nima teke rihimanga de yokokuaha deʼ o kokoano karana ngini nihinö ninïki. Deʼ genangala nia öraha mangale nihi döaka o hakihi mangale Ngohi onangika.

¹⁰O Abari ma Oa ma Jou Madutuino gënanga kokiani ihi barihi ihira hagala o hoana de o bereraika.

¹¹Deʼ nako ngini inï tagoko deʼ inï ao o pengadilanika, uha nihawatere mangale okia kokiani ngini nitemo. Nako yadonoka maöraha mangale ni ade-ade, nia hetongo dika okia inihi ngahu nginika to ëna ma orahoka. Karana o demo-demo kiaka ngini nihi demo gënanga, ganga tinginiua nia demo-demo, duga-duga i böa ma Jou Madutu ai Womahoka de yaino.

¹²O nyawa aha yädiai o huha manga dodotika mahirete laʼ mangale yätoma. Genangö aha idadi o ama de o ngohaka mahi dogoronaka. O ngoha-ngohaka aha yälawani manga ayo de manga ama, deʼ yahi lapahi önanga laʼ mangale yätoma.

¹³ Mata-mata o nyawa, aha inï dohata ngini, karana ngini nihinö ninïki. Mä o nyawa yoto tongohono hiädono mabaha, aha yahihalamati.”

¹⁴ ”Ngini aha nia mäke ’O Dorou yahi Wö wede-wedere’ ima okoino o ngï ilara-laranga mangale ëna. (O dulihi madungutu yobasa-basaika: Nia tailako okia mamangarati!) O öraha gënanga o nagona naga o Yudea madaeraoka kokiani yopiringana i l̄oku-l̄okuil̄e.

¹⁵ O nagona naga o katu mal̄okuoka uha youti deʼ yowohama o tau magoronaika mangale yal̄ë manga kia naga moi.

¹⁶O nagona o dumuleoka uha ima kilioro mangale yal̄ë manga juba.

¹⁷O ngoheka o ngohaka ihi ao-ao deʼ o ayo kaya huhuohi manga ngohaka, duru yäporohono o wange gënanga!

¹⁸Nimä niata hupaya o hali-hali gënanga uha idadi o awa-awana maöraha.

¹⁹ O wange yobö borohonoka gënanga aha naga o huha moi komaiwahi idadi kama dero ma Jou Madutu wohi dadi o dunia hiädono o öraha nënanga, deʼ komaiwaka aha idadioli.

²⁰Ade-ade nako ma Jou Madutu watipokoua maöraha gënanga done kamoiö de koiwa naga o nyawa yohalamati. Mä karana Ai umati, ma Jou Madutu watipoko maöraha.

²¹Ma orahoka gënanga nako o nyawa womatëngo winï temo nginika, ’Niwï lega, ma Koano Wohihohalamati gënanga naga nenangoka!ʼ ekola ’Niwï lega, Unanga naga dokengoka!ʼ — uha niwi ngaku o nyawa gënanga.

²²Hababu wohihohalamati madutua deʼ o nabi-nabi madutua aha yoböa. Onanga aha yodiai o manarama-manarama biaha-biahaua, deʼ i hëra-hëranga mangale yotipu nako yakunu, ma Jou Madutuö ai umati.

²³Hoʼ, nimä göa-göana! Mata-mata gënanga Ngohi tinihi ngahuoka nginika ihira de o hali gënanga idadi.”

²⁴ ”Ipaha de o huha maöraha gënanga, o wange malako aha idadi i huhutu, deʼ o mede itararonokaua.

²⁵ Hagala o murumö aha o dihangoka de i tifa, deʼ yokokuaha o gitawa maamokoka aha idadi yoburakituku.

²⁶ O öraha gënanga o Nyawa manga Ngohaka aha iwi mäke woböa o lobi-lobi magoronaka deʼ Ai kuaha i amoko deʼ Ai mulia.

²⁷Unanga aha wahuloko o malaekat-malaekat mangale yätoomu Ai umati wä iri-irikoka o dunia malibuku iatino, o dunia mabahaka hiädono o dihanga mabaha-bahaika.”

²⁸”Nima l̄ë o dodötoko o ara mautuino. Nako majaga-jaga i ijo deʼ yabole, deʼ imuläenge itubo, ngini nia näko o hiwara maöraha itigioka.

²⁹Hoko genangoli nako ngini nia mäke o hali-hali gënanga idadi, ngini nia näko duru itigioka maöraha.

³⁰La nia näko! O nyawa yowango-wango o öraha nënanga yohonengowahi mata-mata, okia naga i dädadi mata-mata nënanga aha idadi.

³¹O dihanga deʼ o dunia aha i hihanga, mä ahi demo i gögogere kahi ado-adonika.”

³² ”Ngaro hoko gënanga, moiua o nyawa yanäko ma wange hokokia ekola ma jam hokokia. O malaekat-malaekat o horogaka yanäkoua deʼ ma Ngohaka makowali, duga-duga ma Ama dika wanäko.

³³Hoʼ ngini kokiani nimä göa-göana deʼ nima hitiari, hababu ngini nia näkoua maöraha hokokia.

³⁴ Madodagi hohi tero o nyawa womatëngo wamal̄aika ai tau daha woiki o ngï magögurutika. Unanga wähuloko iwilö leleani yögöana deʼ yatatoro ai tau deʼ wohi döaka o manarama onangika o nyawa moi-nyawa moi. O ngorana magogoanika, ünanga wohi behehongo hupaya wögöana wohi dodiai.

³⁵Hababu gënanga ngini kokiani nimä göa-göana, hababu ngini nia näkoua muruonoka o tau madutu gënanga aha woma kilioro — yakunu o bobimaoa, yakunu o hutu gorona, yakunu tigi-tigi itebini ekola yakunu o wange iböa.

³⁶Nako ünanga i todokanino woböa, uhala hiädono ünanga winï mäkeino ngini nia gogiokoka.

³⁷Okia tahetongo nënanga nginika, nia hetongoli o nyawa mata-mataika: nimä göa-göana!”