Read Tobelo O MARKUS 2 Bible Online

O MARKUS 2 - Tobelo bible

O MARKUS 2

¹O wange muruono naga ipahaika o Yesus woma idulu o Kapernaum makotaika. O abari yaika yaino yoihene o Yesus naga o tauoka.

²Ho manga ngöe o nyawa yoböa. Onanga imatoomu dokengoka hiädono o ngï koiwaka. O ngoranokaö iömanga i ehoto deo nyawa. Dahaö o Yesus wohingahu onangika o abari ma Jou Madutuino.

³Unanga magogiriaka wotemo-temo, yaruata ima teke ligoraka womatëngo wolugu-lugu la iwi ao o Yesusika.

⁴Mä karana o nyawa yowöe holi, yakunua imahi tigi Unangika. Hoʼ onanga yadöa matau de yakilianga makatu o Yesus iwi totanil̄e. Ipaha de gënanga önanga iwi wora o nyawa wolugu-lugu gënanga kamamoi de aitikara.

⁵O Yesus wamäke hokokia ma amoko to ona manga ngongaku, Unanga wïtemo wolugu-luguika gënanga, ”Ahi ngohaka, anibaradoha mata-mata i apongoka.”

⁶Yamuruono naga o agama maguru kanganohi yogogeruku genangoka muläenge manga hiningaka ileha-leha,

⁷”Duru wobarani o nyawa nënanga wotemo hoko gënanga! Unanga wihikauku ma Jou Madutu. Mahomoa de ma Jou Madutu, o nagonahi yakunu ya apongo o baradoha?”

⁸O öraha gënanga dika o Yesus wohi öriki to önanga manga dibanga. Ho Unanga wätemo, ”Yadodoa ho niahiningaka ileha-leha hokogënanga?

⁹Kiaka iholoi igapanga: mademo, ’Ani baradoha iapongoka’, ekola mademo ’Nomomiki nagoraka ani tikara deʼ nomä dagi’?

¹⁰Mä o öraha nënanga Ngohi aha tohimatoko madiai nginika, o dunia mal̄okuoka nënanga o Nyawa manga Ngohaka wokuaha waapongo o baradoha.” Dahaö o Yesus wïtemo o nyawa wolugu-luguika gënanga,

¹¹”No momiki, nagoraka ani tikara deʼ nolio!”

¹²Unanga womomiki deʼ woma taiti wal̄ë aitikara daha wohupu de önanga mata-mata yahakihi. O nyawa manga ngöe gënanga yokiriri deʼ iwihigiriri ma Jou Madutu. Onanga yato, ”Komaiwahi ngone hamäke hoko nënanga idadi!”

¹³O Yesus womakilioroli o Galilea ma Taaga madowongino. Manga ngöe o nyawa yaino Unangika, deʼ Unanga wädotoko önanga.

¹⁴Magogiriaka o Yesus wotagi genangino, Unanga wïmäke womatëngo o soungu wogaho-gahoko airomanga o Lewi, o Alfeus aingohaka, wogogerukuohi o soungu makantoroka. O Yesus wïtemo unangika, ”Nohi nïki Ngohi.” Ho o Lewi womaoko deʼ wï nïki o Yesus.

¹⁵Maöraha o Yesus wol̄omo magogiriaka o Lewi aitauoka, yoböaino manga ngöe o soungu yogaho-gahoko deʼ manga ngöe imoteke o kawaha manga damäke önanga gënanga i torou manga wowango, mata-mata yol̄omo imakomoteke de o Yesus deʼ iwinö ninïki. Hababu manga hidogoronaka manga ngöe iwinïki o Yesus.

¹⁶Yamuruono naga o agama maguru o Farisi manyawaino iwi mäke o Yesus wol̄omo imakomoteke de o soungu yogaho-gahoko deʼ o nyawa manga wowango itotorou. Hoʼ onanga yoleha o Yesus iwinöninïkika, ”Yadodoa honiaguru wol̄omo imakomoteke de o soungu yogaho-gahoko deʼ o nyawa madorou gënanga?”

¹⁷O Yesus woihene manga loleha gënanga, howä baluhu, ”O nyawa yopanyakeua yoparalua o dotere; duga-duga o nyawa yopopanyake dika. Ngohi toböa tä ahokua o nyawa ima mäo manga diri yaoaka, duga-duga o nyawa yäpulo-pulono önanga gënanga okiaua yadäene.”

¹⁸Mamoiuku iwinöninïki o Yohanis Wo ohi-ohiki de o Farisi manyawa yopuaha magogiriaka. Deʼ naga o nyawa yaino o Yesusino deʼ iwi leha, ”Yadodoa ho o Yohanis Wo ohi-ohiki iwinöninïki deʼ yani nïki o Farisi manyawa yopuaha, hoʼ de Bapa ininöninïki kowali?”

¹⁹O Yesus wäbaluhu, ”O kawingi marameangoka, boteka o nyawa yaino-ino o kawingi marameangino koyol̄omua? Nako o nauru wokawi-kawingi ka dede onangohi, marai önanga yol̄omo.

²⁰Mä aha iböa toëna maöraha o nauru wokawi-kawingi gënanga manga hidogoronaka de iwingoho. O öraha gënanga dahaö onangö koyol̄omua.

²¹Koiwa o nyawa imä dapa manga baju madorou de ihitapa de o ngöere mahungi mabëlaka. Hababu madadapa mangöere gënanga aha yatïngi, hiädono makakihi iholoi ilamoko.

²²Hokogenangoli moiua o angguru mahungi yauhe o angguru mangï hira-hirauku. Karana o angguru mahungi gënanga aha yapooteke mangï i hira-hira. Mabaha hinotö kai umo. O angguru mahungi kokiani yöguhe o angguru mangï mahungiuku!”

²³ Mamoiuku o Yahudioka manga Puji mawangeoka, o Yesus wakaino moi o gandum madumuleino, iwinö ninïki yomuläenge yautuku ma gandum.

²⁴Ho o Farisi manyawa iwi temo o Yesusika, ”Yadodoa ho ininö ninïki yatilakuru nanga agama matita, deʼ yadiai okia ilara-laranga o Puji mawangeoka?”

²⁵ O Yesus wäbaluhu, ”Komaiwahi ngini niabasa okia o Daud wadiai, maöraha o Abyatar wodadi o imam womomulia. O öraha gënanga o Daud deʼ ainyawa yähahini, deʼ koiwa manga inomo, ünanga wowohama ma Jou ai Tauika, deʼ waol̄omo o roti ihi hubaka ma Jou Madutuika. Deʼ o roti gënanga wahidöakoli ainyawaika. Enahioko imoteke nanga agama, o imam-imam dika yakunu yaol̄omo o roti gënanga.”

²⁷Deʼ o Yesus wätemoli, ”O Puji mawange yadiai mangale o nyawa; mä konyawaua mangale o Puji mawange.

²⁸Hoʼ, o Nyawa manga Ngohaka wokuaha maboboloioli o Puji mawange ma Wakuaha.”