Read Tobelo O MARKUS 16 Bible Online

O MARKUS 16 - Tobelo bible

O MARKUS 16

¹Maöraha o Yahudioka manga Puji mawange ipahaka, o ngo Maria Magdalena, o ngo Maria o Yakobus ngoi ayo, deʼ o ngo Salome yoiki yo ija o rampa-rampa la mangale yaminya o Yesus ai mayeti.

²O ngoru-ngorumino duru, maoraha o wange iböa, o wange madodihiraka o minggu gënanga, önanga yoiki o jereika.

³O ngëkomo mahoanika önanga ima koketemo, ”O nagona yakunu inä riwo ngone yaheloro mahelewo o lungunu mapidaha madadamunu?” Hababu o helewo gënanga duru kahä pako. Mä imahi adonika genangoka önanga yamäke o helewo gënanga i luluoka.

⁵Daha önanga yowohama o lungunu gënanga magoronaika. Magoronaka o nirakoka, iwimäke womatëngo o goduru wapäke o juba magare-garehe wogogeruku, deʼ onanga yätodokana.

⁶O goduru gënanga wätemo, ”Uha nihawana! Ngohi tohiöriki ngini niwi lingiri o Yesus o Nazaret manyawa iwisosaliboka. Unanga koi wiwa nenangoka. Unanga womomikoka! Niolega dika, nënanga mangï önanga iwi idu.

⁷ Orahanënanga nioiki, nihingahu o abari nënanga iwinö ninïkika de o Petrusikaö. Nia hëtongo, ’Unanga woiki wohira de ngini o Galileaika. Dokengoka ngini aha niwi mäke Unanga, hokä Unanga winihi ngahuoka nginika.’ ”

⁸De önanga o lungunoka de yohupu daha imapopäta karana yätodokana deʼ yohawana. Onanga kamoi ikaö de yahetongua karana yohawana. [

⁹Ipahaika o Yesus wohonenge de womomiki o ngoru-ngorumino o Minggu ma wangeoka, Unanga madodihiraka womahi matoko Ai diri o ngo Maria Magdalenaika. (O ngo Mariaino gënanga o Yesus wohi hupuoka tumidi o womaha madorou.)

¹⁰De o ngo Maria Magdalena mohingahu idädadioka gënanga o Yesus ai dodiawoika, magogiria yohaharu deʼ yoari.

¹¹Mä maöraha önanga yoihene o Yesus wowango deʼ o ngo Maria mïmäkeoka Unanga onanga yongakua.

¹²Ipaha de gënanga o Yesus womahi matoko Ai diri iwinö ninïkika yahinoto de madodagi hara moioli. Gënanga idadi maöraha o nyawa yahinoto gënanga yotagi magogiriaka o kapongo moika.

¹³Hoʼ onanga ima kilioro deʼ i hi ngahu o hali gënanga mahomoaika. Mä onanga yongakua.

¹⁴Mabobaha o Yesus womahi matoko Ai diri iwinö ninïkika yangimoi de yamoi, maöraha önanga yol̄omo magogiriaka. Unanga wätaaere önanga hababu önanga manga ngongaku i kuranga deʼ manga häeke itogowiniholi hiädono yängakua o nyawa iwi mäke-mäkeoka o Yesus wowango.

¹⁵ Daha o Yesus wätemo onangika, ”Nioiki o dunia nia möde-mödeke deʼ nihinga ngahu o Abari ma Oa ma Jou Madutuino gënanga o nyawaika niä gëto-gëtongo mata-mata.

¹⁶O nyawa yongakua aha yähukumu. Mä o nyawa yongaku deʼ yä ohiki, aha yohalamati.

¹⁷Hoka manyonyata i goungu önanga yongaku, o nyawa ge önanga aha yaduhu o womaha madorou de Ahi romanga; önanga aha yotemo-temo de o demo-o demo kiaka mahira önanga yanäkoua.

¹⁸Nako önanga yasö o dodiha ekola yaokere o rasongo, önanga aha yamäkeua o bodito. Nako önanga yakelenga manga giama o nyawa yopopanyakeuku, o nyawa ge önanga aha yotogumu.”

¹⁹ Ma Jou Yesus woade-ade dede önanga ipaha, Unanga iwi göraka o horogaika. Dokengoka Unanga wopareta de ma Jou Madutu.

²⁰Deʼ iwinö ninïki yoiki deʼ ihi ngahu o abari ma Jou Madutuino o ngï yögëto-gëtongo. Deʼ ma Jouö womahi moteke womanarama dede önanga deʼ o nonako i hëra-hëranga idadi manyonyata i goungu to önanga manga hingahu itiai.] [O DULIHI MA HIRAINO MAHOMOA MABOBAHA O ngo ngoheka gënanga yoiki o Petrus deʼ ai dodiawoika, daha yoade-ade de madipoko mata-mata wahi ngahu-ngahuoka onangika magoduru gënanga. Ipaha de gënanga o Yesus mahirete mangale de iwinöninïki ihiabari o wange mahiwaroko hiädono o wange madumuniha o abari madebi-debini deʼ i kokakali yakorona mangale o halamati ikokakali.]