Read Tobelo O MARKUS 3 Bible Online

O MARKUS 3 - Tobelo bible

O MARKUS 3

¹O Yesus womakilioroli o pupuji matauika. Genangoka naga womatëngo aigiama mahononga ihonenge.

²Genangoka naga o nyawa yomau yalingiri o Yesus aihowono, hupaya yakunu Unanga iwikalaki. Hoʼ onanga salalu iwitotailako Unanga boteka Unanga aha wahitogumu o nyawa o Yahudioka manga Puji mawangeoka.

³O Yesus wïtemo o nyawa aigiama mahononga ihone-honenge gënanga, ”Naino noma okoino nengokadau, mahimangoka.”

⁴Daha Unanga wäleha genangokadau manyawa, ”Imoteke nanga agama, ngone yakunu okia hodiai o Puji mawangeoka? O oa hodiai ekola o dorou hodiai? Hahihalamati o nyawa ekola hatoma?” Onanga kai marirïdoka.

⁵O Yesus de aidohata woma lega ikilolitino mä Unanga aihininga kai huha dika, karana önanga manga häeke madogowini. Ho witemo o nyawaika gënanga, ”Nohi döakika anigiama.” O nyawa gënanga aigiama wohidöakika, deʼ aigiama maitogumu.

⁶O Farisi manyawa yamal̄a o pupuji matau gënanga, deʼ de majapati imahi kadailako de o Herodes ainyawa yamuruono naga, laʼ iwitoma o Yesus.

⁷O Yesus deʼ iwinöninïki yoiki imadohuku o Galilea ma Taagaika. Duru kamanga ngöe o Galileaino manyawa yoiki iwinïki o Yesus. Manga ngöeoli o Yudea de yaino,

⁸o Yerusalemino, o Idumea madaeraino, deʼ o Yordan o wange mahiwaroko mahonongaino, deʼ o Tirus deʼ o Sidon makota magilolitino. Onanga mata-mata yoböa o Yesusika, hababu önanga yoihene o hali mangöe wadiaioka.

⁹ O nyawa yoböa-böa gënanga duru kamanga ngöe, hiädono o Yesus wähuloko iwinöninïki yasadia o ngotiri, hababu uha hiädono o nyawa mangangöe gënanga iwihidehoto.

¹⁰Unanga wahitogumu duru kamanga ngöe o nyawa, hiädono mata-mata o nyawa yopopanyake imahi eho-ehoto imahi dailako imahi tigi Unangika la yakunu iwisö Unanga.

¹¹Deʼ o nyawa yangoha-ngohama o womaha madorou kade iwi mäke Unanga, gila-gila ima ruku Ai himangoka deʼ yopöaka, ”Ngona ma Jou Madutu ai Ngohaka!”

¹²Mä o Yesus woduhunu ikiria o womaha madorou gënanga i hi ngahu Unanga o naguna.

¹³Ipaha o Yesus wodöa o doporonil̄e, deʼ wä ahoko o nyawa yamuruono naga imoteke Ai mau. O nyawa gënanga yaino,

¹⁴daha manga hidogoronaka Unanga wäiriki yangimoi de yahinoto. Wato, ”Ngohi tinï iriki ngini, hupaya ngini nihinïki Ngohi, hupaya ngini tinïhuloko nihingahu o Abari ma Oa ma Jou Madutuino,

¹⁵deʼ ngini aha niamäke o kuaha la niaduhu o womaha madorou.”

¹⁶Nënanga yangimoi de yahinoto gënanga manga romanga: o Simon (iwihi ahokoli o Petrus),

¹⁷o Yakobus deʼ aidodoto o Yohanis enagënanga o Zebedeus aingoha-ngohaka (önanga nënanga yahiromanga Boanerges mamangarati ö dotereke ma ngohaka”),

¹⁸o Andreas, o Filipus, o Bartolomeus, o Matius, o Tomas, o Yakobus, o Alfeus aingohaka, o Tadeus, o Simon o berera ma Gogöana,

¹⁹deʼ o Yudas Iskariot wososetiaua o Yesusika.

²⁰Ipaha o Yesus wolio o tauika. Mä o nyawa manga ngöe yoböaoli imatoomu, hiädono o Yesus deʼ iwinöninïki imahi däenua yol̄omo.

²¹O nyawa manga ngöe yotemo, ”Unanga iwitogohangoka!” Deʼ Ai roriadodoto yoihene o hali gënanga, önanga yoiki yomau iwingöho Unanga.

²² O agama maguru-guru o Yerusalem de yaino-ino yotemo, ”Unanga o Beelzebul iwïngohamika! O womaha madorou madimono gënanga iwihidöaka o kuaha Unangika la waduhu o womaha madorou.”

²³O Yesus wä ahoko o nyawa yowöe-wöe gënanga, deʼ woade-ade onangika o hitotero muruono naga. ”Sarakia yakunu o womaha madorou yaduhu o womaha madorou,” o Yesus wato.

²⁴”Nako o negara moi, i regu-regu de imakokalawani, o negara gënanga aha i tedekanua.

²⁵Deʼ nako o tau moi manyawa deʼ manga rimoi koiwa deʼ imakokalawani, o tau moi manyawa gënanga aha yokilianga.

²⁶Nako o Ibilihi mapareta magoronaka idadi o gitingaka deʼ o galawani, o pareta gënanga i tedekanua, deʼ marai aha ihihanga.

²⁷Moiua o nyawa yakunu yöngohama womatëngo wokua-kuata aitau deʼ waora aiarata nako ünanga wohiraua wïliko o nyawa wokua-kuata gënanga. Wïliko i böto, dahaö ünanga yakunu waora aiarata.

²⁸Nianäko! Okiaka o nyawa o baradoha yodiai deʼ ihidemo o hikauku, önanga yakunu yä apongo.

²⁹ Mä kiaka önanga ihikauku ma Jou Madutu ai Womaha, önanga yakunua yä apongo! Hababu o hikauku gënanga ganga o baradoha i kokakali.” (

³⁰O Yesus wahetongo hokogënanga hababu naga o nyawa yotemo o Yesus iwi ngohamika o womaha madorou.)

³¹Ipaha de gënanga o Yesus ngoi ayo deʼ Ai riadödoto yoböa. Onanga yotamä maporetoka deʼ yähuloko o nyawa iwiahoko o Yesus.

³²O öraha gënanga manga ngöe o nyawa magogiriaka yogogeruku iwihigilolitino o Yesus. Onanga iwitemo Unangika, ”Bapa, ngoni ayo deʼ Ani riadödoto Bapa naga maporetoka. Onanga ini lingiri Bapa.”

³³O Yesus wohaluhu, ”O nagona Ngohi ayo? O nagona Ahi riadödoto?”

³⁴Ipaha Unanga wäpulono o nyawa yogögogeruku iwihi gogilolitino deʼ wotemo, ”Ne önanga Ngohi ayo deʼ Ahi riadödoto!

³⁵O nyawa yadodiai ma Jou Madutu aimau, ge önanga Ahi riadödoto o nauru deʼ Ahi biranga deʼ Ngohi ayo.”