Read Tobelo O MARKUS 14 Bible Online

O MARKUS 14 - Tobelo bible

O MARKUS 14

¹ O wange hinotohi o Paskah ma Wange deʼ o Roti i Ragi-ragi Ua ma Rameanga. O imam-imam manga häeke deʼ o agama maguru-guru manga gogiria yolingiri o ngëkomo laʼ mangale iwi tagoko o Yesus kaya pongono, deʼ malenga Unanga iwi toma.

²”Mä uha ngone hadiai gënanga o rameanga ma orahoka,” önanga yato, ”hababu done ipuda o huru-hara.”

³ Maöraha o Yesus naga o Betania ma kapongoka, o Simon mahira iwi pado-pado ai tauoka, o ngoheka momatëngo moböa o Yesusika. Münanga moao o böto gahumu moi madol̄a o minya mabounu mahëmo-hëmoro ihali-hali, o ngutuku mabounu mahëmo-hëmoro de yadiai. maöraha o Yesus wogogeruku wol̄omo magogiria, o ngoheka gënanga mapooteke o boto gënanga deʼ mauhe o minya mabounu mahëmo-hëmoro gënanga o Yesus ai häekuku.

⁴Yamuruono naga, genangokadau yongamo deʼ ima koketemo, ”Okia mafaidä o minya mabounu mahëmo-hëmoro gënanga ihi gogule?

⁵O minya gënanga yakunu ihukunu deʼ maija iholoi de o ratuhu hange o tiwi haäka, deʼ matiwi yahi döaka o nyawa yomö mihikinika!” De önanga i mi ngamo ma ngohekaika gënanga.

⁶Mä o Yesus wätëmo, ”Nimi mal̄aika münanga! Yadodoa ho ngini nimihihuha münanga? Münanga modiai okia naga moi maoa-oa, deʼ o higiriri Ngohino.

⁷ O nyawa mihikini salalu naga nia hidogoronaka. Oraha higeto-getongo nako ngini nimau, ngini yakunu nia riwo önanga. Mä Ngohi salalua dede ngini.

⁸O ngoheka nënanga modiaioka okia yakunu muna modiai. Münanga mohï böbötoka Ngohi de o minya mabounu mahëmo-hëmoro ihi lungunu ngarokö ma orahowahi.

⁹Ningaku! O dunia magilolitino, okiaka dika o Abari ma Oa ma Jou Madutuino ihi ngahu, o ngoheka nënanga ami manarama aha i hi ade-adeoli hokä o hohininga munangika.”

¹⁰Daha o Yudas Iskariot, iwinö ninïki o Yesus yangimoi de yahinoto manga dodiawo, woiki o imam-imam manga häekika, de madungutu o Yesus wihilapahi onangika.

¹¹Onanga duru yosanangi yoihene o doabutu gënanga, deʼ yojaji aha o tiwi iwihidöaka o Yudasika. Deʼ o Yudasö womuläenge wolingiri o öraha ma rorahai laʼ mangale wihininga dorou o Yesus.

¹²O wange madodihiraka o Roti i Ragi-ragi Ua ma Rameangoka — maöraha o nyawa yatöaka o Paskah maduba — iwinö ninïki o Yesus yoleha Unangika, ”Kiaka Bapa nomau ngomi mihi diai o Paskah mainomo mangale ngona Bapa?”

¹³Deʼ o Yesus wähuloko onangino yahinoto, ”Nioiki o kotaika, dokengoka aha ngini nimaka mäke de o nauru womatëngo woao o rube gahumu moi madol̄a o akere. Niwi nïki ünanga,

¹⁴o tauika kiaka ünanga wöngohama deʼ nia hëtongo o tau madutuika gënanga, ’Ma Bapa Guru woleha, kiaka ma ngï Unanga deʼ iwinö ninïki aha yol̄omo o Paskah mainomo.’

¹⁵O nyawa gënanga aha wohi matoko nginika moi o ngï ma amo-amoko daku i l̄oku-l̄okuil̄e. O ngï gënanga ihi diaioka, mameja de mahomoahi iböbötoka. Nihidiai mata-mata dokengoka mangale ngone.”

¹⁶Daha yahinoto iwinö ninïki o Yesus gënanga yoiki o kotaika. Dokengoka önanga yamäke mata-mata itiai hokä o Yesus waheto-hetongoka. Daha onangö yasadia o Paskah ma inomo.

¹⁷Yohutuku, o Yesus de yangimoi de yahinoto iwinö ninïki yoböa.

¹⁸ Deʼ onanga yogogeruku yol̄omo magogiriaka, o Yesus wätemo, ”Ni ihene: womatëngo nia hidogoronaka, kiaka o öraha nënanga wol̄omo dede Ngohi, aha wohihi lapahi Ngohi o nyawa madorouika.”

¹⁹Yoihene gënanga, iwinö ninïki o Yesus manga hininga duru idadi ihuha. Ho ima tëngo-tëngo yomuläenge yoleha o Yesusika, ”Marai ngohinoua Bapa ani dungutu?”

²⁰O Yesus wohaluhu, ”Unanga ganga womatëngo ini ngimoi de hinoto nia hidogoronaka nënanga, kiaka wol̄omo o dodai moi dede Ngohi.

²¹Igoungu o Nyawa manga Ngohaka aha wohonenge hokä i tulihi Ma Jou Ai Demo ma Buku magoronaka. Mä hokokia manga bodito o nyawa iwihi lolapahi o nyawa ma dorouika, o Nyawa manga Ngohaka gënanga! I holoi yaoa o nyawa ge ünanga, nako ünanga komaiwa woma kil̄au o duniaino!”

²²Maöraha önanga manga go giriaka yol̄omo, o Yesus wal̄ë o roti deʼ womä niata wosukur ma Jou Madutuika. Ipaha Unanga wabëla-bëlaka o roti gënanga de Ai giama, daha wahi döaka iwinö ninïkika de wotemo, ”Nia l̄ë deʼ nia ol̄omo, nënanga Ahi röehe.”

²³Iböto de gënanga Unanga wa l̄ë gahumu moi o angguru magalahi. Unanga womä niata wosukur ma Jou Madutuika, daha wahi döaka o galahi gënanga iwinö ninïkika. Ipaha önanga mata-mata yaokere o angguru gënanga.

²⁴ Iböto gënanga o Yesus wotemo, ”Nënanga Ahi awunu kiaka ihigoungu ma Jou Madutu ai jaji, o awunu ikokopoaka laʼ mangale o nyawa manga ngöe.

²⁵Ningaku: Ngohi aha tokerokaua o angguru nënanga, hiädono maöraha Ngohi tokere o angguru mahungi dede ngini Ahi Ama ai Dunia ma Hungioka.”

²⁶I paha önanga ihinyanyi o puji manyanyi moi. Deʼ i böto gënanga önanga yoiki o Zaitun ma Doporonika.

²⁷ I paha o Yesus wätemo onangika, ”Ngini mata-mata aha nipiringana nihi mal̄aika Ngohi. Hababu Ma Jou Ai Demo ma Buku magoronaka itulihi, ’Ma Jou Madutu aha wïtoma magogöana, deʼ ai duba de matikaka aha i kerewoto.’

²⁸ Mä ipahaika Ngohi i hihi momikokali, Ngohi aha toiki tini kikiraika ngini o Galileaika.”

²⁹”Kowali,” o Petrus wato, ”mal̄a laʼ önanga mata-mata ini mal̄aika Bapa, ngohi hakali-kali kowali.”

³⁰”No hohininga,” o Yesus wato, ö hutu nënanga dika, o kuru-kuru i horenowahi mahinoto, ngona nohi gali mahange nohihi pongono Ngohi.”

³¹O Petrus wohaluhu wagoungu, ”Mal̄a la ngohi kokiani tohonenge dede Ngona Bapa, hakali-kali ngohi aha totemoua ngohi toni nakoua Bapa!” Deʼ iwinö ninïki mahomoa hoko genangoli, yotemo.

³²Onanga yadono o ngï moi maromanga o Getsemani, deʼ o Yesus wätemo Iwinö ninïkika, ”Nigogeruku nenangoka Ngohi tohi jai-jai toiki tomä niata.”

³³Daha o Yesus wahi garo o Petrus, o Yakobus, deʼ o Yohanis yoiki imako moteke dede Unanga. Unanga imuläenge wamäo ai hininga ihuha deʼ wobaliha.

³⁴”Ahi hininga duru kahä huha,” o Yesus wätemo onangika, ”tamäo hokä to mäu to honenge dika. Ni gögogere nenangoka deʼ nimä göana!”

³⁵O Yesus woiki iholoi i kurutika mahuhutulu daha watilabukuku de womahi tudukuku o tonakuku deʼ womä niata. Ai hubayanga magoronaka Unanga wogahoko nako yakunu Unanga ngarouha wamäo o huha de o hangihara gënanga.

³⁶Una wotemo, ”Ama, ya Ama,” ökia naga moiö de koiwa naga nakunua nadiai Ama. Nagoraka Ngohioka o huha de o hangihara nënanga. Duga-duga uha imoteke Ahi mau duga-duga Ani mau Ama.”

³⁷Iböto de gënanga o Yesus woma kilioro deʼ wämäkeino iwinö ninïki imä iduoka. Unanga wïtemo o Petrusika, ”Simon, ngona kano mä idu? Duga-duga o jam moi dika, ngona nakunua nomä göa-göana?”

³⁸Daha o Yesus wätemo onangika, ”Nimä göa-göana, deʼ nihubayanga hupaya ngini nia ohanua o cocoba. I goungu nia womaha imau yadiai o diai, mä ngini niakunua karana o nyawa nanga biaha gënanga yabole.”

³⁹Mamoioli o Yesus woiki womä niata de wahetongo ma betongo ima tero.

⁴⁰I böto gënanga Unanga woma kilioroli iwinö ninïkika deʼ wämäkeino önanga, kai maidu okahi, karana önanga kiriaholi yakioko. De önanga yanäkoua okia kokiani önanga yotemo o Yesusika.

⁴¹Maöraha o Yesus woma kilioro onangika wohigali mahangeoka, Unanga wätemo, ”Kani maidu okahi ngini deʼ nimahi batongo? Yaoaka! Yadonoka maöraha o Nyawa manga Ngohaka iwi hilapahi o nyawa böbaradoha manga giama ma hoatika.

⁴²Nimomiki, niaino ngone hoiki. Nia lega! O nyawa wohihi lolapahi o nyawa ma dorouika woböaka!”

⁴³O Yesus kawo temo-temohi, o Yudas woböa, yangimoi de yahinoto iwinöninïki manga dodiawo gënanga. Imako moteke dede Unanga yoböaö o nyawa manga ngöe, imä gao o oworo deʼ o boboha. Onanga o imam-imam manga häeke, o agama maguru-guru deʼ o Yahudioka manga tutuda yähuloko.

⁴⁴O Yudas ai hininga i totorou gënanga wohi tantuoka moi o nonako onangika. ”O nyawa ngohi tï ame,” wätemo onangika, ”ge Unanga manyawa. Unanga niwi tagoko deʼ Unanga niwi ao de mago göana nihi dodiai duru.”

⁴⁵Maöraha o Yudas waino, ünanga gila-gila woiki o Yesusika deʼ wotemo, ”Bapa Guru!” i paha ünanga wïame o Yesus.

⁴⁶Daha o nyawa yaino-ino de o Yudas gënanga iwi tagoko o Yesus deʼ iwi liko de o rante.

⁴⁷Mä genangoka naga womatëngo watauru ai oworo deʼ wihi oto ma imam womomulia ai gilaongika hiädono ai ngauku ipagele.

⁴⁸Daha o Yesus wä temo onangika, ”Boteka Ngohi nënanga o nyawa madorou, hiädono ngini niaino de niao o oworo deʼ o boboha laʼ nihi tagoko Ngohi?

⁴⁹ O wange higetongo Ngohi todotoko ma Jou ai Tauoka nia himangoka, deʼ ngini nihi tagokua Ngohi. Mä igoungu hoko gënanga iböto kokiani, hupaya idadi okia i tulihoka Ma Jou Ai Demo ma Buku magoronaka.”

⁵⁰Mata-mata iwinö ninïki yopiringana iwi mal̄aika o Yesus.

⁵¹Womatëngo o goduru, kaduga-duga wapäke o ngöere ai röehe wohi hawoino, wïnïki o Yesus. O nyawa yomau iwi tagoko,

⁵²mä unanga wahuputu ai ngöere gënanga, daha wopiringana kai hekonoka.

⁵³O Yesus iwiao ma imam womomulia aitauika. Dokengoka mata-mata o imam manga häeke, o Yahudioka manga tutuda, deʼ o agama maguru imatoomu magogiria.

⁵⁴O Petrus kama gögurutoka de winïki o Yesus, hiädono wowohama ma imam womomulia ai löaika. Dokengoka ünanga wogogeruku womarauku womahi tigi-tigika o ukuika, imaka ganuino de yogöa-göana.

⁵⁵O imam-imam manga häeke deʼ mata-mata o Agama ma Juru Hakimi ihi dailako la yamäke inyata igoungu iwihihowono o Yesus hupaya yakunu o honenge mahukumanga iwihi tapal̄u Unanguku. Mä onanga kamoiö de yamäkeua manyonyata.

⁵⁶Manga ngöe o hakihi yä ahoko laʼ mangale ihi döaka o hakihi i ëlu-ëluku o Yesusika, mä to önanga manga hakihi ima koko howono.

⁵⁷Daha o hakihi yamuruono naga ima okoino deʼ ihi döaka o hakihi yoëlu-ëluku nënanga mangale o Yesus,

⁵⁸ ”Ngomi mi ihene o nyawa nënanga wotemo, ’Ngohi aha takilianga ma Jou Madutu ai Tau nënanga, o nyawa yadodiai, deʼ o wange hange ipaha, Ngohi aha tohi goko mahomoa, ko o nyawaua yodiai.’ ”

⁵⁹Mä o nyawa ge onangö ma manga hakihi i ma koko howono.

⁶⁰De ma imam womomulia woma okoino mata-mata manga himangoka deʼ woleha o Yesusika, ”Okia ho ngona nä baluhua ini kokalaki gënanga?”

⁶¹Mä o Yesus woma rirïdi dika. Unanga wohaluhua mata-mata. Daha ma imam womomulia wïleha mamoioli Unangika, ”Boteka Ngona ma Koano Wohi hohalamati, ma Jou Madutu ai Ngohaka Wo Tebi-tebini?”

⁶² ”Ngohi nënanga,” o Yesus wohaluhu, ”deʼ ngini mata-mata aha niwi mäke o Nyawa manga Ngohaka wogogeruku ma Jou Madutu woko Kuaha ai nirakoka, deʼ woböa o lobi-lobi ma goronaka o dihanguku!”

⁶³De ma imam womomulia wakä kakihi ai pakeanga deʼ wotemo, ”Iparalu okaua o hakihi!

⁶⁴ Ngini ni ihenoka mahirete Ai demo-demo wihikauku ma Jou Madutu. Oraha nënanga okia nia putuhu?” Onanga mata-mata yaputuhu o Yesus wahowono deʼ i patutu iwi hukumu iwi hohonenge.

⁶⁵Daha yamuruono naga yomuläenge iwi obiri o Yesus, deʼ Ai lako yatamunoko deʼ iwigöhara Unanga, daha yotemo, ”Beika nä hetongo, o nagona inigöhara?” Yogoa-goanö ma i mahi moteke iwi poka o Yesus.

⁶⁶O Petrus naga kao löaokahi, momatëngo molöleleani ma imam womomuliaoka maino genangika.

⁶⁷Maöraha mïmäke o Petrus womarauku o uku madatekoka, münanga matailako mohi dodiai o Petrus ai biono deʼ motemo, ”Koi goungua ngonaö nima koki nïki de o Yesus o Nazaret manyawa gënanga?”

⁶⁸Mä o Petrus womahi pongono, ”Ngohi tohiorikua, deʼ tomangaratiua okia ani dungutu,” wotemo molö leleanika gënanga. Daha o Petrus woiki ma imam womomulia aitau mangoranika. [O öraha gënanga o kuru-kuru ihorene.]

⁶⁹O ngoheka molö leleani gënanga mïmäkeoli o Petrus, deʼ mä temoli manyawa genangokadau, ”Unanga maraioka önanga manga dodiawo!”

⁷⁰Mä o Petrus womahi pongonoli. Tedekanua ipahaika, manyawa genangoka yotemoli o Petrusika, ”Nomahi pongono nakunokaua, marai ngona manga dodiawo, hababu ngona o Galileaino!”

⁷¹Daha o Petrus womuläenge womahi lolai deʼ wotemo, ”Ngohi tinäkoua manyawa kiaka ngini niadungutu gënanga!”

⁷²O öraha gënanga dika o kuru-kuru ihorene mahinoto. Deʼ o Petrus womä hininga o Yesus wotemoka unangika, ”O kuru-kuru i horenowahi mahinoto, ngona nohi gali mahange nohihi pongono Ngohi.” De o Petrusö woari iwihö howo-howo.