Read Tobelo O MARKUS 15 Bible Online

O MARKUS 15 - Tobelo bible

O MARKUS 15

¹O ngoru-ngorumino duru, yongodumu o Agama ma Juru Hakimi, o imam-imam manga häeke, o Yahudioka manga tutuda deʼ o agama maguru-guru tai-taiti ima hika dailako. Onanga iwi ranteika o Yesus, i paha Unanga iwi ao de iwihilapahi o Pilatusika.

²O Pilatus wïleha o Yesusika, ”I goungu Ngona o Yahudioka manga koano?” ”Hoko gënanga hokä ani demo,” o Yesus wohaluhu.

³O imam-imam manga häeke yao mangöe o galaki o Yesusika.

⁴Daha o Pilatus wolehali o Yesusika, ”Ngona noluku nohaluhu? Beika nölega hokokia mangöe o galaki önanga yao Ani himangoka!”

⁵Mä o Yesus wohaluhokaua, hiädono o Pilatus wohëranga.

⁶O Paskah ma Rameanga mahi geto-getongo, mabiaha o Pilatus wälapahi o bui manyawa imatëngo imoteke o nyawa yowöe-wöe manga ngongiriki.

⁷O bui magoronaka, yotö toba lawani yododiai o doma o huru-hara ma orahoka manga hidogoronaka naga womatëngo airomanga o Barabas.

⁸O nyawa yowöe-wöe ima toomu deʼ yogahoko o Pilatusika, hupaya ünanga wä lapahi o bui manyawa ima tëngo hokä biahali.

⁹O Pilatus woleha onangika, ”Ngini kaniö modeke, ngohi tilapahi o Yahudi manga koano gënanga mangale ngini?”

¹⁰Hababu o Pilatus wanäko itiai o imam-imam manga häeke iwi hilapahi o Yesus unangika karana manga hininga yöhiri.

¹¹Mä o imam-imam mangahäeke o demo yahingohama o nyawa yowöe-wöeika hupaya yogahoko o Pilatus wïlapahi o Barabas mangale önanga.

¹²De o Pilatus wätemoli o nyawa yowöe-wöeika gënanga, ”Nako hoko gënanga, manyawa niwiheto-hetongo o Yahudioka manga koano, ngohi kokiani okia todiai dede Unanga?”

¹³Onanga yopöaka, ”Unanga niwi salib!”

¹⁴”Mä okia Ai dorou?” o Pilatus woleha. Daha önanga yopöaka iholoi ikuatil̄eoli, ”Unanga niwi salib!”

¹⁵O Pilatus womau o nyawa yowöe-wöe gënanga yosanangi, ho ünanga wïlapahi o Barabas mangale önanga. Ipaha Unanga wähuloko o nyawa i wi göhara o Yesus, daha wihilapahi la iwisalib.

¹⁶O tentaraka iwi ao o Yesus o pengadilan matauika, magubernur ai kadatoka. I paha mata-mata o tentaraka yä ahoko ima toomu.

¹⁷Daha önanga iwihi päke o juba magoguhurungu o Yesusika, deʼ o raraga mahohihika yadiai o makota, i paha ihi nöa o Yesus ai häekuku.

¹⁸Ipaha de gënanga önanga iwi tabea, ”Ani horomati o Yahudi ma Nyawa manga Koano!” önanga yotemo.

¹⁹Onanga yagohara o Yesus ai häeke de o diki-diki, daha önanga iwiobiri deʼ yohuba Ai himangoka.

²⁰I böto ima higogule o Yesus, önanga yahuputu o juba ma goguhurungu gënanga daha iwi hi nöali ai pakeanga mahirete. I paha Unanga iwi ao iwihi hupu la iwi salib.

²¹ O ngëkomo mahoanoka önanga iwipakisa womatëngo wamöku o Yesus ai salib. O nyawa gënanga imateke koronaika gënanga dahaö kapongoka de waino womau wowohama o kotaika. (Ai romanga o Simon, — ai ahali o Kirene makapongino — o Aleksander deʼ o Rufus manga ama.)

²²O Yesus iwiao o ngï moi ika maromanga o Golgota, mamangarati ”O häeke ma Kabelanga ma Ngï”.

²³Genangokadau önanga yomau iwihidöaka Unangika o angguru ya ganuoka de o mur, mä o Yesus woluku waokere o angguru gënanga.

²⁴ I paha önanga iwisalib Unanga deʼ Ai pakeanga ihi kodoku de o undi la ihiöriki moi-moi manga hidoku.

²⁵Iwi salib gënanga idadi o takoro hiwo ngorumino.

²⁶Ai salib ma l̄okuil̄e yanuneuku o dulihi yakorona o galaki Unangika, enagënanga: ”O Yahudi ma Nyawa manga Koano”.

²⁷Ima kinïki de o Yesus önanga yäsaliboli yotoma-toma de yo ora-ora yahinoto; womatëngo o nirakoka deʼ womatengoli Ai higiloka. [

²⁸ De hoko gënanga idadi hokä i tulihoka Ma Jou Ai Demo ma Buku oka; enagënanga: ”Unanga womadadi o nyawa madorou.”]

²⁹ O nyawa yakokaino genangino manga häeke yagiwi-giwi deʼ iwi hohedu o Yesus. Onanga yotemo, ”Hei, Ngona nomau nakilianga ma Jou Madutu ai Tau, deʼ nohigokoli o wange hange magoronaka.

³⁰Beika o saliboka gënanga de nouti deʼ nohihalamati Ani diri!”

³¹Hoko genangoli o imam-imam manga häeke deʼ o agama ma guru-guru iwihohedu o Yesus. Onanga imake temo, ”Unanga wahihalamati o nyawa mahomoa, mä Ai diri mahirete Unanga wakunua wohihalamati!

³²Nako Unanga o Israeloka manga koano, ma Koano Wohi hohalamati, kayaoa de hoko nenangohi Unanga o saliboka gënanga de wouti, hupaya ngomi miwi mäke deʼ mi ngaku Unangika!” O nyawa yäsosalib de o Yesus gënanga ma iwi hohedu o Yesus.

³³O wange ikoronaiha, madëkana o jam hangeino o berera gënanga mata-mataika idadi ihuhutu.

³⁴ Deʼ o takoro hange o bimaoa, o Yesus wopöaka de Ai ilingi kahä kuatil̄e, ”Eloi, Eloi, lama sabakhtani?” mamangarati, ”Ya Ahi Jou Madutu, ya Ahi Jou Madutu, yadodoa ho Ngona nohi mal̄aika Ngohi?”

³⁵Yamuruono naga genangoka yoihene o böaka gënanga, deʼ yotemo, ”Ni ihene, Unanga wïahoko o Elia!”

³⁶ Womatëngo onangino woma tai-taiti woiki wol̄ë o bunga karang daha watono o angguru magogiohikuku. I paha o bunga karang gënanga wohibilatuika o gota mabötika, daha wohi pëke o Yesus ai uru makaiika, de wotemo, ”Notamä, nia ino ngone hïlega o Elia boteka waino, wihi guti Unanga o saliboka gënanga.”

³⁷Daha o Yesus wopöaka, deʼ wohonenge.

³⁸ O guba inü nuneuku ma Jou ai Tau magoronaka ikakihi ibëlaka hinoto daku de yauku hiädono daukuku.

³⁹O tentaraka manga baluhu woma oko-okoino o salib mahimangoka gënanga, wamäke sarakia o Yesus wohonenge. O tentaraka manga baluhu gënanga wotemo, ”Marai itiai o nyawa nënanga ma Jou Madutu ai Ngohaka!”

⁴⁰ Genangokaö naga o ngongoheka yamuruono naga, kama gurutoka de yamäke mata-mata gënanga. Manga hidogoronaka naga o ngo Salome, o ngo Maria Magdalena, o ngo Maria o Yakobus magoduru deʼ o Yosis manga ayo.

⁴¹Onangala o ngongoheka iwinö ninïki deʼ iwï riwo o Yesus maöraha Unanga o Galilea madaeraka. Deʼ naga manga ngöeoli o ngongoheka mahomoa genangoka yoböaka o Yerusalemino, imako moteke de o Yesus.

⁴²Maöraha o Yusuf o Arimateaino woböa o wange i muläenge yohutu. Unanga o Agama ma Juru Hakimi mage getongoka duru iwi horomati. Unangö wododamä maöraha ma Jou Madutu womuläenge wopareta hokä o Koano. O wange gënanga o Hidiai ma wange (enagënanga o Yahudioka manga Puji mawange owahi). Hababu gënanga o Yusuf de ai barani wïhimanga o Pilatus deʼ wogahoko o Yesus aimayeti.

⁴³

⁴⁴O Pilatus wohëranga woihene o Yesus wohonengoka. Hoʼ o Pilatus wähuloko o nyawa iwiahoko o tentaraka manga baluhu deʼ wïleha unangika boteka o Yesus madekanoka wohonenge.

⁴⁵Woihenoka o tentaraka mangabaluhu gënanga ai hingahu, o Pilatus wihigumal̄a o Yusuf wal̄ë o Yesus ai mayeti.

⁴⁶Daha o Yusuf woija o ngöere magare-garehe ma aluhu deʼ wohi gutioka o Yesus ai mayeti, ünanga wahäwo de o ngöere gënanga. I paha ünanga wakelenga o mayeti gënanga o lungunuku, o lungunu gënanga yadiai o helewo i totoporono magoronaka. Ipaha de gënanga ünanga wödululu o helewo gahumu moi mapako-pako ihi beno o lungunu gënanga mangorana.

⁴⁷O öraha gënanga o ngo Maria Magdalena deʼ o ngo Maria o Yosis ngoi ayo yatailako hidodiai kiaka o Yesus iwi kelenga.