Read Tobelo O MARKUS 4 Bible Online

O MARKUS 4 - Tobelo bible

O MARKUS 4

¹ O Yesus wodotokoli o Galilea ma Taaga mahohanoka. Duru manga ngöe o nyawa iwihi doomuino. Karana gënanga o Yesus woiki woharenuku o ngotiroka de yahitomoko o akeroka, deʼ o nyawa yowöe-wöe gënanga imaokoino o taaga madatekoka.

²Daha o Yesus wädotoko o hali mangöe onangika de wapäke o hitotero. Hoko nënanga Unanga wädotoko.

³”Ni ihene! Naga womatëngo wototumule woiki wohi barihi ai gihihi.

⁴Maöraha magogiriaka ünanga wohibarihi, naga magihihi itifa o ngekomuku. Hoʼ o totaleo yaino deʼ o gihihi gënanga yaol̄omo yamatäka.

⁵Nagaoli itifa o ngï ihohelewouku matonaka ipirinua. O gihihi-gihihi gënanga itedekanua de iwangoka karana matonaka ipirinua,

⁶mä de o wange iböa, i tori-torioka gënanga imuläenge imaai ipaha itoolenge deʼ ihonenge karana mangutuku iwohama ikurutukua.

⁷Nagaoli magihihi itifa o momo mahohihikauku. O momo mahohihika gënanga iwango deʼ yarakutu itori-torioka gënanga hiädono koi hohokua.

⁸Mä nagaoli magihihi i tifa o tonaka i boburereuku. O gihihi gënanga iwango, deʼ idadi ipako deʼ ihohoko, naga moruange, naga mori butanga, deʼ naga idogo higali maratuhu moi.”

⁹Iböto wohiade-ade o hitotero gënanga, o Yesus wotemo, ”O nagona de niangauku, ni ihene!”

¹⁰Maöraha o Yesus womatëngoka, o nyawa yoihe-ihenoka Ai dodötoko yaino Unangino imakomoteke deʼ yangimoi de yahinoto iwinöninïki. Onanga yogahoko Unanga wohitararono o hitotero mamangarati gënanga.

¹¹Deʼ o Yesus wätemo onangika, ”Ngini inihi döakoka o ngongike laʼ nianäko o rahasia mangale sarakia ma Jou Madutu wopareta. Mä o nyawa mapore-poretoka yädotoko deʼ o hitotero,

¹² hupaya ’Onanga aha yatailako hokogenangika, mä yanäkoua okia i dädadi, önanga aha yoihene hokogenangika, mä i mangaratiua, nënanga idadi hupaya uha önanga yamäke deʼ i mangarati deʼ uha yoböa ma Jou Madutuika deʼ ma Jou Madutu wä apongo önanga.’ ”

¹³Ipaha o Yesus wätemo onangika, ”Nako ngini nimangaratiua o hitotero gënanga, sarakia ngini yakunu nimangarati o hitotero mahomoa?

¹⁴O gihihi wohi bari-barihi gënanga ganga o nyawa ihi ngahu-ngahu o abari ma Jou Madutuino.

¹⁵O gihihi i tifa o ngekomuku, hohi tero o nyawa yoihene o abari mangale sarakia ma Jou Madutu wopareta. Hoko gënanga yoihene, o Ibilihi iböa deʼ yal̄ë okia ihibarihoka manga hininga magoronaka.

¹⁶O gihihi itifa o ngï ihohelewouku, hohitero o nyawa yoihene o abari gënanga, deʼ gila-gila yatarima de manga hininga isanangi.

¹⁷Mä o abari gënanga imahi ngutukua manga hininga magoronaka, hiädono itongohonua. Hoko gënanga önanga yatagongo o huha ekola o aniaya karana o abari gënanga, gila-gila önanga imadohuku de yosetia okaua.

¹⁸O gihihi itifa o momo mahohihikauku gënanga hohitero o nyawa yoihene o abari gënanga,

¹⁹mä yohawatere mangale to önanga manga wowango deʼ yönahihu yöwango okia-kiaua yokuranga. O nahihu mangale o hali mangöe iwohama manga hininga magoronaka. Karana gënanga o abari ma Jou Madutuino yarakutu manga hininga magoronaka, hiädono ihohokua.

²⁰Deʼ o gihihi itifa o tonaka i boburereuku gënanga hohitero o nyawa yoihene o abari gënanga deʼ yatarima, önanga manga hohoko i wöe, naga moruange, naga mori butanga deʼ naga idogo ihigali maratuhu moi manga hasili.”

²¹ Inoli o Yesus wotemoli, ”Ma muruono de o nyawa yatuhuku manga hilo deʼ yatamunuku de o rube, ekola yakelengauku manga ngidu-ngidu matimioka? Boteka ünanga wakelengaukua o hilo gënanga, o hilo matotodengoka?

²² Koiwa i iu-iunu aha koya mäkeua; deʼ koiwa irörahasia, aha koyö dogiliangua.

²³Hababu gënanga, nako de nia ngaukoka, ni ihene!”

²⁴ Deʼ o Yesus wotemoli, ”Ni ihene nihidodiai okia ngini ni ihene nënanga! O duduga ngini niahipäke o nyawa mahomoaika, aha ma Jou Madutu winihi päkeoli nginika — deʼ i goungu i holoi i wöeoli.

²⁵ Hababu o nyawa de ma enangoka, aha yahidöaka iholoi iwöeoli; mä o nyawa koiwa onangoka, de ma huhutulohi naga onangoka aha yal̄ëoli.”

²⁶O Yesus wadohangoli Ai ade-ade, ”Nako maöraha ma Jou Madutu wopareta hokä o koano, madodagi yakunu hohitero hokä womatëngo wohibarihi o gihihi aidumuleoka.

²⁷Yö hutu ünanga womä idu; o wange-wange ünanga womomikino. Deʼ hoko kiaua o gihihi gënanga iwango deʼ idadi ipako. Mä sarakia madodagi o gihihi-gihihi gënanga iwango deʼ idadi ipako, o nyawa gënanga wanäkoua.

²⁸O tonaka gënanga ëna mahirete ihihupu mahasili: madodihiraka madubo, ipaha i röehe, dahaö mahohoko.

²⁹ Deʼ nako o gandum gënanga iohakoka, o nyawa gënanga womuläenge woutuku karana maöraha o gugutuku yadonoka.”

³⁰”Oraha okia ma Jou Madutu wopareta, de okia ngone yakunu hohitotero?” o Yesus wolehali. ”Ma rupa okia yakunu ngone hapäke laʼ hohitararono?

³¹Oraha okia ma Jou Madutu wopareta, madodagi hokä o hitotero nënanga: O sawi mamui o gahumu moi womatëngo wal̄ë deʼ wadatomo o tonakuku. O sawi mamui ganga o duniaka sawaliua ënanga o gihihi ma alu-aluhu.

³²Mä nako iwangoka, o gota idato-datomo mahidogoronaka, sawaliua o sawi iholoi ilamoko mautu. Ma jaga-jaga duru irubu hiädono o totaleo yakunu yaino, deʼ ima diai maigutu mahohongo matimiuku.”

³³Hokogënanga o Yesus wädotoko o nyawa de wapäke mangöe o hitotero hokä hokogënanga, hokokia magurutika önanga yakunu imangarati.

³⁴O Yesus salalu wapäke o hitotero nako Unanga wädotoko o nyawa manga ngöe gënanga. Mä nako Unanga mahirete de iwinöninïki, Unanga wohidöaka mamangale mata-mata onangika.

³⁵O wange gënanga dika o bobimaoa, o Yesus wätemo iwinö ninïkika, ”Nia ino ngone hohidete o taaga mahonongaika.”

³⁶O Yesus wohärene o ngotiril̄e, deʼ iwinöninïki yämal̄a o nyawa yowöe-wöe o taaga madatekoka, de yohärene ka gënanga mangötiril̄e. O ngotiri mahomoaö naga gënangokadau. De ipaha o Yesus deʼ iwinöninïki yomuläenge yohidete.

³⁷Ipahaika itedekanua o hidal̄oko ipoputurungu iböa. O lulu imuläenge ihi boha-boha manga ngotiri deʼ iharene magoronail̄e hiädono o ngotiri gënanga ngade i ömanga de o akere.

³⁸O ngotiri gënanga madihiraka, o Yesus womä iduoka de Ai häeke o gogerena mal̄okuoka. Iwinöninïki iwi tömanga Unanga. Onanga yotemo, ”Bapa Guru, boteka Bapa nohaduli ikaua ngone hobodito?”

³⁹O Yesus womomiki, deʼ wodorohu o hidal̄oko gënanga, deʼ watemo o taaga, ”Nomarïdi, noogoro!” Mahidal̄oko irïdi deʼ ma taaga idadi duru iogoro.

⁴⁰Deʼ o Yesus wätemo iwinöninïkika, ”Yadodoa hongini nihawana? Yadodoa hongini ningakua Ngohino?”

⁴¹Onanga yohawana deʼ imaketemo moi de moika, ”Imoteke madiai o naguna o nyawa nënanga, hiädono o hidal̄oko deʼ o lulu ma iwihi moteke Unangika.”